2 Timoté 2 - Kazambale lé Sebe Sauunu 1979

Kɛlɛle Jézu Krist lé sunya zin nya

¹ Bɛwemalé, bii anlé né, zin lé ke Jézu Krist gi, ’é i dɔ plɛplɛ ma.

² Yé we lé bé ’ma an ta wenayemunu kiɛre yuɛ va bɛ, ’bé bɛ pa yarapawelazannu lee, munu lé woo bɔa a paale lɛ mi bɛnu gi, wo lee.

³ ’I nyané ble an va bélé Jézu Krist lé sunya zin zo.

⁴ Sunya ’ka vɔɔma tɛrɛlawenu gi lo, ’té dé é sɔ a lɛ léé, élé we é sɔ é nwiinzan lɛ.

⁵ Dé zakɛlɛzan ’ka za kɛlɛ lɛ é kɛlɛbɛ gi lo, wo ’ka tɔkoro wɔraan a ’wuo ma lo.

⁶ Féipazan lé éé nyanama paan, é a lé yee lé é fɛ si élé féi é vinin.

⁷ We lé maa a fena i lɛ, ’bé bɔrɔ i bɔn‐in, yé Mizan é dan we faa ginin dɔ lɛ i gi.

⁸ Jézu Krist lé wa yaa David kululazan nya, yé é nwa gamunu va Wenéné lé maa alé we fé, a yɛrama, a sele ’é dɔ i gi ma.

⁹ An nyané ble alé we ma fɔɔ yé wo an yere bélé wenyanékɛlɛzan zo. Naa, Kazambale dére ’ka é yerele lo.

¹⁰ Bɛwemalé an ’wuo dɔa we faa wuo munu lé Bale wo si a va, wolé we ma, léé, sile we gi lé é ke Jézu Krist gi, é valé fua lé é ’ka nyaan lo, wo é ziin, ’wa ye.

¹¹ We ’ko a wegɔné nya: dé ko ga a va, ko dan nwa lɛ é ziin é yuɛma a va;

¹² dé ko yara pa alé we kɛlɛle ta, ko dan pla lɛ munu nwiin a va; dé ko sɔn vɔ a ma, yee é ziin, é dan sɔn vɔ lɛ ko ma.

¹³ Dé ko yuɛgi blan a ma, a yuɛgi ’ka blaan ko ma lo, naa, é ’ka bɔaléé, é sɔn vɔ ébozen ma lo, azama.

Nyanamapazan lé wa gi dan

¹⁴ ’I we ’ko sele dɔ munu gi, we plale wo lɛ plɛplɛ nya Kazambale yara léé, té wo zavɔ dére gɔ do do ta lo. A tɔnɔ ’ka lo, yé munu lé wa maan, éé wo ’wuo sɛra.

¹⁵ ’I kwa kuli ibo ma dɔle Kazambale ’lɛ we ma, mian wa gi dan, a nya, nyanamapazan lé yara ’ka a gya lo, ’té éé webozen dére fé tegeleee, a nya.

¹⁶ ’I paa tɛrɛla boawenu fele ma, naa, munu lé woo wo fé, wolé Kazambale lé zi sɔnɔwe gi é dan gyɛ lɛ yifaama,

¹⁷ yé wo dére é dan nwɛɛn lɛ bélé migyɛgyɛ zo. Iméné valé Filɛt a munu ’konu vamunu nya.

¹⁸ Wo yara si webozen ta, yé wo léé, mi galenu nwa é kwakwa, yé wo mi kenu lé blipale gi sɛrɛ.

¹⁹ Kazambale lé wegane a é vɔle gligli duowo; naa, a dɔgligli dérenu lé ke ’ko: munu lé wo ke Mizan zé nya, é wo dɔɔ; yé mian éé Mizan tɔ laan, ’é daan weple ma ma.

²⁰ Kɔn blɛn gi, kyanbɔ valé gɔɔlifu?-?bɔ saa‐an ke ana lo, naa, yili lé wa nyaa bɔ nya, yee valé tɛrɛbɔ ana é ziin. A kenu a tɔbɔbɔnu nya, yé a pɔnénu a fɛ lɛrɛlɛrɛ zén‐agibɔnu nya.

²¹ Bɛwemalé, wenaanénu lé maa wo zuo fe bɛ, dé mian é wo si é gi yé a gi bɔ, é dan kɛlɛ lɛ bélé tɔbɔbɔ sauun zo, yé azan é dan tɔnɔ ye lɛ a ma, ’té é bɔalɛ léé, é nyanama zin faa pa a nya.

²² Wenu lé a lɔrɔ éé pɛniɛnu gya kaii bɛ, té wo lɔrɔ i gyɛ lo. Kɛlɛle tegele koo, blipale koo, sɔlɛle koo, vole drɔɔ koo, munu lé woo Mizan tɔ laan wo bɔn gi fu nya, wa kwa kulina wo yele we ma. ’I pa wo va yé ’ka kwa kuli wo nya.

²³ Zavɔwe planu lé é ke tavowenu nya bɛ, ’i sɔn vɔ wo ma. Bé gi dɔɔ léé, woo ɛ dan wesialenu nya.

²⁴ Naa, té Mizan wuozan é we sia lo. ’É kɛlɛ blidrɔɔzan nya mi faa va ma. É a lé é kɛlɛ mi lé éé we paan munu gi é zua, a nya; a bli ’é kɛlɛ tiéé ma.

²⁵ Munu lé woo za vɔa a lɔ ma, é a lé é we pla wo lɛ bli drɔɔ nya, ’té a bli a a lɛ léé, Kazambale é dan wo bli nɔla lɛ yé wo webozen dɔɔ,

²⁶ yé dé wo ’wuo dɔ wo ta, yonufaatagɔné lé é wo kun wo plale élé blibɔmawe wuo we ma bɛ, yé wo si alé mikunsannu ’léé.