Abaku 2 - Kazambale lé Sebe Sauunu 1979

Gakelebale a zi pa

¹ Maa a é dɔle an dɔna, ’té maa a é dɔle flataginifɛ ta; maa vo é yuɛma, we lé Gakelebale é dan a fe lɛ an lɛ, yé maa ’ma, yé bɛan zo lé maa dan a zi pa lɛ anlé we vinin fele zuo, yé maa dɔɔ.

² Gakelebale lé an lɛ léma: ’I balelawe ’ko gyɛ, bé guru vɔ gɔlɛfee ta, léé, wa ta fe tegele.

³ Naa, é a balelawe lé a lɛsɔɔbléyi ke é dɔle é kyɛn, a nya; é a bɔna a ’wuoplana sɔnɔ, yé é ’ka dan vié wo lɛ lo. Dé é a mɔnna, bé tabɛn, naa, a lɛ é dan sɔɔ lɛ weboen nya.

⁴ Bé ye, é blii boblɛn nya; a bli ’ka tegele lo. Naa, mi tegele éé voo é yuɛma élé blipale ma.

⁵ Boblɛnzan ’ka nyanaan flee lo; é a bélé mi lé nwɛ a gyɛ, ’té éé dére blɛnblɛnnu fé, a zo. Éé ’léé siélaan bélé mivun lɛ sole zo. É a bélé gale zo, é ’ka kaan pelo. Éé bɛngɔnɔnu faa ganaan ’é va, éé migɔnɔ faa zén‐é ékeva é punma.

⁶ Munu faa ’ka dan alé we fe lɛ gi la loo? É ’ka dan kɛlɛ lɛ yérisiéamazan valé wegɔnévɔmazan nya loo? Wo dan a fe lɛ léé: Mi lé éé mi bɛ lé fɛ zun dɔa é va bɛ, we tɔntɔn ’é bɔ ’bɛzan ma ma. ’Bɛ é dan nyaa lɛ bléyi kyɛn vaa? Mi lé éé vɛɛn taa sié yé a gi vɛɛn bo é bɔ bɛ, we tɔntɔn ’é bɔ ’bɛzan ma ma.

⁷ Ilé vɛɛnzannu ’ka dan nwa lɛ i ma trɔnné va loo? Munu lé wo dan yaa lɛ i ta, wo ’ka dan vuo lɛ loo? Yé i dan kɛlɛ lɛ wo gyɛwi nya.

⁸ Naa, i ’wii bɛngɔnɔ kiɛre ta, amalé migɔnɔ pɔnénu é dan ’wii lɛ i ta. Naa, i munu nyɛ zana, yé i glawe kɛlɛ tɛrɛ ’ko la flanu valé wotazannu lɛ, azama.

⁹ Mi lé éé weple ma fɛnu tééan ébo zé nya, léé, é nyanana ’é kɛlɛ loru abo sile wenaané lee we ma bɛ, we tɔntɔn ’é bɔ ’bɛzan ma ma.

¹⁰ Migɔnɔ kiɛre kulu gale ma lé ilé kɔn kɛlɛ serelebomafɛ nya, yé biibozen lɛ lé i wenyané ’ko kɛlɛ.

¹¹ Naa, gɔlɛ éé siaan kɔnguru gi, yé kɔngwa yili a zi paan a lɛ.

¹² Mi lé éé fla paan mi nyɛ zanale nya, ’té éé fla yuɛ vɔa weple nya bɛ, we tɔntɔn ’é bɔ ’bɛzan ma ma.

¹³ Bé ye, dé é a lai sunyanu lé Gakelebale bligiwe nya, ’té migɔnɔnu a nyanama pana kyɛ zé nya, ’té bɛngɔnɔnu a ’wo wɔlɛgi nyaana é pla.

¹⁴ Naa, Gakelebale lé fuatɔ dɔɔle é dan fan lɛ tɛrɛ la bélé wɛyi a é fanle fɛan zo, a zo.

¹⁵ Mi lé éé dɔrɔ no é bɔluzan lɛ, bii lé i dɔrɔ tɔa mi gyɛle dɔrɔ nya we ma, léé, ’é a porole ye, we tɔntɔn ’é bɔ i ma ma.

¹⁶ Yara lé i gyɛle é dan mini lɛ i tɔbɔle ta; bii é ziin, ’bé mini, yé ’ibo poro. ’Yiminikana lé é ke Gakelebale bɛyi lee bɛ, a minile é dan bɔ lɛ i ta, yé yaragyɛwe é dan ilé tɔbɔwe gi tiri dɔ lɛ.

¹⁷ Naa, glawenu lé bé kɛlɛ Liban tɛrɛ lɛ, wo dan nɔla lɛ i ta, yé winu kulu gale é dan di kini lɛ i gi; naa, i munu nyɛ zana, yé i glawe kɛlɛ tɛrɛ ’ko la, fla valé é tamunu ma, azama.

¹⁸ Miyili nyaale tɔnɔ a mɛ fɛ nya yé nyanamapazan a nyaan? Yé fɛfoto selele lé éé viéwe paan mi gi, ’bɛ é mɛ we nyian wo mi ma, yé nyanamapazan lé é a sele bɛ, yé éé paan a taa? dɔlé ’té é a bobogyɛ miyilinu ɛ kɛlɛna bɛ.

¹⁹ Mi lé é a fé yili lɛ léé: ’I nwa, ’té éé a fé bobogyɛ gɔlɛ lɛ léé, ’i vuo bɛ, we tɔntɔn ’é kɛlɛ ’bɛzan lɛ ma. É dan we paa lɛ mi gii? Bé ye, a nyɔɔ a é gyɛle kyan valé gɔɔlifu nya, naa, léli lé é fɛ vo é yuɛma, ’bɛ ’ka a gi lo.

²⁰ Gakelebale a élé kɔn sauun gi; tɛrɛ faa ’é tadɔ a ’lɛ ma.