2 Samuɛl 5 - Kazambale lé Sebe Sauunu 1979

David kɛlɛ Juda munu valé Izraɛl munu Nwiinzan Blɛn nya

¹ Izraɛlnu faa da David va Ébrɔn yé wo léé: I ’ka a yé loo? Ko a i wɔlɛ valé i nɛ nya.

² É li é kwakwa, bléyian va lé Saul a ko nwiinzan nya, ’té bii ɛ goo Izraɛl nya, ’té i dan wo nya. Gakelebale lé i lɛ léé: Bii ɛ dan fɛblele nɔ lɛ élé munu Izraɛl lɛ, yé bii ɛ dan kɛlɛ lɛ Izraɛl nwiinzan blɛn nya.

³ ’Bɛ zo lé Izraɛl mi segelenu faa da minwiinzan va Ébrɔn yé minwiinzan David é gi pa do wo va Ébrɔn, Gakelebale yara. Wo nyɔnɔ zén David nwiin, a kɛlɛle Izraɛl nwiinzan blɛn nya we ma.

⁴ David kɛlɛ minwiinzan blɛn nya aan wo, ’té a lɛɛ a yɔ do wɔlɛ vu yé é pla wo nwiin lɛɛ yɔ fié.

⁵ É pla Juda nwiin Ébrɔn lɛɛ sɔrafié moné suiɛdo, yé é pla Izraɛl valé Juda nwiin Jérusalɛm lɛɛ yɔ do wɔlɛ vu ta yaa.

David Jébusi munu lé fla si

⁶ Minwiinzan blɛn valé élé munu go guli dan lɛ Jébusinu va Jérusalɛm. Wo lé David lɛ léé: I ’ka dan wɔra lɛ ’ko lo, naa, yuɛwiimunu valé ganesuruzannu é dan i nyunu lɛ. ’Bɛ gi léé, David ’ka dan wɔra lɛ ’ko lo.

⁷ Naa, David fla plɛplɛ Siɔn si; David lé fla lé.

⁸ David lé ’bɛ yi la léé: Dé mian é Jébusimunu kele yé é bɔ ’yi yorona, ganesuruzannu valé yuɛwiizannu ’ko lé ke David nyanézannu nya, dé mian é wo kele . . . ’Bɛ lé we ma lé wa vɔa gɔné nya sin léé, yuɛwiizan valé ganesuruzannu ’ka dan wɔra lɛ kɔn gi lo.

⁹ David nyana kli fla plɛplɛ ta yé é a laa David lé fla. É kɔnnu dɔ fɛfaana, Milo boen valé Milo zi.

¹⁰ David kɛlɛle blɛn gi go gyɛle nya, ’té Gakelebale, lai sunyanu lé Bale a a va.

¹¹ Tii nwiinzan Iiram munu nwunvɔ David va, yé sɛdrɛyilinu koo, yilinyaazannu koo, gɔlɛnyaazannu koo, é wo pa David lɛ zia yé wo David lé kɔn dɔ.

¹² David a gi dɔɔ léé, Gakelebale ’é dɔ gligli Izraɛl nwiinzan nya, yé Bale élé tɛrɛ kɛlɛ blɛn alé munu Izraɛl lé we ma.

¹³ David sile Ébrɔn zuo é le bɛnu si Jérusalɛm yé a bwɛnu ana é ziin, yé wo négɔné valé nélomu yaa a lɛ é ziin.

¹⁴ Nénu lé wa yaa a lɛ Jérusalɛm, wo tɔ lé ke ’ko: Samua a do, Sobab a do, Natan a do, Salomɔn a do,

¹⁵ Jibaa a do, Élisua a do, Néfɛg a do, Jafia a do,

¹⁶ Élisama a do, Éliada a do, Élifélɛt a do, woo lé.

David Filisiti munu gyɛ guli nya

¹⁷ Filisiti munu a ’ma léé, wo nyɔnɔ zén David nwiin a kɛlɛle Izraɛl munu nwiinzan blɛn nya we ma, yé wo faa da guli vɔ lɛ a lɛ. David a ’ma aan wo, é go kɔn plɛplɛ gi.

¹⁸ Filisitinu bɔ yé wo sɔɔla Réfaim gɔ worona.

¹⁹ David we laa Gakelebale lee léé: Maa nwa Filisitinu maa? I dan wo pa lɛ an lee? Yé Gakelebale lé David lɛ léé: ’I nwa, naa, maa dan Filisitinu pa lɛ i lee.

²⁰ David da Baal‐Pérasim yé é wo kele ’bɛna. A zuo é léé: Gakelebale an nyanézannu fwila an ’lɛ bélé yinu lé woo yoroan, wo zo. Bɛwemalé wo fɛkona tɔ pa Baal‐Pérasim.

²¹ Filisitinu si ’wolé miyilinu zi ana, yé David valé élé munu wo sia.

²² Filisitinu nwa é ziin yé wo sɔɔla Réfaim gɔ worona.

²³ David we laa Gakelebale lee. Yé Gakelebale léé: Té i nwa wo ma wo ’lɛzia lo; ’i gié wo zuozia yé i dan bɔ lɛ wo ma muriéyilinu yara.

²⁴ Dé i gane vun wele ’ma muriéyilinu nwiin, ’i nwa fiéfié, ’té Gakelebale ɛ ke tawona i ’lɛ, guli danle Filisitinu lé sunyanu va we ma.

²⁵ David Gakelebale dére tawe kɛlɛ yé é Filisitinu kele, é sia Géba fɔɔ yé é bɔ Gézɛɛ.