2 Samuɛl 7 - Kazambale lé Sebe Sauunu 1979

Gakelebale Natan nwunvɔ David va

¹ Minwiinzan a é nyanale élé kɔn gi aan wo, ’té Gakelebale flinle nɔ a lɛ, yé é a si a nyanémunu lé ke a zi, wo lee,

² é lé balelayezan Natan lɛ léé: Bé gini do. Maa a é nyanale sɛdrɛyili kɔn gi, ’té Bale lé kɛsu a sɔkɔn wuo.

³ Natan lé minwiinzan lɛ léé: ’I go, we faa lé ke i bli gi, bé kɛlɛ, naa, Gakelebale a i va.

⁴ ’Bɛ é béli, Gakelebale é dére fe Natan lɛ léé:

⁵ ’I go, bé fe an wuozan David lɛ léma: Gakelebale léma: Bii ɛ dan anlé kɔn dɔ lɛ, an nyanana kɛlɛle we gii?

⁶ Naa, é sia yian nya lé maa Izraɛl lé nénu si Éjipiti tɛrɛ la fɔɔ kyɔ yi nya, maa ’ka tan nyana lɛ kɔn gi lo; an tawo sɔkɔn valé Bale lé sɔkɔn wuo.

⁷ Ta faa lé ko wo Izraɛl munu nya, Izraɛl munu lé maa wo dɔ léé, ’wo anlé munu Izraɛl tabin, maa fe tan do wo va mi do lɛ léé, mɛmalé ka ’ka anlé sɛdrɛyili kɔn dɔ lɛ loo?

⁸ Sin, bé fe an wuozan David lɛ léma: Lai sunyanu lé Gakelebale léma: Maa i si bwi gi, ’blanu zuo, i kɛlɛle anlé munu Izraɛl nwiinzan nya we gi;

⁹ dé i tawo fɛofɛana, maa a i va; maa i nyanézannu kulu ga i ’lɛ, yé maa i tɔ kɛlɛ blɛn bélé tɛrɛlamunu lé mi blɛnblɛnnu tɔ zo;

¹⁰ maa nyanana nɔ anlé munu Izraɛl lɛ, yé maa wo suni wɔra, wo dɔle gligli, ’té wo ma ’ka nyɔɔn‐an é dɛrɛ lo we ma, léé, té wenyanékɛlɛzannu é nyané pa wo ta bélé é vinin zo lo,

¹¹ bélé bléyian va lé maa anlé munu Izraɛl taweblezannu dɔ ’bɛ bléyi zo lo. Maa flinle nɔ i lɛ, i sile i nyanémunu lee nya. Yé Gakelebale lé i lɛ léé, ’é dan i fan lɛ.

¹² Dé ilé yinu lɛ sɔɔ yé i yi gyɛ i tinu va, mi lé é si ibo bɔn gi, i kulu nya, maa dan a nwa lɛ i zuo, yé maa dan alé plale mi nwiin dɔ lɛ gligli.

¹³ Yee ɛ dan kɔn dɔ lɛ an tɔ nya yé maa dan alé plale mi nwiin lé webleblin dɔ lɛ gligli.

¹⁴ Maa dan kɛlɛ lɛ a ti nya yé é dan kɛlɛ lɛ an be nya. Dé é wenyané kɛlɛ, maa dan we lɛ dɔ lɛ a gi munu lé plén valé munu lé fɔlɛ nya;

¹⁵ naa, maa ’ka dan anlé zin si lɛ a ta, bélé fɛan zo lé maa a si Saul lé an sɔn vɔ a ma ilé we ma, a ta, a zo lo.

¹⁶ Ilé kɔn valé ilé plale mi nwiin é dan kɛlɛ lɛ sɔbɛlawe nya lɛɛfaama; ilé webleblin é dan dɔ lɛ gligli lɛɛfaama.

David Bale bɔ vɔ

¹⁷ Dére ’konu koo, yuɛziwe ’ko faa koo, Natan wo zuo fe David lɛ.

¹⁸ Yé David go ébo bɔra lɛ Gakelebale yara yé é léé: Mizan Gakelebale, maa koo, an gɔnɔ koo, ko a mɛ fɛ nya yé i da an nya fɛana lé maa ke kyɔ, anaa?

¹⁹ Yé é ziin, Mizan, Gakelebale, ’bɛ a we kiéné nya i yuɛ gi; i tɛlɛ tɛlama we fe é ziin i wuozan kulu lé we ma. Yé Mizan Gakelebale, ibo kɛlɛ kiéné we ’ko paale mi pla gi we maa?

²⁰ Mɛ we lé David éé bɔa a fele lɛ i lɛ é ziin? Mizan Gakelebale, i i wuozan dɔɔ.

²¹ I dére we ma, i bligiwe yɛrama lé i we blɛnnu ’ko kɛlɛ wo gɔɔnle i wuozan lɛ we gi.

²² Bale, Gakelebale, i a blɛɛn! Naa, we faa lé ko a ’mana ko tɔné gi, a yɛrama lé i bɔmazan ’ka lo, yé bale bɛ ’ka i va lo.

²³ Izraɛl lé, Bale da wo tabo lɛ, wo kɛlɛle élé munu nya we gi, wo zo bɛn do a tɛrɛ laa? I tɔ kɛlɛle blɛn lé we ma lé i gyɛzorowenu valé we blɛnblɛnnu kɛlɛ ilé tɛrɛ valé kolé we ma; munu lé i wo si Éjipiti tɛrɛ la wo kɛlɛle ilé munu nya we ma, i bɛnnu valé wolé balenu bin wo ’lɛ.

²⁴ Yé i ilé munu Izraɛl dɔ gligli wo kɛlɛle ilé munu nya lɛɛfaama we ma; yé bii, oo Gakelebale, bii kinin wolé Bale nya.

²⁵ Sin, Bale, Gakelebale, blikɛlɛlɛdére lé bé fe i wuozan valé é kulu lɛ bɛ, ’é vo ana lɛɛfaama ma, yé ’i we kɛlɛ i dére yɛrama ma.

²⁶ ’Wo i tɔ kɛlɛ blɛn lɛɛfaama ma, yé ’wa fe léé, lai sunyanu lé Gakelebale a Izraɛl lé Bale nya ma! Yé i wuozan David gɔnɔ dɔ i ’lɛ gligli ma!

²⁷ Lai sunyanu lé Gakelebale, Izraɛl lé Bale, biibozen ɛ a nagɔɔn i wuozan lɛ, a fele nya léé, ’é dan i fan lɛ. Bɛwemalé i wuozan bli ta dɔ plɛplɛ ba ’ko zorole i lɛ we ma.

²⁸ Mizan, Gakelebale, sin, bii ɛ ke Bale nya yé i dére ɛ ke webozen nya yé i zin ’ko kɛlɛle i wuozan lɛ we fe.

²⁹ Amalé, ’i i wuozan kulunu drɔɔ vo ma, a vole i’lɛ lɛɛfaama we ma. Naa, Mizan Gakelebale, bii ɛ we fe, yé ilé a drɔɔ vole we ma léé, i wuozan kulunu é dan vo lɛ lɛɛfaama, a glɛ ’ka lo.