2 Timoté 1 - Kazambale lé Sebe Sauunu 1979

Weale lé

¹ Maa Pɔl ɛ ke sɛbɛ ’ko gyɛna Timoté zé nya. Maa a Jézu Krist lé nwunvɔzan nya Kazambale lé blibɔmawe nya, we lé Bale a fe léé, mi éé bélié Jézu Krist gi, a fele we ma.

² Bii Timoté lé i ke an sɔlɛné nya, an we i va. Tibale valé Kaazan Jézu Krist ’wo zin kɛlɛ i lɛ ma, yé wo nyanai ’é zén i ta ma, yé ’wo i vo drɔɔ ma.

Té yara i gyɛ lo

³ Bale lé an tranu a bɔ, yee lé maa a bɔa wo pa gi, ’té anlé wevasibli ’ka we dɔa an nwiin lo. Maa yee Bale bɔ vɔa bladi nyanadi yé an ’ka daan i ma bazorole ma lo;

⁴ naa, i yuɛyi sele a an gi, ’té i lɔrɔ an gya, yé dé maa i ye yian ma an dan fan lɛ gi nanale nya;

⁵ i blipale tegele sele a an gi. I bu Yunis valé ’bɛ bu Lois bli a é pale tegele é vinin, yé é dɔ an gi léé, i bli a é pale yee duo ɛ zo é ziin.

⁶ Bɛwemalé an we plaan i lɛ léé, Kazambale lé blɛ lé é a kɛlɛ i lɛ an bɛnu plale i ta nya bɛ, bé kyɛ dɔ é ziin.

⁷ Kazambale ’ka kanabli vɔ lɛ kaa gi lo, naa, plɛplɛ koo, sɔlɛle koo, bo?-?kunle koo, a bli lé é a vɔ kaa gi.

⁸ Bɛwemalé té yara i gyɛ Kaazan lé we fele ma monomono lo; té yara i gyɛ maa alé bokɔngizan lé we ma lo. Naa, ’i nyané ble an va Wenéné lé we ma Kazambale lé plɛplɛ nya ma.

⁹ Yee ɛ ko si we gi, yé é ko laa léé, kobo nɔ é lɛ. É ’ka ko laa lɛ ko kɛlɛwenu lé we ma lo, naa, é ko laa ébozen bɔn‐inwe yɛrama, é valé zin lé é a kɛlɛ ko lɛ Jézu Krist gi bléyian va lé tɛrɛ ’ka tan é bɔrale lo, a yɛrama.

¹⁰ Zin lé é a kɛlɛ ko lɛ, wa ye sin ko Siéwegizan Jézu Krist dale nya. Yee ɛ ga kulu ga, yé bélile valé vole é yuɛma lé a glɛ ’ka lo, é wo gɔɔn munu lɛ Wenéné nya.

¹¹ Kazambale an dɔ nwunvɔzan nya Wenéné ’ko lé we ma yé é an dɔ a fezan valé a paamigizan nya.

¹² Amalé maa a nyané ’konu blena, naa, yara ’ka an gyɛna lo. Mi lé an bli ke a lɛ, maa azan dɔɔ, yé maa a gi dɔɔ léé, we lé maa a bɛ pa a lee, é bɔalɛ léé, é yuɛ pa a va fɔɔ yé ’bɛ yi é bɔ. Bɛwemalé yara ’ka an gya lo.

¹³ Wezinnu lé maa wo paa i gi bɛ, ’i yara pa wo ta tawole ta blipale valé sɔlɛle lé i wo ye Jézu Krist va, a nya.

¹⁴ Wezin lé maa a bɛ pa i lee, ’bé pa i ’wuo gi é zima Léli Sauun lé é ke kaa gi, a bɔle i va nya.

¹⁵ Bé gi dɔɔ léé, munu lé wo ke Azi tɛrɛ la, wo faa si an va; Fijɛl valé Emɔjɛne a wo va mi fié nya.

¹⁶ Mizan nyanai ’é zén Onézifɔɔ lé kɔngimunu ta ma; é an tɔrɔ paa gɔnɔ kiɛre nya, yé yara ’ka a gyɛ lɛ an yeregɔgɔbalenu lé we ma lo, azama.

¹⁷ Naa, é da aan wo Rom, é an gini fɔɔ yé é an ye.

¹⁸ Amalé dé Mizan lé yi blɛn bɔ, Mizan ’é zin kɛlɛ a lɛ é nyanai zénle a ta nya ma. An mawenu lé é a kɛlɛ Éfɛz, bii ɛ gi dɔɔ é zima é mini mi bɛnu lɛ.