2 Timoté 4 - Kazambale lé Sebe Sauunu 1979

¹ Kazambale valé Jézu Krist lé é dan mi galenu valé mi yuɛmalenu lé we ble lɛ bɛ, ko a wo ’lɛ; maa lé i lɛ Jézu dale valé a plale mi nwiin tɔ gi léé,

² ’i Kazambale dére fe; ’i dɔ a ta plɛplɛ bléyi faa va, dé é a bléyi zin nyaoo, dé é ’ka a nya looo, ’i dɔ a ta plɛplɛ; ’i we vɔ munu lɛ, ’i we pla wo lɛ, ’i kwa kuli wo ma. ’Bé kɛlɛ bli tiéé nya, ’té i we paan wo gi yifaama.

³ Naa, bléyi do é dan bɔ lɛ yé munu ’ka dan a nyi si lɛ léé, wo we tegele paa ’wo gi lo. Wo dan go lɛ ’wo sɔlɛwe zuo, yé wo dan mi kiɛre kiɛre si lɛ we paa ’wogizannu nya, wo sɔlɛ wenéné fele wo lɛ we gi.

⁴ Wo dan ’wo tɔné si lɛ wezen ’male ta, yé wo dan ’wo tɔné dɔ lɛ fiinvɔlenu lɛ.

⁵ Naa, Timoté, é a lé ibo kun we faa gi; ’i dɔ kleblelenu wuo; ’i wenéné fe, ’ilé nyanama pale lɛ sɔɔ é zima ma.

⁶ Naa, maa, an kɛlɛ saraka nya é kwakwa, yé an gobléyi bɔ é pu.

⁷ An guli zin dan; maa anlé za kɛlɛle lɛ sɔɔ; an bli vo Kazambale lɛ.

⁸ Yé sin, mi tegele lé tɔkoro ta a é dɔle anzé nya. Mizan, Weblezan tegele, é dan a nɔ lɛ an lɛ ’bɛ yi la. Naa, an do lɛan é dan a nɔ lɛ lo; munu faa lé, a dale sɔ wo lɛ, é dan a nɔ lɛ wo lɛ é ziin.

Pɔl é ma wenu fe Timoté lɛ

⁹ ’Ibo tunu, ’i da an va é kele.

¹⁰ Tɛrɛ ’ko la wenu sɔ Démas lɛ, amalé é si an va yé é go Tɛsalɔnik; Krésans go Galasi tɛrɛ la, yé Tite go Dalmasi tɛrɛ la.

¹¹ Luk do kpen ɛ vo an va. ’I Maak laa, ’ka da a nya an va; alé nyanama pale an va tɔnɔ a.

¹² An Tisik pa zia Éfɛz.

¹³ Dé i a dana, varɔ lé maa a vo Troas, Kaapu va, yee koo, sɛbɛpanu koo, sɛbɛgyɛtakɔlɛnu koo, ’i da wo nya; naa, sɛbɛgyɛtakɔlɛ do ’kyɛ lɛ, té i gi é san ’bɛ ma monomono lo.

¹⁴ Folibozan Alézandre wenaané kɛlɛ an lɛ kiɛre. Mizan é dan a lɛgi pa lɛ a ma a kɛlɛwenu yɛrama:

¹⁵ É dɔ ko dérenu ma plɛplɛ; amalé ’i yuɛ pa ibo va alé we ma é ziin.

¹⁶ Anlé we sina an nwiin vinin na, mi do kpen ’ka bɔ lɛ an va lo; wo faa si an va. Té Bale é we ’ko dɔ wo nwiin lo ma.

¹⁷ Mizan ɛ bɔ an va, yé é an dɔ plɛplɛ anlé wefele lɛsɔɔle we ma, bɛnnu faa lé a ’male we gi. Yé Bale an si golizra lɔ ma.

¹⁸ Mizan é dan an si lɛ wenaanénu faa wuo, yé é dan an béli lɛ, yé é dan go lɛ an nya élé lagi fuatɛrɛ la. ’Wa tɔ bɔ lɛɛfaama ma. Amɛɛn.

Weale voéla

¹⁹ An we Prisil valé Akilas va, an we Onézifɔɔ lé munu va.

²⁰ Éras vo Korɛnt, yé maa Trofim vo Milɛ gyɛ nya é ma.

²¹ ’Ibo tunu yé i da dunubléyi ’lɛ. Yubulu koo, Pudan koo, Linus koo, Klodia koo, bwenu faa koo, wo we i va.

²² Mizan ’é vo i léli va ma. Bale ’é ka drɔɔ vo ma. Amɛɛn.