Amɔs 1 - Kazambale lé Sebe Sauunu 1979

¹ Trubɛ tabinmunu lé wo ke Tékoa, wo vazan do lé wa laama Amɔs, é Izraɛl lé we ye yuɛzi gi Juda nwiinzan blɛn Ozias valé Izraɛl munu nwiinzan blɛn Joas be Jéroboam bléyi va, ’té é vo lɛɛ fié yé tɛrɛ ma é nyɔɔn.

² É léé: Gakelebale dére a wena Siɔn bélé golizra zo, ’Té éé wé Jérusalɛm. Trubɛ tabinzannu lé trubɛ blena a gyɛ bona, Kaamɛl gɔ bɛlo nwiin a é gale.

Bale Izraɛl punma bɛnnu lé we ble Siri

³ Gakelebale léma: Damas munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo; wo Galaad munu sunwo ratoo blɛn nya, azama.

⁴ Maa dan kyɛ bi lɛ Azaɛl lé kɔn gi, yé é dan Bɛn‐Adad lé fuakɔnnu kyɛ ble lɛ.

⁵ Maa dan kɔn lɛ tan foliɛwɔlɛnu yéli lɛ Damas; maa dan Bikat‐Avan tamunu nyaa lɛ, mi lé soowolivwii ke a lee Bɛt‐Édɛn, ’bɛ koo é ziin; yé wo dan go lɛ Sirinu nya luu gi Kii tɛrɛ la. A zo lé Gakelebale a fe.

Filisiti

⁶ Gakelebale léma: Gaza munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo; wo mi ’léé kiɛre kɛlɛ luu nya yé wo wo pa Édom munu lee, azama.

⁷ Maa dan kyɛ bi lɛ Gaza gɔrɔ gi, yé é dan ana fuakɔnnu ble lɛ.

⁸ Maa dan Azdɔd munu nyaa lɛ; mi lé soowolivwii ke a lee Azkalɔn, ’bɛ koo é ziin. Maa dan an bɛ dɔra lɛ Ékrɔn ta, yé Filisitinu pɔné é dan zamaga wo lɛ. A zo lé Mizan, Gakelebale a fe.

Tii

⁹ Gakelebale léma: Tii munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo. Wo luu ’léé kiɛre pa Édom munu lee, yé gipawe lé wa kɛlɛ ’wo bwenu va, a sele saan wo gi, azama.

¹⁰ Maa dan kyɛ bi lɛ Tii gɔrɔ gi, yé é dan ana fuakɔnnu ble lɛ.

Édom

¹¹ Gakelebale léma: Édom munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo; é ’é bwenu zuo bin gwɔun nya, yé é nyanai zénle wo ta yi ga. Alé bliflile ana yifaama, yé a wɛwɛ dɔle glɛ ’ka lo,

¹² amalé maa dan kyɛ bi lɛ Téman tɛrɛ la yé é dan Bozra lé fuakɔnnu kyɛ ble lɛ.

Amɔn

¹³ Gakelebale léma: Amɔn munu lé wenyané blɛn yaa lé we ma, gba, maa fé boenwo ziɛn, we lé maa a fe léé, maa dan a kɛlɛ lɛ, maa ’ka dan an dére nɔla lɛ lo. Wo Galaad bɔnlomu bɔn fia, léé, ’wolé tɛrɛ ’é kɛlɛ blɛn, azama.

¹⁴ Maa dan kyɛ bi lɛ Raba gɔrɔ gi, yé é dan alé fuakɔnnu ble lɛ, ’té gulidanmunu éé siaan gulidanyi nya, ’té barikoko éé giéan fu plɛplɛ giéyi nya.

¹⁵ Yé wo nwiinzan blɛn é dan go lɛ luu gi, yee valé élé mi blɛnnu nya é va. A zo lé Gakelebale a fe.