2 Samuɛl 23 - Kazambale lé Sebe Sauunu 1979

David dére voélazannu

¹ David dére voélanu lé ke ko: Izai be David, Mi lé wa mini é bɔluzannu ta, Jakɔb lé Bale lé nyɔnɔzénnwiinzan, Izraɛl lé lɛrɛ néné vɔzan, a dére lo.

² Gakelebale léli éé we fé an lɔlu nya, A dére a an nɛnɛ la.

³ Izraɛl lé Bale we fe, Izraɛl lé gɔlɛ lé an lɛ léé: Mi lé éé plaan munu nwiin we tegele kɛlɛle nya na, Mi lé éé plaan munu nwiin kanale Bale lee nya na,

⁴ É a bélé bladi fɛna fu zo, ’té dé yiri a bina, ’Té lati ’ka la gi lo, a zo; A san éé fɛnu gɔn bɔa lɛɛ dale zuo.

⁵ Gipawe lé a glɛ ’ka lo, ’té Bale a kɛlɛ an va bɛ, É a giwe fe wo ke zuo ke zuo yé é a sɔbɛlawe nya, Amalé anlé kɔn lé we ’ka dan kɛlɛ lɛ ’bɛ zo loo? É ’ka dan an bélile valé anlé blibɔmawenu gɔn bɔ lɛ loo?

⁶ Naa, wenyanékɛlɛmunu faa a bélé lélinu lé mi éé wo vulian, ’Té wo ’ka wo sian wo bɛ gi bɛ lo, wo zo;

⁷ Mi lé é ke gona é bɛ mane lɛ wo ma, éé foliɛwɔlɛ sian, dé ’bɛ kaan lo éé bléin sian, Yé éé wo kyɛ blé fɛ duona.

David lé nyanazannu

⁸ Gulidan nyanazannu lé wo ke David wuo, wo tɔ lo. Takémɔn mi Josɛb‐Basébéta a sunyanu nwiinzanu va mi segele do nya. É mi wuru ziɛn gyɛ élé din nya guli lɛ do kpen danle nya.

⁹ ’Bɛ é zuo, Akoki be Dodo be Éléazaa ana. Gulidanzannu yaa lé wo go guli dan lɛ Davidnu nya, bléyian va lé Filisitinu zén ékeva gulidanle we ma, ’té Izraɛl lé munu vlan buru loru, é a wo va mi do nya.

¹⁰ É nwa yé é Filisitinu gyɛ fɔɔ a bɛ wɔlɛi nyaa a ma yé a bɛ kua gwɔun ma. Gakelebale wo si we blɛn gi ’bɛ yi la. Munu da Éléazaa zuo gulizarafɛnu si lɛ é pla.

¹¹ ’Bɛ é zuo, Aaraa mi Agé be Saama ana. Filisitinu a é zénle ékeva Lési. Tɛrɛ fɛn do ana, lantii féi a ’bɛna, yé munu fwila Filisitinu ’lɛ.

¹² Saama dɔ féi méléna yé é a ta guli dan yé é Filisitinu gyɛ. Gakelebale wo si we blɛn gi ’bɛ yi la.

¹³ Sunyanu nwiinzannu yɔ do wɔlɛ vu va mi yaa bɔra yé wo go David va Adulam lé gɔmaguru gi, fɛ gyɛ bléyi va, ’té Filisitinu palu do wolé sɔkɔnnu dɔ Réfaim munu lé gɔ worona.

¹⁴ David a guliyɔɔkɔn plɛplɛ gi, ’té Filisitinu lé sunya palu do a é nyanale Bɛtléɛm.

¹⁵ David é gi bɔrɔ we do ma yé é léé: Yiba! ’yiguru lé ke Bɛtléɛm flazigɔrɔ ’léé, de ɛ dan ’yi tɔ lɛ a gi yé maa a minii?

