2 Samuɛl 24 - Kazambale lé Sebe Sauunu 1979

Mi nɔnɔle valé migyɛgyɛ

¹ Gakelebale bli fli é ziin Izraɛl ma, yé é David nwa wo ma a fele nya léé: ’I go, ’i Izraɛl valé Juda munu nɔnɔ.

² Yé minwiinzan lé Joab lé ke sunyanu faa nwiinzan nya, ’té é ke a sɔnɔ bɛ, a lɛ léé: ’I gié Izraɛl bɛnnu faa la, é sia Dan fɔɔ yé é bɔ Bɛɛ‐Sééba; ’wo munu nɔnɔ ma yé dé wo ’léé a nɔɔ? yé maa a dɔɔ.

³ Joab lé minwiinzan lɛ léé: Munu ’léé a fɛan zo, Gakelebale ilé Bale ’é munu kɛlɛ kiɛre ’bɛ ’léé gɔnɔ yɔ soru yé anzan minwiinzan a ye ma! Mɛmalé anzan minwiinzan a a va léé, ’é ’bɛ kɛlɛɛ?

⁴ Bélidɔwe lé é a nɔ Joab valé sunyanu nwiinzannu lɛ, minwiinzan a é dɔle a ta; yé Joab valé sunyanu nwiinzannu si minwiinzan va yé wo go Izraɛl munu nɔnɔ lɛ.

⁵ Wo Juudɛn kini yé wo sɔkɔnnu dɔ Aroɛɛ, fla lé ke Gad gɔ worona méléna, ’té é ke Jaézɛɛ sɔnɔ, a bɛyilazia.

⁶ Wo go Galaad valé Takatim‐Odisi tɛrɛ la. Wo go Dan‐Jaan valé Sidɔn zi tɛrɛnu la.

⁷ Wo go Tii lé guliyɔɔkɔn ’léé, é valé Éévinu valé Kanaan munu lé flanu faa ta. Wo nyaa Juda yirinwana bɛyila, Bɛɛ‐Sééba.

⁸ ’Bɛ zo lé wo gié ana tɛrɛ faa la yé wo bɔ Jérusalɛm moné sɔraziɛn yi yɔ do zuo.

⁹ Joab munu nɔnɔsɛbɛ nɔ minwiinzan lɛ. Gulidanmunu lé woo gwɔun soo é kɔlɛ gi, wa Izraɛl tɛrɛ la mi baa wuru fié, yé Juda zé a mi baa wuru do yɔ fié wɔlɛ vu.

¹⁰ David bli kyɛ dɔ munu nɔnɔle zuo. Yé é lé Gakelebale lɛ léé: ’Bɛ kɛlɛle nya lé an wenyané blɛn kɛlɛ. Sin, Gakelebale, ’i yara nɔla an ta yé ’i i wuozan lé weple ma zanté nyi si, naa, an ’tugyɛwe kɛlɛ tegele!

¹¹ ’Bɛ é tu kini, bléyian va lé David nwa, ’bɛ bléyi va Gakelebale é dére fe balelayezan Gad lé é ke David va fɛnayezan nya, a lɛ léé:

¹² ’I go bé fe David lɛ léma: Gakelebale léma: Maa nyané yaa dɔ i lɛ; ’izé si a va do yé maa i gyɛ a nya.

¹³ Gad go David va yé é we ’ko fe a lɛ yé é léé: Lɔrɔ ’é dɔ ilé tɛrɛ la lɛɛ sɔrafié laa, taa, i vlan buru moné yaa ’té i nyanézannu i zuo bin‐é laa, taa, migyɛgyɛ ’é da ilé tɛrɛ la yi yaa? Sin, ’izé si a va, yé wean maa dan a fe lɛ an nwunvɔzan lɛ, yé maa dɔɔ.

¹⁴ David a zi pa Gad lɛ léé: Anlé nyané a blɛn! Gakelebale ’é kolé we ble ma, naa, a nyanai éé zén‐é é baba; té munu é kolé we ble lo.

¹⁵ Gakelebale migyɛgyɛ pa zia Izraɛl, é sia bladi fɔɔ bléyi lé é a dɔ, a nya; é sia Dan fɔɔ yé é bɔ Bɛɛ‐Sééba munu ga mi baa yɔ do wɔlɛ vu ta soru.

¹⁶ Lanje é bɛ soi Jérusalɛm ta a sɛrɛle we gi aan wo, Gakelebale bli nɔla wenyané ’ko ma yé é lé migyɛ lanje lɛ léé: É sɔ! ’I bɛ si ana sin. Gakelebale lé lanje bɔ Jébus mi Aravana lé ’sa sunwona sɔnɔ.

¹⁷ David lanje ye, ’té éé munu gya yé é lé Gakelebale lɛ léé: Bé ye, maa ɛ wenyané kɛlɛ. We a maa ɛ nwiin; naa, ’blanu ’ko, mɛ lé wa kɛlɛɛ? ’I bɛ kɛlɛ maa valé an ti lé kɔngimunu ta ma.

¹⁸ ’Bɛ yi la, Gad da David va yé é lé a lɛ léé: ’I go, ’i Gakelebale banna kɛlɛ Jébus mi Aravana lé ’sa sunwona.

¹⁹ David go Gad dére ta, Gakelebale a béli dɔ fɛan zo, a zo.

²⁰ Aravana a nagini yé é minwiinzan valé é wuozannu ye dana é va, yé Aravana bɔra yé é dia minwiinzan ’lɛ yé é yara bua tɛrɛ va.

²¹ Aravana léé: Mɛmalé anzan minwiinzan da é wuozan vaa? Yé David a zi pa léé: An da ilé ’sa sunwona lɔ lɛ yé an Gakelebale banna kɛlɛ ana, migyɛgyɛ sile munu ma we gi.

²² Aravana lé David lɛ léé: Anzan minwiinzan ’é ’sa sunwona si ma, yé dé sarakaoo saraka‐an sɔ a lɛ, ’é a bo ana ma; bé ye, dirigɔnénu a balebanwi lé wa kyɛ blé, a nya yé goronu valé wo ganafɛ valé dirigɔnénu bɔrɔmayili a kyɛ nya.

²³ Aravana a faa nɔ minwiinzan lɛ. Yé Aravana lé minwiinzan lɛ léé: Gakelebale, ilé Bale, ’é a nyi si ma.

²⁴ Naa, minwiinzan lé Aravana lɛ léé: Gba, é sɔ an lɛ léé, maa a lɔ i lee gɔɔlifu nya; fɛ lé maa a ye é pla, maa ’ka Gakelebale anlé Bale ban ’bɛ nya lo. Yé David ’sa sunwona valé dirigɔnénu lɔ gɔɔlifu sikla yɔ fié wɔlɛ vu nya.

²⁵ David Gakelebale banna kɛlɛ yé é balebanwi kyɛ ble a ta yé é bɔvɔ sarakanu bo a ta. Yé Gakelebale bli dɔrala tɛrɛ ma yé é migyɛgyɛ si Izraɛl.