Abaku 3 - Kazambale lé Sebe Sauunu 1979

Abaku lé bazorole

¹ Balelayezan Abaku lé bazoro dére lo. (Lɛrɛvɔafɛ lé a balenu ke, ’wa gyɛ a va.)

² Gakelebale, we lé bé fe, maa ’ma, yé kana blɛn zén an gi. Gakelebaleoo, Gakelebale, ’i kɛlɛwenu lɛ sɔɔ lɛɛnu faa gi, ’Bé nagɔɔn lɛɛnu faa gi; Naa, dé i bli a flina, i nyanai zénle sele ’é dɔ i gi ma.

³ Bale si Téman; Mi Sauun si Paran gɔ nwiin. Ka ye do. Alé fua tɔbɔle éé lanu ta sɔɔlaan, Yé alé fuasan éé tɛrɛ faan.

⁴ É a bélé san bile zo; A san éé bɔraan a lee bélé yirisan zo, Ana lé alé plɛplɛ punsina ke.

⁵ Migyɛgyɛ éé tawoo a ’lɛ, Yé migyɛgyɛ éé tawoo a gane pa gi.

⁶ Éé dɔa; yé éé tɛrɛ daan é yuɛ nya, Éé bɛngɔnɔnu naginian, yé wo ma éé nyɔɔn‐an. Gɔnu lé wo lɛɛ ’ka lɛɛ va lo, woo ’wiié, Gɔpanénu lé wo namɔn, wo ta éé zanaan; Vinin la zinu éé plaan a ’lɛ.

⁷ Maa ye léé, Étiopi munu a kle blena Yé di kini Madian tɛrɛlamunu gi.

⁸ Gakelebale bli fli yuunu maa? Yuunu ma lé i bli flii? Wɛyi ma lé i wɛwɛ dɔ, Yé i vɔ ilé wisoonu ta, Yé i vɔ ilé guliwuovolɛ goro gii?

⁹ Ilé sa bɔra, Ilé sawɔlɛnu a balepamima dérenu nya. Ka ye do. I tɛrɛ fee gya yuunu yoro plale we ma.

¹⁰ Gɔnu a ye tɔɔn, yé wo ma nyɔɔn; ’Yiyoro plɛplɛnu éé goo vlan; Guru blɛn lé a wɔlɛ ma nyaana ’ka lo, a gi éé wé, Éé bɛnu nwaan loru.

¹¹ Ilé sawɔlɛnu lé wa bɔa, É valé ilé dinnu lé wo ta éé bié nyananyana, Wo san lé we ma lé yiri valé moné éé dɔa ’wolé zi ta.

¹² I giéan tɛrɛ faa la i wɛwɛ dɔle zi, I bɛngɔnɔnu wiian ilé bliflile gi.

¹³ I bɔra ilé munu sile we gi we ma, Ilé nyɔnɔ zénnwiinzan sile we gi we ma; I mi nyané lé kɔn béli so, Bé ’wiile sian tɛrɛ fɔɔ yé é bɔ loru. Ka ye do.

¹⁴ I ko nyanézannu nwiinzannu ’wuo fɔn‐o ilé sawɔlɛnu nya, Wo lé, woo vlanburuwo bélé fu plɛplɛ zo ko fwilale we ma, ’Té woo siaan ginanale nya Bélé fɛan zo lé wa wenaanébɔmazan wi blena tɛkɛ ’wo yɔɔna, a zo, woo lé.

¹⁵ I giéan ilé wisoonu nya wɛyi va, I ’yi blɛnnu lé voli zɔn‐o wo nya.

¹⁶ Maa ’ma, yé an bɔn gi kɛlɛ wɛwɛwɛ. An dére ’ko ’ma tɔɔn, an lɔlunu nyɔɔn, An wɔlɛnu éé yaan an gi, Yé an powuonu vo tɔɔtɔɔ. É a lé an we tɔntɔn bɔyi lɛbɛn an ta nya é dɔle, Yian nya lé yaamitazan é dan nwa lɛ yé é go guli dan migɔnɔnu ma, a yi nya.

¹⁷ Naa, bɔrɔyili ’ka dan é vwi bi lɛ é dɛrɛ lo, Dɔrɔféi ’ka dan we do baa lɛ lo, Wo ’ka dan ɔliviporo ye lɛ yili nwiin lo, Yé fɛ ’ka dan dɔ lɛ féinu ta lo; ’Blanu é dan san lɛ lublena, Yé dirinu ’ka dan kɛlɛ lɛ diriyiikɔn gi é dɛrɛ lo.

¹⁸ Naa, duowo, an gi é dan nana lɛ Gakelebale gi, An gi é dan nana lɛ an siéwegizan Bale gi.

¹⁹ Mizan Gakelebale ɛ ke anlé plɛplɛ nya, Éé an ganenu kɛla bélé vɔlɛ zé zo, Yé éé an kɛla tawozan nya loru. Lɛrɛvɔmunu nwiinzan zé lé. ’Wa vɔa lɛrɛvɔafɛ lé a bale ke, a va.