2 Samuɛl 4 - Kazambale lé Sebe Sauunu 1979

Wo Isi‐Bɔsɛt gyɛ

¹ Saul be a ’ma aan wo léé, Abinɛɛ ga Ébrɔn, plɛplɛ ’ka vo lɛ a lee lo, yé kana zén Izraɛlnu faa gi.

² Sunya palu fié zilɛzannu fié a Saul be va, wa do laama Baana yé wa do laama Rékab; wa Bɛnjamɛn mi do, Béérɔt mi Rimɔn benu nya. (Naa, wo Béérɔt ye Bɛnjamɛn lé tɛrɛ lɛ do nya,

³ yé Béérɔt munu fwi yé wo go nyana lɛ Gitaim fɔɔ kyɔ yi nya.)

⁴ Saul be Jonatan be do ana, yé a gane fiénu a é surule; a lɛɛ ke aan wo soru, bléyian va lé wo si Jizréɛl yé wo da Saul valé Jonatan gawe fe lɛ, a tɔrɔpaazan a si, yé é vɔ fli gi a nya; é ke aan wo vlan buruna a nya, yé é dia yé né gane yéli; wa tɔ laama Méfibosɛt.

⁵ Naa, Béérɔt mi Rimɔn be fiénu, Rékab valé Baana go kyɛyee bɔbléyi va Isi‐Bɔsɛt lé kɔn ’léé, ’té Isi‐Bɔsɛt a é yiale é yiéyi flinna.

⁶ Rékab valé Baana wɔra kɔn gi bélé fɛan zo lé wa gona buruwɔlɛ sina ana, a zo, yé wa gyɛ é bɔn ma yé Rékab valé é bwe Baana bɔra vlan nya.

⁷ Naa, wo wɔra kɔn gi yé wo go fɛana lé é ke é yiale élé yialafɛ ta kɔnmi zi, ana, yé wa gyɛ yé é ga, yé wa ’wuo kini. Wa ’wuo si yé wo vo tawona é béli yé wo fɛna pɛblɛɛ kini.

⁸ Wo go Isi‐Bɔsɛt ’wuo nya David lɛ Ébrɔn yé wo lé minwiinzan lɛ léé: I nyanézan Saul lé é sɔ a lɛ léé, ’é i gya, a be Isi‐Bɔsɛt ’wuo lo; Gakelebale anzan minwiinzan lé we lɛgi pa kyɔ Saul valé é kulu ma.

⁹ David a zi pa Béérɔt mi Rimɔn benu Rékab valé Baana lɛ léé: Gakelebale lé é an si gawe faa gi, é a é yuɛma!

¹⁰ Mi lé é dɔ a gi léé, é we néné fe an lɛ, a fele nya léé, Saul ga, maa a kun yé maa a gyɛ Siklag, alé we néné maban nya;

¹¹ yé dé mi plenu mi tegele gyɛ élé kɔn gi élé yialafɛ ta, maa ’ka dan a nyɛ lɛgi pa lɛ ka ma yé maa ka si tɛrɛ la loo?

¹² Yé David lé munu lɛ léé, ’wo wo gyɛ; wo wo bɛnu valé wo ganenu kini yé wo wo dun ’yiba ma Ébrɔn. ’Bɛ zuo yé wo Isi‐Bɔsɛt ’wuo si yé wa pa Abinɛɛ lé mi pana Ébrɔn.