2 Samuɛl 22 - Kazambale lé Sebe Sauunu 1979

David guliwuo vole ’é lɛ ma lɛrɛ vɔ

¹ Dé Gakelebale nyaa David sile nya a nyanézannu faa valé Saul lee aan wo, David lɛrɛ ’ko vɔ Gakelebale lɛ.

² É léma: Gakelebale a anlé gɔlɛgɔ koo, anlé guliyɔɔkɔn koo, an vo anbomazan koo, wo nya.

³ Bale a anlé gɔlɛgɔ lé maa an ta yɔɔan a fu va, a nya, É a an botakuunfɛ valé plɛplɛ lé é an sié we gi, a nya. É a anlé sa vulina valé an yɔɔna nya. Oo, an siéwegizan! Bii ɛ an si za?-?mawe tɔntɔn lee.

⁴ Maa siaan léé: ’Wo Gakelebale tɔ zin fe ma! Yé é an si an nyanézannu lee.

⁵ Ga an zi lɛ sɔɔ bélé wɛyi nwale zo, Zamaga lé é ke bélé ’yi ’lɛ plɛplɛ zo, é di kini an gi;

⁶ Mipana balenu an yere, Ga séli vɔ an zi an tanyila.

⁷ Anlé kleblele gi an Gakelebale laa, Maa anlé Bale laa; É a élé fuakɔn gi, ’té éé an dére maan, Yé an siaale bɔ a tɔné gi.

⁸ Wo tɛrɛ puo, ’té a ma éé nyɔɔn‐an, Lanu ganevɔna éé nyɔɔn‐an, A bliflile we ma lé wo manu nyɔɔn.

⁹ Kyɛgoi éé bɔraan a nyé gi, ’Té kyɛ lé éé fɛnu blé bɛ, éé bɔraan a ’léé, ’Té kyɛnyɛ éé bélian.

¹⁰ É lanu tua yé é zun. Lati borozan a a gane wuo.

¹¹ É vɔ sérubɛn punu, yé ’bɛ si a nya. Wa yé fu bɛa ta.

¹² É gunutinu kɛlɛ élé sɔkɔn nya ’é zi, A zi lɛ a é sɔɔle ’yi zénle ékeva kiɛre valé lati tiritiri nya.

¹³ Fuasan lé éé goo a ’lɛ, Kyɛnyɛ éé bélian a gi.

¹⁴ Gakelebale we la gi bélé zagele banle zo; Lailoruzan dére zuoi éé goo wele nya;

¹⁵ É sawɔlɛnu vuli yé é an nyanézannu fwila; É zagele ban yé wo vlan buru.

¹⁶ Wɛyi wɔlɛ ma bɔra Yé tɛrɛ gane vɔnanu ma bɔra Gakelebale lé wefele yara plɛplɛ nya we ma, A nyé gi fu fɛle vun wele we ma.

¹⁷ É a loru yé é bɛ soi yé é an salo, É an si ’yi blɛnnu va;

¹⁸ É an si an mazan plɛplɛ lee, An nyanézannu lé wo plɛplɛ mini an ta, wo lee.

¹⁹ Anlé klebleyi la wo bɔra an ma fiaa, Naa, Gakelebale kɛlɛ an vɔzizan nya.

²⁰ É an vo anboma é zima, An sɔ a lɛ, amalé é an si we gi.

²¹ Gakelebale anzé kɛlɛ anlé we drɔle yɛrama, É zin kɛlɛ an lɛ an bɛ gibɔle yɛrama;

²² Naa, an tawo Gakelebale lé zinu ta Yé we do kpen ’ka an nwiin anlé Bale vazia lo.

²³ A déretawenu faa a an ’lɛ, An ’ka saan lɛ alé bélidɔwenu gi pelo.

²⁴ Gun ’ka an ma a vazia lo, Yé maa anbo kun léé, té an weple kɛlɛ lo.

²⁵ É ziin, Gakelebale anzé kɛlɛ anlé we drɔle yɛrama, An gibɔle a yuɛ gi yɛrama.

²⁶ Ibo gɔɔn‐an mi zin nya mi zin lɛ, I we drɔle kɛla mi drɔle lɛ,

²⁷ Ibo nagɔɔn‐an mi gibɔle nya mi gibɔle lɛ, Yé i we kɛla mi vɔnle lɛ alé wevɔnle yɛrama.

