Agajé 1 - Kazambale lé Sebe Sauunu 1979

Bale léé, munu ’élé kɔn dɔ é ziin

¹ Darius plale mi nwiin lɛɛ fiézan lé moné suiɛdozan lé yi vininzan nya, Gakelebale we fe balelayezan Agajé lɔlu nya, Séaltiɛl be Zorobabɛl lé é ke gbɔrɔnama nya Juda tɛrɛ la, a lɛ, ’bɛ valé Balebanmunu ’lɛzan Josadak be Jozué lɛ, yé é léma:

² Lai sunyanu lé Gakelebale léma: Munu ’ko léma: Gakelebale lé kɔn dɔle é pa gi bléyi ’ka tan bɔ lɛ lo.

³ Ka dére ’ko lé we ma lé, Gakele?-?we fe balelayezan Agajé lɛ, yé é léma:

⁴ Kɔn lé alé plafɔn ke, ka nyanale a gi bléyi lé ke ’koo? ’Té anlé kɔn ’ko a é ’wiilee?

⁵ Sin, lai sunyanu lé Gakelebale léma: ’Ka gi dan ka kɛlɛwe ma do.

⁶ Ka ’sa kiɛre vɔa, ’té ka gya sɛ. Ka fɛ blé, ’té ka ’ka kaan lo. Ka ’yi minian, ’té ’yiminilɔrɔ ’ka sié ka ma lo. Sɔ a ka ta, ’té dunu ’ka sié ka ma lo. Nyanamapazan é ’é ban paan bala fɔnle gi yé é dia.

⁷ Lai sunyanu lé Gakelebale léma: ’Ka gi dan ka kɛlɛwenu ma doo.

⁸ ’Ka gɔ gié, ’ka da yili nya yé ’ka anlé kɔn dɔ. ’Bɛ é dan an gi nana lɛ, yé ’bɛ é dan an tɔ bɔ lɛ. A zo lé Gakelebale a fe.

⁹ Ka bli a fɛ kiɛre lɛ, yé ka ye, fɛ sɛné a ka lee; ka da a nya ka va, yé maa fu fɛɛ a ta. Lai sunyanu lé Gakelebale léé: Mɛmaléé? Anlé kɔn sɛrɛ, azama, ’té ka kabo tunuan kabo lé kɔn dɔle we ma.

¹⁰ Bɛwemalé la lɛɛ nyané kɛlɛ ka lɛ, yé tɛrɛ fɛ dɔle nyané kɛlɛ ka lɛ.

¹¹ An lɛɛdabléyi nɔla yɛrɛgabléyi nya, tɛrɛ koo, gɔnu koo, ’sa koo, dɔrɔ dɛrɛ koo, nyɔnɔ koo, fɛ faa lé éé dɔa tɛrɛ ta koo, munu valé winu koo, mi panyanama faa koo, wo ma.

¹² Séaltiɛl be Zorobabɛl koo, Balebanmunu ’lɛzan Josadak be Jozué koo, mi pɔnénu koo, wo ’wolé Bale Gakelebale dére ’ma, yé we lé Gakelebale wolé Bale balelayezan Agajé pa zia a fena, wa ’ma. Yé kana zén munu gi é baba Gakelebale ’lɛ.

¹³ Agajé lé Gakelebale a pa zia, é Gakelebale dére fe munu lɛ léma: Gakelebale léma: Maa a ka va.

¹⁴ Juda tɛrɛ la gbɔrɔnama Séaltiɛl be Zorobabɛl koo, Balebanmunu ’lɛzan Josadak be Jozué koo, mi pɔnénu faa koo, Gakelebale nyanama pa wo bli gi. Wo da yé wo kun lai sunyanu lé Gakelebale, wolé Bale lé kɔn dɔle ma,

¹⁵ Darius plale mi nwiin lɛɛ fiézan lé moné suiɛdozan lé yi yɔ do wɔlɛ ziɛnzan nya.