2 Timoté 3 - Kazambale lé Sebe Sauunu 1979

Bléyi voéla gimunu lé we

¹ ’I we ’ko dɔɔ ma: yi voélanu gi, bléyi tɔntɔn é dan bɔ lɛ.

² Naa, munu é dan kɛlɛ lɛ wobosɔlɛzannu koo, gɔɔlisɔlɛzannu koo, weblɛnblɛn fezannu koo, boblɛnzannu koo, Bale sɔnɔzannu koo, tɔnégiplɛplɛzannu nya wo tinu valé wo bunu ma koo, zindɔɔalozannu koo, Bale lé zi sɔnɔzannu koo, wo nya;

³ Wo dan kɛlɛ lɛ mi mawe dɔɔalozannu koo, bliflimi?-?mazannu koo, mi tɔ sɛrɛzannu koo, glawe kɛlɛzannu koo, gi pɔnpɔnzannu koo, mi zinnu nyanézannu koo, wo nya;

⁴ wo dan mi liwo lɛ; wo dan ’wii lɛ we la; wo dan blii lɛ boblɛn nya; wobozen ginanawe ɛ dan sɔ lɛ wo lɛ yé ’bɛ é mini Bale sɔle wo lɛ ta;

⁵ wo dan wobo kɛlɛ lɛ bélé Kazambale lé zi sɔlɛzannu zo, naa, wo giégane ɛ dan a gɔɔn lɛ léé, vié lé. ’I si ’bɛ zo munu ma baa.

⁶ Wo va mi kenu éé wɔraan kɔnnu gi nuu, yé tavolomu lé wo ke é fanle wenyané nya, ’té wenaané gɔnɔ faa lɔrɔ éé wo nyunuan bɛ, woo wo sian ana.

⁷ Wa we draanna yifaama, yé wo ’ka bɔna webozen dɔɔle lɛ monomono lo.

⁸ Fɛan zo lé Janɛs valé Jambrɛs dɔ Moizi ma plɛplɛ, a zo duo lé munu ’ko éé dɔa webozen ma plɛplɛ. Wa é vɔnle we ’male gi, wo ’ka mi nya blipale lé we vazia lo.

⁹ Naa, wolé we ’ka dan vɔ lɛ a ma lo, yé munu faa é dan wo ye lɛ ’tugyɛzannu nya, bélé fɛan zo lé wo Janɛs valé Jambrɛs ye ’tugyɛzannu nya, a zo.

We voéla lé Pɔl a pla Timoté lɛ

^10-11 Naa, anlé wepaale koo, an giébɛ koo, an yuɛgi do koo, anlé blipale koo, an bli tiéé koo, anlé sɔlɛle koo, an yara pale we ta koo, anlé kleblelenu valé anlé nyanéblelenu koo, bii ɛ gi dɔɔ é zima. Nyané kyɛn lé maa ’ka a ble lɛ Antiɔs koo, Ikonium koo, Lisitre koo, wona loo? Kle kyɛn lé an ’ka an ’wuo dɔ lɛ a wuo loo? Naa, Mizan an si wo faa gi.

¹² Naa, munu faa lé é sɔ wo lɛ léé, ’wo tawo Kazambale lé zi ta tegele Jézu Krist gi, munu é dan nyané pa lɛ wo ta.

¹³ Naa, mi lɛrɛlɛrɛnu valé mi tablezannu lé wenyané kɛlɛle gi é dan gyɛ lɛ yifaama; ’té woo dabli kɛla mi bɛnu lɛ, ’té wa kɛla wobozen lɛ é ziin.

¹⁴ Wenu lé wa paa i gi yé i dɔ wo ta bɛ, é a lé i wo kun i bɛ fié nya. Munuan bé ’ma wo ta, i wo dɔɔ.

¹⁵ É sia i kiéné la bléyi va fɔɔ kyɔ, Kazambale lé sɛbɛ sauunnu lé wo bɔalɛ léé, wo i kɛlɛ wedɔɔzan nya yé i si we gi blivole nya Jézu Krist lɛ bɛ, i wo dɔɔ.

¹⁶ Kazambale lé sɛbɛ faa si Kazambale va yé a tɔnɔ a; éé we paan mi gi yé éé mi gya we nya; éé mi drɔan, yé éé kɛlɛle tegele lé we paan munu gi,

¹⁷ Kazambale lé mi kɛlɛle wéiin we gi, ’té a ma a é ’lɛrɛle wezin faa kɛlɛle we ma.