3 Jan 1 - Kazambale lé Sebe Sauunu 1979

Weale lé

¹ An béé wezan Gaius lé i sɔ an lɛ webozen nya, an we i va. Maa, léglizi gi mi segele, maa ɛ ke sɛbɛ ’ko pana i lɛ zia.

² An béé zin, é sɔ an lɛ léé, i bɛ ma ’é kɛlɛ néné we faa gi yé i ma ’é bɔ bélé fɛan zo lé i boen fuu ke é ta, a zo.

³ Bwenu da aan wo, webozen lé é ke i gi, é valé tawobɛ lé i ke tawona a nya webozen nya, wa fe aan wo ko lɛ, é an gi nana é baba.

⁴ Dé maa a ’mana léé, anlé nénu a tawona webozen yɛrama, we lé é an gi nana yé é mini ’bɛ ta, ’bɛ ’ka lo.

É Gaius bɔ vɔ alé bɛnnu sile we ma

⁵ An béé zin, i a bwenu mawe kɛlɛna yarapalale nya, dɔlé ’té i ’ka wo dɔɔ lɛ é kyɛn lo.

⁶ Yé wo ilé mi lɔrɔpale lé we fe kolé léglizi gi ’ko. Dé i tawofɛ nɔ wo lɛ Kazambale lé we kɛlɛbɛ yɛrama, ’té ’bɛ a é zima. I bɔ.

⁷ Jézu Krist tɔ lé we ma lé wo go, yé wo ’ka fɛ do kpen si lɛ yolémunu lee lo.

⁸ Webozen lé we ma, é a lé kaa munu ’ko zoɛnu bɛn si, kaa kɛlɛle wolé nyanama pa béénu nya we gi.

Diotrɛf dɔ wo ma plɛplɛ

⁹ Maa dére sɛ gyɛ sɛbɛ gi léglizigimunu zé nya, naa, Diotrɛf lé, é sɔ a lɛ léé, ’é kɛlɛ mi vininzan nya wo va, ko ’ka a yuɛ gi bɔ lɛ lo.

¹⁰ Bɛwemalé, dé an da, wenu lé é wo kɛlɛ, wo sele é dan dɔ lɛ an gi. É boawe naané fe ko ma, yé ’bɛ ’ka a gi bɔ lɛ lo; é ’ka bwenu bɛn si lɛ lo, yé munu lé é sɔ ’bɛnu lɛ léé, ’wo wo bɛn si, é a yi ga ’bɛnu lee, yé é wo bɔra léglizi gi.

Démétrius ma we zin fele

¹¹ An béé zin, té i wenyané zuosona lo, naa, ’i wezin ɛ zuosona ma. Mian éé wezin kɛla, é a Kazambale zé nya; mian éé wenaané kɛla, é ’ka Kazambale ye lɛ lo.

¹² Munu faa koo, wezen bozen koo, woo Démétrius ma we zin fé. Ko é ziin, ko a a ma we zin fena, yé bii a gi dɔɔ léé, we lé ko ke a fena a ma, é a webozen nya.

Weale voéla

¹³ É sɔ an lɛ léé, an we kiɛre fe i lɛ, naa, é ’ka sɔ lɛ an lɛ léé, maa wo gyɛ nankréyi valé sɛbɛgyɛyili nya lo.

¹⁴ An bli a a lɛ léé, maa i ye é kele, yé ko we fe ko ke yara.

¹⁵ ’I vo drɔɔ ma. Béénu we i va. An we béénu faa va do do ma.