2 Samuɛl 3 - Kazambale lé Sebe Sauunu 1979

¹ Saul lé munu valé David lé munu mɔn guli danna. David lé plɛplɛ taa vo zénna a va yé Saul lé munu lé plɛplɛ vo sina a ta.

David benu

² David négɔnénu yaa Ébrɔn. Alé né vininzan lé ke Jizréɛl le Akinoam be Aminɔn nya;

³ a fiézan lé ke Nabal na Kaamɛl le Abigail be Kiléab nya; a yaazan lé ke Gésuu nwiinzan Talmai lu Maaka be Abusalɔm nya;

⁴ a ziɛnzan lé ke Agit be Adonija nya; a soruzan lé ke Abital be Séfatia nya;

⁵ a suiɛdozan lé ke David na Égla be Jitréam nya. Nénu lé wo wo yaa David lɛ Ébrɔn, wo lé ke bɛ.

Abinɛɛ lé we

⁶ Bléyian va lé guli a David lé munu valé Saul lé munu méléna Abinɛɛ dɔ Saul lé munu zuo gligli.

⁷ Naa, Saul bwɛ do ana wa laama Aja lu Risipa. Yé Isi‐Bɔsɛt lé Abinɛɛ lɛ léé: Mɛmalé i go an ti bwɛ vaa?

⁸ Isi‐Bɔsɛt dére Abinɛɛ bli fli é baba yé é a zi pa léé: Maa a blén ’wuo lé é dɔ Juda zuo, a nyaa? We zin lé maa a kɛlɛ i ti Saul lé munu koo, i bwenu koo, i benu koo, wo lɛ, maa a tɔmase kɛlɛ i lɛ kyɔ yé an ’ka i pa lɛ David lee lo, yé kyɔ i we dɔ an nwiin le ’ko lé we maa?

^9-10 We lé Gakelebale a fe David lɛ bale ’nyɔɔnle nya léé, é dan kɛlɛle minwiinzan nya se si lɛ Saul gɔnɔ gi yé é dan a nɔ lɛ David lɛ, yé é dan David lé webleblin dɔ lɛ gligli Izraɛl valé Juda nwiin, é sia Dan fɔɔ yé é bɔ Bɛɛ‐Sééba, dé maa ’ka dan bɔ lɛ David va we ’ko gi lo, Bale ’é we kɛlɛ Abinɛɛ lɛ élé plɛplɛ faa nya ma.

¹¹ Isi‐Bɔsɛt kana Abinɛɛ lee amalé é ’ka dɔ lɛ a gi boenwo léé, é we zi pa a lɛ dére do kpen nya lo.

¹² Abinɛɛ munu nwunvɔ David va a fele a lɛ we gi léé: Tɛrɛ vo de ɛ lɛɛ? ’Ko gi pa do i nya, yé an bɛ é dan bɔ lɛ i va, Izraɛl faa nɔlale i va we gi.

¹³ David a zi pa léé: ’Bɛ a é zima. Maa dan an gi pa lɛ do i va; naa, maa we do fé i lɛ; yee lé ke léé, dé i ’ka tan da lɛ Saul lu Mikal nya an lɛ lo, i ’ka dan an yara ye lɛ lo.

¹⁴ Yé David munu nwunvɔ Saul be Isi‐Bɔsɛt va a fele a lɛ we gi léé: An na Mikal lé, maa a bo Filisitinu gɔnédɔna kɔlɛ kuru yɔ soru nya, bé nɔ an lɛ.

¹⁵ Isi‐Bɔsɛt mi pa zia lezan sile é zana Lais be Palti lee we gi.

¹⁶ Yé a zana go a zuo wuvɔle nya fɔɔ yé wo bɔ Basurim. Yé Abinɛɛ lé a lɛ léé: ’I diéra, ’i go. Yé é diéra.

¹⁷ Abinɛɛ we fe Izraɛl mi segelenu lɛ yé é lé wo lɛ léé: É vinin é sɔ ka lɛ léé, David ’é kɛlɛ ka nwiinzan blɛn nya;

¹⁸ ’ka dɔ a nya sin; naa, Gakelebale a ma we fe léé, ’é wuozan David nya lé é dan élé munu Izraɛl si lɛ Filisitinu valé wo nyanézannu faa lee.

¹⁹ Abinɛɛ we fe ’bɛ zo Bɛnjamɛn munu lɛ, yé we lé é dɔ Izraɛlnu valé Bɛnjamɛn lé munu faa gi, é go yé é a zuo fe David lɛ Ébrɔn.

²⁰ É bɔ David ma Ébrɔn mi yɔ do nya é va; yé David fɛti kɛlɛ Abinɛɛ valé é vamunu lɛ.

²¹ Abinɛɛ lé David lɛ léé: Maa dan nwa lɛ yé maa dan go lɛ Izraɛl munu faa zén lɛ ékeva anzan minwiinzan zuomunu nya; wo dan ’wo gi pa lɛ do i va, yé i dan pla lɛ wo nwiin fɛan zo lé é sɔ i lɛ, a zo. David Abinɛɛ pa zia drɔɔ.

