2 Samuɛl 6 - Kazambale lé Sebe Sauunu 1979

David da Bale lé kɛsu nya Jérusalɛm

¹ David Izraɛl lé mi kprakpranu baa vu ta soru zén ékeva é ziin.

² David valé é vamunu faa tawole sia Baalé‐Juda, Bale lé kɛsu sile we ma; lai sunyanu lé Gakelebale lé éé nyanaan sérubɛnnu méléna kɛsu ta loru, wa tɔ laan kɛsu ’lɛ.

³ Wo Bale lé kɛsu dɔra goro dɛrɛ gi, yé wo si a nya Abinadab lé kɔn ’léé gɔ nwiin; Abinadab benu, Uza valé Akijo, wo goro dɛrɛ vɔ.

⁴ Wo si a nya Abinadab lé kɔn ’léé gɔ nwiin, ’té Uza éé tawoo a bɛ do la, ’té Akijo éé tawoo kɛsu ’lɛ.

⁵ Lɛrɛvɔafɛ gɔnɔ faa lé wa kɛlɛ siprɛyili nya koo, kɔnɔ koo, kpélé koo, flin koo, yɔyɔ koo, kɔanu koo, David valé Izraɛl munu faa wo gyɛ Gakelebale ’lɛ.

⁶ Wo bɔ aan wo Nakɔn lé ’sa sunwona, Uza é bɛ soi yé é kun Bale lé kɛsu ma, naa, dirinu a tɛnla, azama.

⁷ Gakelebale bli fli Uza ma yé Bale a gyɛ é nya do a saanle we ma. Uza ga ’bɛna Bale lé kɛsu sɔnɔ.

⁸ Gakelebale Uza gyɛ bɛan zo bɛ, é ’na David ma. Yé é fɛkona tɔ pa Pérɛs‐Uza fɔɔ kyɔ yi nya.

⁹ David kana Gakelebale lee yi ’ko nya yé é léé: Gakelebale lé kɛsu é dan wɔra lɛ anlé kɔn gi kaa?

¹⁰ É ’ka a va léé, é go Gakelebale lé kɛsu nya é va David lé fla lo, amalé é go a nya Gat mi Obɛd‐Édom lé kɔn ’léé.

¹¹ Gakelebale lé kɛsu moné yaa kɛlɛ Gat mi Obɛd‐Édom lé kɔn gi yé Gakelebale Obɛd‐Édom drɔɔ vo, é valé alé kɔngimunu faa nya.

¹² Wo da a fe lɛ minwiinzan David lɛ léé: Bale lé kɛsu we ma, Gakelebale Obɛd‐Édom valé élé fɛnu faa drɔɔ vo. Yé David zi sia yé é Bale lé kɛsu si Obɛd‐Édom lé kɔn gi yé é goan David lé fla gi nanale blɛn nya.

¹³ Gakelebale lé kɛsu simunu ’wo ganepa suiɛdozan soowɔla aan wo, wo Gakelebale ban dirigɔné valé diriné buale do nya.

¹⁴ David nɛnɛ bo élé plɛplɛ faa nya Gakelebale ’lɛ, lɛnsɔ lé wa kɛlɛ éfɔdi nya, a nya é ta.

¹⁵ David valé Izraɛl munu faa go Gakelebale lé kɛsu nya gi nana siaale valé béli fɛnle nya.

¹⁶ Gakelebale lé kɛsu bɔra David lé fla bléyian va, ’té Saul lu Mikal a naginian fɛnɛti ta, yé é minwiinzan blɛn David ye fɔrɔna, é valé nɛnɛ bona Gakelebale ’lɛ, yé é nyé yéli a ma é bli gi.

¹⁷ Yé wo da Gakelebale lé kɛsu nya yé wa dɔra ’é dɔrana, sɔkɔn lé David a dɔ azé nya, a méléna; balebanwi lé wa kyɛ blé, é valé bɔvɔ sarakanu, David wo bo Gakelebale lɛ.

¹⁸ Balebanwi lé wa kyɛ blé, é valé bɔvɔ sarakanu, David nyaa a bole nya aan wo, é munu drɔɔ vo lai sunyanu lé Gakelebale tɔ nya.

¹⁹ ’Bɛ zuo, buru do koo, wipo do koo, dɔrɔporo gale po vɔle do koo, David a nɔ Izraɛl lé mi gbau faa lɛ do do, gɔnénu valé lomu nya. Yé munu faa go ’wolé kɔn ’léé do do.

²⁰ David nɔla élé kɔn drɔɔ vole we ma yé Saul lu Mikal da a si lɛ zia. É léé: Mɛ tɔbɔwe ɛ kɛlɛ kyɔ Izraɛl nwiinzan lɛ, yé é porole vɔ mi wuomunu valé mi wuolomu yuɛ va bélé boazan zo!

²¹ David a zi pa Mikal lɛ léé: Gakelebale lé é i ti valé élé kɔn faa vo yé é an si a va an kɛlɛle Gakelebale lé munu, Izraɛl munu nwiinzan nya we gi bɛ, yee Gakelebale ’lɛ lé an ke nɛnɛ bona.

²² Yé maa a a va léé, an kɛlɛ naané é mini ’bɛ la yé an kɛlɛ kiéné anbo yuɛ gi; naa, mi wuolomu lé bé fe bɛ, wo dan an tɔ bɔ lɛ.

²³ Naa, Saul lu Mikal ’ka né yaa lɛ élé tɛrɛla faa gi lo, fɔɔ yé é ga a zo.