²⁸ Munu lé wo ’wobo kɛla kiéné, i wo sié we gi, Yé i boblɛnzannu zunwo i yuɛ vɔle wo ta nya.

²⁹ Iin, Gakelebale, bii ɛ ke anlé kyɛbɔ nya! Gakelebale éé an va gunu kinié.

³⁰ I bɛ nya lé an ’wiié gulidanzannu ta, Anlé Bale bɛ nya lé, an flazigɔrɔ taboo.

³¹ Gun ’ka Bale lé zinu ma lo, Gakelebale éé dére tawe kɛla; Munu faa lé wo ’wobo bɛ pa Bale lee, é a wo takuunfɛ nya.

³² ’Té dé é ’ka Gakelebale nya lo ’naan, de ɛ ka Bale nyaa? ’Té dé é ’ka kolé Bale nya lo ’naan, de ɛ ke gɔlɛgɔ nyaa?

³³ Bale ɛ ke anlé guliyɔɔkɔn plɛplɛ nya ’Té éé goo an nya zi drɔle ta.

³⁴ Éé an gane kɛla bélé ’kla zé zo, Yé éé an dɔa gligli gɔnu nwiin.

³⁵ Éé gulidanle gɔɔn‐an an bɛ lɛ, Yé an bɛ éé zénésa ganaan.

³⁶ I ilé sile we gi no an lɛ, an takuunfɛ nya, Ilé zin ma lé an kɛla mi blɛn nya.

³⁷ I zi laala gya an ganenu wuo Yé an sɔné ’ka saan lo.

³⁸ Maa an nyanézannu zuo bin‐é, yé maa wo guru zanaan a gi; Dé an ’ka tan wo si lɛ tɛrɛ la tata lo, an ’ka diéran an pa gi lo.

³⁹ Maa wo sié tɛrɛ la tata, maa wo ’wiié yé wo ’ka nwaan é dɛrɛ lo; Woo diaan an gane wuo.

⁴⁰ I an dɔa plɛplɛ gulidanle we ma, I an mazannu plin‐an an wuo.

⁴¹ I an nyanézannu nwunzi dɔa an ta Yé munu lé an za ke wo gi maa wo kulu gaan.

⁴² Woo ’wo zi naginian yé wo siwegizan do kpen ’ka ana lo. Woo siaan Gakelebale lɛ yé ’bɛ ’ka a zi paan wo lɛ lo!

⁴³ Maa wo pun dɔa bélé tɛrɛ va vun zo, Maa wo ’wiié, maa wo zɔn‐o an gane nya bélé fla zinu ta voli zo.

⁴⁴ I an si anlé munu lé zakɛlɛle wuo; I an dɔ bɛnnu nwiinzan nya; Migɔnɔ lé maa ’ka wo dɔɔa lo, woo plaan an wuo.

⁴⁵ Bɛn bɛnu woo blaané paan an ma, Dé maa wean fe tɔɔn, ’té wa kɛlɛna.

⁴⁶ Bɛnnu fuu éé sié wo ta; Dé wo ’ka ’wolé guliyɔɔkɔn gi lo, wo ma éé nyɔɔn‐an.

⁴⁷ Gakelebale a é yuɛma! Anlé gɔlɛgɔ drɔɔ ’é vo ma! Bale, anlé gɔlɛgɔ, an siéwegizan tɔ ’é kɛlɛ blɛn ma,

⁴⁸ Bale ɛ ke anlé we lɛgipazan nya Yé éé munu plaan an wuo,

⁴⁹ Yé éé an sié an nyanézannu lee. I an mini an mazannu ta, I an sié glazan lee.

⁵⁰ Bɛwemalé, Gakelebale, maa dan i tɔ zin fe lɛ bɛnnu méléna! Yé an dan lɛrɛ vɔ lɛ i tɔ kɛlɛle blɛn we ma.

⁵¹ Mi lé é a dɔ minwiinzan nya, éé a sié we tɔntɔn blɛnnu lee, Yé mi lé wo nyɔnɔ zén a ta, Bale nyanai éé zén‐é a ta, Maa David valé an kulunu, éé a zén‐é ko ta yifaama.