Abaku 1 - Kazambale lé Sebe Sauunu 1979

¹ Mi mawe lé Bale a nagɔɔn balelayezan Abaku lɛ, yee lé ke ’ko.

Abaku gun gyɛ Bale lɛ

² Gakelebaleoo, Gakelebale! Gɔnɔ nɔ nya lé an siaa i lɛ yé i ’ka i tɔné dɔ lɛ an lɛ loo? Wa glawe kɛlɛna an lɛ, amalé an siaa, yé i ’ka bɔ lɛ an va lo.

³ Mɛmalé bé kɛlɛ léé, maa weple ye, yé we lé é ’ka tegele lo, mɛmalé i yuɛ vɔ a taa? Mɛmalé yaale mi ta valé glawe kɛlɛle a an yuɛ gii? Wa zɔdɔna, ’té zavɔle éé nwaan munu méléna.

⁴ Yé é ziin, bélidɔwe ’lɛ ’ka lo, yé plɛplɛ ’ka we tegele lee lo; naa, mi nyané éé mi tegele keleé, yé woo wenu blé é ple nya.

Gakelebale a zi pa

⁵ Bale lé élé munu lɛ léé: ’Ka yuɛ vɔ bɛngɔnɔnu ta yé ’ka wo nagini, yé ka gi ’é vuru ka ma, yé di ’é kini ka gi. Naa, maa dan we do kɛlɛ lɛ kazé bléyi va; we lé, dé wana glewo kɔɔn, ka ’ka bli paan a lɛ lo, yee lé.

⁶ Ka ye, maa dan Kaldé munu nwa lɛ ka ma; wa bɛn wɛwɛzan valé ’wiié we ta bɛn nya; woo tɛrɛ blɛn kinié, nyanananu lé wo ’ka ’wozé nya lo, ana sile we ma.

⁷ Wa di kinié mi gi bɛn valé kanama bɛn nya; woo we kɛla wobo lé plɛplɛ nya, mi do kpen ’ka we dɔnama fé wo lɛ lo.

⁸ Wolé wisoonu lé vlanburule é mini kuanu zé ta, yé wo ta kelekele mini nyanadi glaunu ta. Alé wisootazannu éé giéan boblɛn saa nya; alé wisootazannu si baa, woo sié bélé gola lé é ke baana é gyɛwi ta, a zo.

⁹ Munu ’konu faa a dana ’wiile fɛ la we ma; wo yuɛnu éé vɔa ’wo ’lɛzia fɛyelɔrɔ saa nya, yé munu lé wo wo kun guli ma, woo wo tééan bélé nyéné zo.

¹⁰ Woo we nanaan minwiinzan blɛnnu ma, yé minwiinzannu ɛ ke wolé yérisiémazannu nya. Woo yéri sié kɔn plɛplɛnu faa ma; woo tɛrɛ zun dɔa wo ma yé woo wo sié ’wozé nya.

¹¹ Woo fuu taa éé dɔa wo ta; woo tawoo ’wo ’lɛzia yé wobo kɛla wegyɛzannu nya. Wolé plɛplɛ ɛ ke ’wolé bale nya.

Abaku ézé fe é ziin

¹² Gakelebale, anlé Bale sauun, bian i lɛɛ ’ka lɛɛnu va lo loo? Ko ’ka dan ga lɛ lo. Gakelebaleoo, Gakelebale, i bɛn ’ko dɔ i déretawe kɛlɛzannu nya ilé munu ma. Anlé Gɔlɛgɔ, i bɛn ’ko nwa wo kɛlɛle ilé we lɛdɔ migizannu nya we ma.

¹³ Bii a sauun fɛan zo, i yuɛ ’ka vɔa wenaané ta lo, yé i ’ka bɔa weple naginile lɛ lo. Mɛmalé i dabli kɛlɛ munu yé, yé i ta é vo é dɔlee? Yé dé mi nyané a mi zin sɛrɛna, yé i ’ka a siéla loo?

¹⁴ I dan we kɛlɛ lɛ munu lɛ bélé wɛyi va pɔ zoo? Bélé tawoplɛlawinu lé wozan ’ka lo, wo zoo?

¹⁵ Wo nyanézan éé wo faa gya kɔ nya; éé wo ganaan élé séli nya. Éé wo zén‐é ékeva élé duɛ gi, ’té a gi éé nanaan, ’té a gi a drɔɔ.

¹⁶ Amalé éé saraka boo élé séli lɛ, yé éé lasikɔrɔ kyɛ blé élé duɛnu lɛ. Naa, wolé we ma lé éé fɛ nyɔnɔzan blé, ’té alé fɛ a néné.

¹⁷ Bɛwemalé é dan élé séli vo lɛ é koro nyaa? ’Té éé bɛngɔnɔnu bɔrɔ boo yifaama, ’té a nyanai ’ka zén‐é wo ta loo?