Amɔs 2 - Kazambale lé Sebe Sauunu 1979

Moab

¹ Gakelebale léma: Moab munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo; é Édom munu nwiinzan blɛn wɔlɛnu kyɛ ble yé é wo kɛlɛ tɔrɛ nya, azama.

² Maa dan kyɛ bi lɛ Moab tɛrɛ la; é dan fuakɔnnu kyɛ ble lɛ Kérijɔt; yé Moab munu é dan zamaga wo lɛ, ’té fla bɔ a é gyɛle, ’té woo gulioo guli vɔa, ’té béli vun éé wé.

³ Maa dan weblezannu nyaa lɛ wo va, yé maa dan ana minwiinmunu gyɛ lɛ wo nya ékeva. A zo lé Gakelebale a fe.

Juda

⁴ Gakelebale léma: Juda munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo. Wo serele bo Gakelebale lé bélidɔwe ma, yé wo ’ka a sɔnnénu pa lɛ lo, yé viémiyilinu lé wo tranu tawo wo zuo, ’bɛnu wo saan, ’bɛzama.

⁵ Maa dan kyɛ bi lɛ Juda tɛrɛ la, yé é dan fuakɔnnu kyɛ ble lɛ Jérusalɛm.

Bale Izraɛl lé munu lé we ble

⁶ Gakelebale léma: Izraɛlnu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo. Wo mi tegele dan gɔɔli va, yé wo nyanégyɛzan dan sawala ba fié va.

⁷ É sɔ wo lɛ léé, ’wo nyanaizénlazan ye tɛrɛ nya é nwiin, yé wo wenaané bɔmazannu lé se si wo lee. Gɔnézan valé é be éé goo le do kpen va, an tɔ ’lɛzan sɛrɛle we ma.

⁸ Woo nyanaan sɔnu lé munu a dɔ wo lɛ, wo ta, yobannanu faa sɔnɔ, yé munu lé wo wo gyɛ we nya, woo ’bɛnu lé dɔrɔnu minian wolé yokɔnnu gi,

⁹ dɔlé té Amoré munu lé wo ke grɔgrɔ bélé sɛdrɛyilinu zo, ’té wa plɛplɛ bélé sɛnéyilinu zo, maa ’bɛnu sɛrɛ Izraɛlnu ’lɛ. Maa ’bɛnu poronu sɛrɛ loru, yé maa ’bɛnu suninu sɛrɛ tɛrɛ gi.

¹⁰ Yé é ziin, maa ka si Éjipiti tɛrɛ la, yé an go ka nya bwi gi lɛɛ yɔ fié, Amorénu lé tɛrɛ nɔle ka lɛ we ma.

¹¹ Maa ka be kenu kɛlɛ balelayezannu nya, yé maa ka va pɛniɛ kenu kɛlɛ nazirézannu nya. (’Bɛ gi léé, bopa é yɛramazan Gakelebale zé nya.) Izraɛlnu, a zoan é ke loo? A zo lé Gakelebale a fe.

¹² Yé ka nwɛ minile nɔ nazirézannu lɛ, yé ka lé balelayezannu lɛ léé, té wo balelawe fe lo.

¹³ Ka ye, maa dan ka wii lɛ bélé goro lé ’sanwunnu ke é fanle a nya éé tɛrɛ wiian fɛan zo, a zo.

¹⁴ Vlanburuzan baba ’ka dan bɔ lɛ gyɛle lɛ bwi gi lo; mi lé plɛplɛ ke a lee, é ’ka dan bɔ lɛ wekɛlɛle lɛ a nya lo, yé nyanazan ’ka dan bɔ lɛ ébo sole lɛ we lee lo.

¹⁵ Savulizan ’ka dan é dɔna ye lɛ lo, yé gane ta kelekelezan ’ka dan so lɛ a gi lo, yé wisootazan ’ka dan ébo béli lɛ lo.

¹⁶ Gulidanzannu va bli la plɛplɛzannu é dan gyɛ lɛ bwi gi é porole ’bɛ yi la. A zo lé Gakelebale a fe.