Abudias 1 - Kazambale lé Sebe Sauunu 1979

Bale é dan we lɛdɔ lɛ Édom gi

¹ Abudias balelawe fe léma: Mizan Gakelebale we fe Édom ma ’ko zo: Gakelebale we do zuo fe ko lɛ, Yé wo mi nwunvɔ bɛnnu va a fele we gi léé: ’Ka nwa, ’ka go guli dan Édom munu va.

² Bé ye, maa dan i kɛlɛ lɛ kiéné bɛngɔnɔnu méléna, I dan kɛlɛ lɛ serelebomazan blɛn nya.

³ Bian i ke é nyanale gɔlɛkoronu gi, ’Té i ke é nyanale loru zia, ’Té i a fena i bli gi léé, De ɛ dan ’é zun lɛ tɛrɛ vaa? bii lé. Ilé boblɛn i saan.

⁴ Dé i ilé kɔn dɔ loru baa bélé gola zé zo‐oo, Dé i nyanana kɛlɛ monénénu mélénaoo, Maa dan i zun lɛ gla nya. A zo lé Gakelebale a fe.

⁵ Dé kyeenwozannu valé ’wiiéfɛtazannu da i va é béli, Fɛ lé é wozé bɔ, wo ’ka dan a si lɛ loo? Dé dɔrɔporo sozannu da ilé féi Wo ’ka dan a gɔ ma vo lɛ i lɛ loo? Wo nyanainyawe bɔ i ma ’lɛ.

⁶ Wo Ézau lé fɛnu fwi fɛan zo, Yé alé fɛwezannu ta a é bɔrale gbaglaa, bé ye do.

⁷ Munu lé wo péli vɔ i va, wo i bin fɔɔ wo bɔ i nya ilé tɛrɛ glɛ la, I béénu dabli kɛlɛ i lɛ; wo pla i nwiin, Munu lé i fɛblele nɔ wo lɛ, wo san pla i lee, ’Té i ’ka ’bɛ gi dɔɔa lo.

⁸ Gakelebale léma: ’Bɛ yi nya, maa dan wedɔɔzannu faa si lɛ Édom, Yé an dan gikinizannu faa si lɛ Ézau lé gɔnu ma. Yee kaan loo?

⁹ Oo Téman, di blɛn é dan kini lɛ ilé gulidanmunu gi; Naa, Ézau gɔ ma munu faa é dan zamaga wo lɛ mi gyɛna lé éé dunu zén‐é mi ta, ana.

¹⁰ Glawe lé bé kɛlɛ i bwe Jakɔb lɛ, ’bɛ lé we ma lé Yara blɛn é dan i gyɛ lɛ, Yé izé é dan nyaa lɛ tata.

¹¹ Yian nya lé i dɔ i bwe yara, Yian nya lé bɛnnu go alé sunyanu nya luu gi, Yé bɛnnu wɔra alé gɔrɔ gi, Yé wo ’munnu zun Jérusalɛm ma, Bii é ziin, bii a bélé wo va mi do zo.

¹² Té i gi é nana i bwe lé nyanébleyi nya lo; yian nya lé we tɔntɔn bɔ a ma, té i gi é nana lo. Yian nya lé Juda munu lé fɛna vo é ’bin nya, té i gi é nana ’bɛ ma lo. Wolé klebleyi nya, té i ’léé blɛnblɛn vɔ wo ma lo.

¹³ Yian nya lé wo anlé munu lé gɔrɔ zana a gi, té i wɔra ana lo, Yian nya lé wo wolé we sɛrɛ tata, té i gi é nana we tɔntɔn bɔle wo ma we gi lo, Yian nya lé wolé fɛna vo é ’bin nya, té i bɛ mane wolé fuafɛnu ma lo.

¹⁴ Munu lé wo so wo nyanézannu lee vlan nya, té i dɔ zi blan ta wo gyɛle we ma lo, Yé mi voélazannu lé wo vo é yuɛma bɛ, té i wo pa wo nyanézannu lee wolé klebleyi nya lo.

¹⁵ Naa, Gakelebale lé yi bɔ é pu, bɛnnu faa zé nya. I we kɛlɛ fɛan zo, a zo duo lé wo dan izé kɛlɛ lɛ. I kɛlɛwenu é dan dia lɛ i ta;

¹⁶ Naa, ka dɔrɔ mini anlé gɔ sauun nwiin fɛan zo, A zo duo lé bɛnnu faa é dan wozé mini lɛ, té wo ’ka daan a ma pelo. Wo dan dɔrɔ mini lɛ, ’té éé wo gya, Yé wo ta é dan saan lɛ bélé fɛan zo lé wo ’ka ana turu lo, a zo.

Guliwuo é dan vo lɛ Izraɛl lɛ

¹⁷ Naa, sile we gi é dan kɛlɛ lɛ Siɔn gɔ nwiin; é dan kɛlɛ lɛ sauun, Yé Jakɔb lé munu é dan ’wolé tɛrɛ si lɛ é ziin.

¹⁸ Jakɔb lé munu é dan kɛlɛ lɛ bélé kyɛ zo, Yé Jozɛfu lé munu é dan kɛlɛ lɛ bélé kyɛnɛnɛ zo, Naa, Ézau lé munu é dan kɛlɛ lɛ lɔɔ zo, Yé wo kyɛ é dan vɔ lɛ lɔɔ ’léé, yé a kyɛ é ble, Yé Ézau lé mi do kpen ’ka dan vo lɛ ana lo, Naa, Gakelebale ɛ fe.

¹⁹ Ézau lé gɔ é dan kɛlɛ lɛ yirinwana bɛyilazia munu zé nya, Yé Filisitinu lé tɛrɛ é dan kɛlɛ lɛ fɛna pɛblɛɛna munu zé nya. Éfraim munu lé tɛrɛ valé Samari munu lé tɛrɛ é dan kɛlɛ lɛ wozé nya, Yé Galaad tɛrɛ é dan kɛlɛ lɛ Bɛnjamɛn zé nya.

²⁰ Tɛrɛ lé é ke Kanaan munu zé nya, é dan kɛlɛ lɛ Izraɛl lé sunyanu lé wo ke luu gi, wozé nya, fɔɔ yé é bɔ Sarɛpita. Yé yirinwana bɛyilazia tɛrɛnu la flanu É dan kɛlɛ lɛ Jérusalɛm munu lé wo ke luu gi Séfarad, wozé nya.

²¹ Mi siéwegizannu é dan vɔ lɛ Siɔn gɔ nwiin, Ézau lé gɔ la munu lé weblele we ma; Yé Gakelebale é dan pla lɛ munu nwiin.