Agajé 2 - Kazambale lé Sebe Sauunu 1979

Bale lé kɔn dɛrɛ tɔ a é bɔle

¹ Moné sɔrafiézan lé yi yɔ do wɔlɛ dozan nya, Gakelebale we fe balelayezan Agajé lɛ, yé é léma:

² ’I we fe Juda tɛrɛ la gbɔrɔnama Séaltiɛl be Zorobabɛl valé Balebanmunu ’lɛzan Josadak be Jozué valé mi pɔnénu faa lɛ. Bé fe wo lɛ léma:

³ Munuan wo kɔn nɔnɔmi ’ko ye é vinin, wo va mi kyɛn ɛ ke é yuɛma ka vaa? Ka a yé sin kaa? É a fɛan zo bɛ, é ’ka fɛ pla nya ka yuɛ gi loo?

⁴ Gakelebale léma: Sin, Zorobabɛl, ’ibo dɔ plɛplɛ. Balebanmunu nwiinzan Josadak be Jozué, ’ibo dɔ plɛplɛ. Gakelebale léma: ’Kaa tɛrɛ ’ko la munu faa, ’kabo dɔ plɛplɛ. ’Ka nyanama pa, naa, maa a ka va. A zo lé lai sunyanu lé Gakelebale a fe.

⁵ Gipawe lé maa kɛlɛ ka va ka sile Éjipiti tɛrɛ la bléyi va, maa a é dɔle ’bɛ ta; an Léli a ka va, té ka kana lo.

⁶ Naa, lai sunyanu lé Gakelebale léma: A bléyi vo sɛ yé maa dan la valé tɛrɛ ma nyɔɔn lɛ, wɛyi valé fɛna gale koo é ziin;

⁷ maa dan bɛnnu faa ma nyɔɔn lɛ; bɛnnu faa lé fɛwezannu é dan da lɛ yé maa dan kɔn ’ko fan lɛ fuafɛnu nya. A zo lé lai sunyanu lé Gakelebale a fe.

⁸ Lai sunyanu lé Gakelebale léma: Gɔɔlifu a anzé nya, kyan a anzé nya.

⁹ Lai sunyanu lé Gakelebale léma: Kɔn voélazan ’ko tɔbɔle é dan mini lɛ kɔn vininzan zé ta. Fɛkona lé maa dan mi vo lɛ drɔɔ. A zo lé lai sunyanu lé Gakelebale a fe.

Balelayezan we laa Balebanmunu lee — Bale léé, é dan élé munu drɔɔ vo lɛ

¹⁰ Darius plale mi nwiin lɛɛ fiézan lé moné sɔraziɛnzan lé yi yɔ do wɔlɛ ziɛnzan nya, Gakelebale we fe balelayezan Agajé lɛ yé é léma:

¹¹ Lai sunyanu lé Gakelebale léma: ’I bélidɔwe ’ko gi laa Balebanzannu lee:

¹² Dé mi do balebanwi ’lɛ plɛplɛ pa élé sɔ lɔlu gi, dé é a giéna, dé alé sɔ mane buru ma, ɛɛ, dé fɛblele léé, dé nwɛ léé, dé nyɔnɔ léé, dé é a blefɛo?-?fɛan nya, dé é mane wo ma, wo ’lɛ éé dɔaa? Yé Balebanzannu léé: Gba.

¹³ Yé Agajé léé: Dé mi do tiri dɔ a manele fɛ gale ma we ma, dé é mane fɛ ’konu do ma, a tiri dɔɔ? Yé Balebanzannu léé: Iin, a tiri dɔ.

¹⁴ Yé Agajé we taa fe léma: Gakelebale léma: Munu ’ko a ’bɛ zo an yuɛ gi, bɛn ’ko a ’bɛ zo an yuɛ gi; wo panyanama faa a ’bɛ zo é ziin; blɛ lé wa kɛla an lɛ fɛkona bɛ, a tiri a.

¹⁵ We lé é vo kɛlɛna fɔɔ kyɔ, ’té wo ’ka tan gɔlɛ pla lɛ é ke ta Gakelebale lé kɔn gi lo, ’ka gi dan we ’ko ma doo.

¹⁶ Dé mi do da ’sa kana yɔ do si lɛ, a vu lé éé a yé. Dé é da dɔrɔ borona, dɔrɔ kana yɔ fié wɔlɛ vu si lɛ, a yɔ do lé éé a yé.

¹⁷ Maa gyan vɔ kalé fɛnu ma; an pooné vɔ kalé ’sa ma; maa kalé féi gyɛ goowɔlɛlɛɛ nya; maa kalé nyanama faa sɛrɛ. Dé maa ’bɛ faa kɛlɛoo, ka ’ka da lɛ an va ka pa gi lo. A zo lé Gakelebale a fe.

¹⁸ Ka gi dan doo; we lé é vo kɛlɛna fɔɔ kyɔ, é sia yian nya lé wo Gakelebale lé kɔn gane vɔ fɔɔ yé é bɔ moné sɔraziɛnzan lé yi yɔ do wɔlɛ ziɛnzan ma, ka gi dan ’bɛ ma doo.

¹⁹ ’Sa a tan boo laa? Dɔrɔféi koo, bɔrɔyili koo, grénadéyili koo, ɔliviyili koo, wo poro do kpen ’ka baan turu lo. Naa, é sia kɔngane vɔyi ma, maa dan wo faa drɔɔ vo lɛ.

Bale blivolɛdére fe Zorobabɛl lɛ

²⁰ Gakelebale we fe Agajé lɛ a gɔnɔ fiézan nya yee moné yi yɔ do wɔlɛ ziɛnzan nya yé é léma:

²¹ Bé fe Zorobabɛl lé é ke Juda tɛrɛ la gbɔrɔnama nya bɛ, a lɛ léma: Maa dan tɛrɛ valé la ma nyɔɔn lɛ.

²² Maa dan bɛnnu lé webleblinnu zana lɛ a gi; maa dan bɛnnu faa lé plɛplɛ sɛrɛ lɛ; maa dan goronu valé wo gizannu zana lɛ a gi; wisoonu valé wotazannu, wo dan ’wo ke gyɛ lɛ wolé gwɔun nya.

²³ Lai sunyanu lé Gakelebale léma: ’Bɛ yi la, bii an wuozan Séaltiɛl be Zorobabɛl, maa dan i si lɛ, maa dan yuɛ pa lɛ i va bélé minwiinzan lé bɛmakyan zo; maa i si a va, azama. A zo lé lai sunyanu lé Gakelebale a fe.