2 Samuɛl 9 - Kazambale lé Sebe Sauunu 1979

David zin kɛlɛ Jonatan be lɛ

¹ David léé: Saul lé kɔngimi do vo é ziin yé maa we zin kɛlɛ a lɛ Jonatan lé we maa?

² Saul lé munu wuozan do ana, wa laama Siba, yé wo da a nya David va. Yé minwiinzan lé a lɛ léé: Bii ɛ ke Siba nyaa? Yé é a zi pa léé: I wuozan lé.

³ Yé minwiinzan léé: Saul lé kɔngimi do kpen ’ka ana é ziin yé an zin kɛlɛ a lɛ Bale lé we ma loo? Yé Siba a zi pa minwiinzan lɛ léé: Jonatan be do ana é ziin, ganesuruzan nya.

⁴ Minwiinzan lé a lɛ léé: É a kyɛɛn? Yé Siba a zi pa minwiinzan lɛ léé: É a Amiɛl be Makii lé kɔn ’léé Lodébaa.

⁵ Minwiinzan blɛn David mi pa zia Jonatan be laana Amiɛl be Makii lé kɔn’léé Lodébaa.

⁶ Saul be Jonatan be Méfibosɛt da David va, yé é ’wuo tua a lɛ yé é dia a ’lɛ. Yé David léé: Méfibosɛt. Yé é léé: I wuozan lo.

⁷ David lé a lɛ léé: Té i kana lo; naa, maa a a va léé, an wezin kɛlɛ i lɛ i ti Jonatan lé we ma. An dan i tra Saul lé tɛrɛnu faa nɔ lɛ i lɛ é ziin, yé i dan fɛ ble lɛ yifaama anlé kɔn ’léé.

⁸ Yé é dia é bli la a ’lɛ yé é léé: I wuozan a mɛ fɛ nya yé maa lé an ke bélé blén gale zo yé i yuɛ vɔ an taa?

⁹ Yé Minwiinzan David Saul wuozan Siba laa, yé é lé a lɛ léé: Fɛnu faa lé é ke Saul valé alé kɔngimunu faa zé nya, maa a nɔ izan be lɛ.

¹⁰ Bii koo, i benu koo, i wuozannu koo, ’ka féi pa azé nya; yé i féifɛnu gyɛ, izan be lé fɛblele yele we ma, yé izan be Méfibosɛt é dan fɛ ble lɛ anlé kɔn ’léé yifaama. ’Té Siba benu a vu ta soru yé a wuozannu a yɔ do.

¹¹ Yé Siba lé minwiinzan lɛ léé: We faa lé anzan minwiinzan a fe é wuozan lɛ, a wuozan é dan a kɛlɛ lɛ. Yé Méfibosɛt éé fɛ blé David lé tablé ta bélé a be do zo.

¹² Méfibosɛt be boroné do ana, wa laama Mika. Yé munu faa lé woo nyanaan Siba lé kɔn ’léé, wa Méfibosɛt wuozannu nya.

¹³ Méfibosɛt éé nyanaan Jérusalɛm, naa éé fɛ blé yifaama minwiinzan lé kɔn ’léé. Yé a gane fié a é surule.