¹⁶ Amalé gulidan nyanazannu yaa Filisitinu lé sɔkɔn dɔna kini yé wo ’yi tɔ ’yiguru lé é ke Bɛtléɛm flazigɔrɔ ’léé, a gi. Wo goan yé wa nɔ David lɛ; naa, é ’ka nyi si lɛ léé, é a mini lo, yé é a zana Gakelebale ’lɛ.

¹⁷ Yé é léé: Gakelebale, ’bɛ gi bɔrɔle a an ma baa! ’Yi ’ko a bélé munu lé wobo bɔra ga lɛ yé wo go mun, wo nyɛ zo. Yé é ’ka a minile nyi si lɛ lo. We lé gulidan nyanazannu yaa a kɛlɛ, yee lé ke bɛ.

¹⁸ Joab zuané Séruja be Abisai a mi yaa nwiinzan nya. É mi wuru do mi yɔ soru gyɛ élé din nya; é tɔ ye mi yaa va.

¹⁹ Wa tɔ bɔ é mini a bɔlunu fié ta yé é a wo nwiinzan nya; naa, yee valé mi yaa vinin ’ka bɔ lɛ ékema lo.

²⁰ Kabiséɛl mi do be Jéojada be Bénaja a do. É a nyanazan nya yé é tɔ ye élé we blɛn kɛlɛle ma. Moab mi fié lé wo mini ’wo bɔlunu faa ta, é wo gyɛ. Yi do nya ’té glasépun a dana, é zun guru gi yé é golizra gyɛ.

²¹ Éjipiti mi do lé a yara ke plɛplɛ yé din a a lee, é ’bɛ gyɛ; é go a va yili nya é lee, yé é din si Éjipiti mi lee, yé é a gyɛ a nya.

²² We lé Jéojada be Bénaja a kɛlɛ, yee lé ke bɛ; é tɔ ye nyanazannu yaa méléna.

²³ Wa tɔ bɔ é mini ’é bɔlunu yɔ do wɔlɛ sɔraziɛn ta; naa, yee valé mi yaa vinin ’ka bɔ lɛ ékema lo. David a nyana ’élé we kyɛ zi.

²⁴ Joab zuané Azaɛl a mi yɔ do wɔlɛ vu va mi do nya. Bɛtléɛm mi Dodo be Elkana a do.

²⁵ Arod mi Saama a do. Arod mi Élika a do.

²⁶ Pélɛt mi Élɛs a do. Tékoa mi Ikɛs be Ira a do.

²⁷ Anatɔt mi Abiézɛɛ a do. Usa mi Mébunai a do.

²⁸ Akoas mi Salmɔn a do. Nétofa mi Maarai a do.

²⁹ Nétofa mi Baana be Élɛb a do. Bɛnjamɛn kulunu va Gibéazan Ribai be Itai a do.

³⁰ Piratɔn mi Bénaja a do. Nakalé‐Gaas mi Idai a do.

³¹ Araba mi Abi‐Albɔn a do. Baakum mi Azmavɛt a do.

³² Saalbɔn mi Éliaba a do. Bɛné‐Jasan a do. Jonatan a do.

³³ Aaraa mi Saama a do. Araa mi Saraa be Akiam a do.

³⁴ Maaka mi do be Akasibai be Élifélɛt a do. Gilo mi Asitofɛl be Éliam a do.

³⁵ Kaamɛl mi Esrai a do. Arab mi Paarai a do.

³⁶ Soba mi Natan be Jigéal a do. Gad mi Bani a do.

³⁷ Amɔn mi Sélɛk a do. Béérɔt mi Naarai lé é Séruja be Joab lé gulidanfɛnu kɔné sié, ’bɛ a do.

³⁸ Jétɛɛ mi Ira a do. Jétɛɛ mi Garɛb a do.

³⁹ Éti mi Uri a do. Wo faa a mi yɔ do wɔlɛ vu ta sɔrafié.