2 Samuɛl 8 - Kazambale lé Sebe Sauunu 1979

Guliwuonu vo David lɛ é ziin

¹ ’Bɛ zuo David guli dan Filisitinu va yé alé guli bɛ mini wo ta yé é wolé fla blɛn tɔ ga.

² É guli dan Moab munu va yé é wo yia tɛrɛ va yé é bawɔrɔ dan wo yiale ’léé ma; é bawɔrɔ nya fié munu gyɛ yé é bawɔrɔ nya do munu vo é yuɛma. Yé Moabnu pla David wuo, ’té woo gɔɔli banwoo a lɛ.

³ David guli dan Tesoba nwiinzan Réob be Adadézɛɛ va, bléyian va lé ’bɛ a gona Yufrat yuu kɛlɛ lɛ ézé nya é ziin, a bléyi va.

⁴ David wisoo ta sunyanu wuru sɔraa yɔ soru valé ganela sunyanu baa vu si a lee; yé é goro gana wisoonu gane zuo miinnu bɔi yé é wisoo yɔ soru vo goro ganale we ma.

⁵ Damas Siri munu da bɔ lɛ Tesoba nwiinzan Adadézɛɛ va aan wo, David Siri munu gyɛ baa vu ta do.

⁶ Yé David sunyanu nyana Damas, Siri tɛrɛ la. Yé Sirimunu pla David wuo ’té woo gɔɔli banwoo a lɛ. Dé David go fɛofɛana, Gakelebale a takuun‐an.

⁷ Adadézɛɛ lé munu lé botakuunfɛnu lé wa kɛlɛ kyan nya, David wo si yé é go wo nya Jérusalɛm.

⁸ Yé é ziin, minwiinzan David zéné kiɛre si Adadézɛɛ lé fla fié Bétak valé Bérotai ta.

⁹ Amat nwiinzan Toi a ’ma aan wo léé, David Adadézɛɛ lé sunyanu kele,

¹⁰ é é be Joram nwunvɔ David va, wele a va we gi, a bɔvɔle we ma léé, é guli dan Adadézɛɛ va yé é ’bɛ kele. Naa, guli a Toi valé Adadézɛɛ méléna é kyɛn. Joram go gɔɔlifubɔnu koo, kyanbɔnu koo, zénébɔnu koo, wo nya é lee.

^11-12 Minwiinzan David wo pa é yɛrama Gakelebale zé nya bélé a kɛlɛbɛ kyɛn zo. Siri koo, Moab koo, Amɔn benu koo, Filisitinu koo, Amalɛk koo, Tesoba nwiinzan Réob be Adadézɛɛ koo, é wo kele yé é kyan valé gɔɔlifu si wo lee yé é wo pa é yɛrama Gakelebale zé nya é kyɛn. É Joram zé pa é yɛrama a zo.

¹³ David si aan wo guliwuo sina Siri munu lee, é tɔ taa ye é ziin, Édom munu baa sɔraziɛn kelele nya, wɛgɔ worona.

¹⁴ É sunya lɛ do donu nyana Édom tɛrɛ faa la. Yé Édom tɛrɛ faa pla David wuo. Gakelebale éé David takuun‐an a gona faana.

¹⁵ David kɛlɛ Izraɛl nwiinzan nya, ’té éé we zin valé we tegele kɛla élé munu faa lɛ.

¹⁶ Séruja be Joab a sunyanu faa nwiinzan nya; Akilud be Jozafat a sɛbɛ tadɔzan nya;

¹⁷ Akitub be Sadɔk valé Abiataa be Asimélɛk a Balebanzannu nya; Séraja a sɛbɛgyɛzan nya;

¹⁸ Jéojada be Bénaja a Kérétimunu valé Pélétimunu nwiinzan nya; yé David benu a tɛrɛ nwiinzannu nya.