²² Joab valé David lé munu si guli ma yé wo da gulizarafɛnu kiɛre nya wo lee. Abinɛɛ ’ka David va Ébrɔn é dɛrɛ lo, naa, David a pa zia yé é go drɔɔ.

²³ Joab valé é vamunu da aan wo, wo we zuo fe Joab lɛ léé: Nɛɛ be Abinɛɛ da minwiinzan va yé David a pa zia yé é go drɔɔ.

²⁴ Joab go minwiinzan va yé é léé: Mɛ lé bé kɛlɛ bɛɛ? Bé ye, Abinɛɛ da i va, mɛmalé i zi nɔ a lɛ yé bé pa ziaa?

²⁵ I Nɛɛ be Abinɛɛ dɔɔ? Dabli kɛlɛle i lɛ koo, ilé tawole naginile koo, we faa lé i ke a kɛlɛna, a gi dɔɔle koo, a we ma lé é da i va.

²⁶ Joab si aan wo David va, é munu nwunvɔ Abinɛɛ zuo, yé wo bɔ a ma Sira lé ’yiguru la yé wo da a nya. David ’ka we do kpen dɔɔ lɛ we ’ko gi lo.

²⁷ Abinɛɛ da aan wo Ébrɔn, Joab go a nya é yɛrama flagɔrɔ ’léé, bélé fɛan zo lé é a kyeen giwe fena a lɛ, a zo, yé é a gyɛ é bɔn ma ’bɛna yé é ga, a zuané Azaɛl gyɛle lɛgi pale we ma.

²⁸ ’Bɛ zuo, David a ’ma yé é léé: Gakelebale yara, Nɛɛ be Abinɛɛ nyɛ ’ka maa valé anlé munu nwiin monomono lo.

²⁹ A nyɛwe ’é dɔ Joab valé é gɔnɔlamunu faa nwiin ma! É a lé yifaama Joab gɔnɔlami do nyɛ ’é so, dé ’bɛ kaan lo, pantɛn ’é vɔ a do ma, dé ’bɛ kaan lo, a do ’é tawo yili ma, dé ’bɛ kaan lo, gwɔun ’é a do gyɛ, dé ’bɛ kaan lo, buru ’é vuru a do ma ma.

³⁰ ’Bɛ zo lé Joab valé é zuané Abisai Abinɛɛ gyɛ. É wo zuané Azaɛl gyɛ Gabaɔn, guli danna, azama.

³¹ David lé Joab valé é vamunu lɛ léé: ’Kalé sɔ fia, ’ka bɔlɔ dɔ ka gyɛn, ’ka Abinɛɛ wuvɔ. Yé minwiinzan David tawo a nyaa zuo.

³² Wo Abinɛɛ pa Ébrɔn. Minwiinzan siaa wu nya yé é wuvɔ Abinɛɛ vun ta yé munu faa a wuvɔ.

³³ Minwiinzan Abinɛɛ wuvɔ yé é léé: É a lé Abinɛɛ é ga bélé fɛan zo lé wenyané baba kɛlɛzan é gaan, a zoo?

³⁴ I bɛnu ’ka é yerele lo, yé foliɛwɔlɛ bale ’ka i gane ma lo. I dia bélé fɛan zo lé mi éé diaan miplenu lee, a zo.

³⁵ Yé munu faa Abinɛɛ wuvɔ é ziin. Munu faa da David va fɛblele nɔle a lɛ we ma yuɛi fu va, naa, David bale ’nyɔɔn a fele nya léé: Dé é a buru nyaoo, dé é a fɛofɛan nyaoo, dé maa a lɛdan yiri vɔle ’lɛ, Bale ’é we kɛlɛ an lɛ élé plɛplɛ faa nya ma.

³⁶ Munu faa ’bɛ dére ’ko ’ma, yé é sɔ wo lɛ, naa, dé minwiinzan blɛn a weowean kɛlɛna, ’bɛ sɔ wo lɛ.

³⁷ Munu faa valé Izraɛl faa a gi dɔɔ yi ’ko la léé, wo ’ka Nɛɛ be Abinɛɛ gyɛ lɛ minwiinzan dére ta lo.

³⁸ Minwiinzan lé é wuomunu lɛ léé: Ka ’ka a gi dɔɔa léé, minwiinzan, mi segele do dia kyɔ Izraɛl loo?

³⁹ Maa a tan tɔɔtɔɔ, dɔlé ’té wo kɛlɛle minwiinzan blɛn nya nyɔnɔ zén an nwiin; yé Séruja benu ’ko, an bɛ ’ka sɔa wo nya lo. Mi lé é wenyané kɛlɛ, Gakelebale ’é azé nɔ élé wenyané kɛlɛle yɛrama ma.