2 Samuɛl 21 - Kazambale lé Sebe Sauunu 1979

Wo Saul kulunu gyɛ

¹ David bléyi va lɔrɔ dɔ tɛrɛ la lɛɛ yaa. David Gakelebale yara gini yé Gakelebale léé: Saul valé élé kɔngimunu, mi nyɛzanamunu lé we ma lé. É Gabaɔn munu gyɛ, azama.

² Minwiinzan Gabaɔn munu laa, wefele wo lɛ we gi. Gabaɔn munu ’ka Izraɛl lé nénu nya lo, naa, Amoré munu kulu do lé wo nya; Izraɛl lé nénu Bale kun léé, wo ’ka dan wo gyɛ lɛ lo, naa, Izraɛl lé nénu valé Juda lé we a Saul bli gi blɛn, amalé é sɔ a lɛ léé, ’é Gabaɔn munu kulu ga.

³ David lé Gabaɔn munu lɛ léé: Maa dan kɛlɛ lɛ kaa, yé an wenyané ’ko nyaa yé ka Gakelebale lé tɔnɔfɛ drɔɔ voo?

⁴ Gabaɔn munu a zi pa a lɛ léé: We lé é ke ko valé Saul koo, alé munu koo, ko méléna, é ’ka gɔɔlifu valé kyan lé we nya lo, naa, a se ’ka ko lɛ léé, ko mi gyɛ Izraɛl tɛrɛ la lo. Yé minwiinzan léé: É sɔ ka lɛ léé, maa mɛ kɛlɛ ka lɛɛ?

⁵ Wa zi pa minwiinzan lɛ léé: Mi ’ko ko nyaa yé é a a gi léé, ’é ko kulu gaan yé ’é ko faa si Izraɛl tɛrɛ faa la tata,

⁶ bɛwemalé ’ka a benu va mi sɔrafié nɔ ko lɛ yé ko dan wo dun lɛ, Saul lé ke Gakelebale lé mi vabole nya, alé fla Gibéa ta. Yé minwiinzan léé: Maa dan wo pa lɛ ka lee.

⁷ Minwiinzan David é Saul be Jonatan be Méfibosɛt vo, Bale lé yee valé Saul be Jonatan a ’nyɔɔn wo ke lɛ Gakelebale ’lɛ, a we ma.

⁸ Naa, négɔné fié lé Aja lu Risipa a yaa Saul lɛ, Aamoni valé Méfibosɛt nya, wo koo, négɔné soru lé Saul lu Mérab a yaa Méola mi Baazilai be Adriɛl lɛ, ’bɛnu koo, minwiinzan wo si;

⁹ é wo pa Gabaɔn munu lee yé wo wo dun gɔ nwiin Gakelebale yara. Woo sɔrafié zamaga wo ékeva fɛgyɛle pélisia bléyi va, sɔnmlén gyɛle pélisia bléyi va.

¹⁰ Aja lu Risipa bɔlɔ do si yé é a pla é wuo gɔlɛ ta, yé é vo migale ’konu tabinna. É sia fɛ gyɛle pélisia bléyi va fɔɔ yé lɛɛ da wo ta, é ’ka a nyi si lɛ léé, lai mianénu é bié wo sɔnɔ yiéyi lo, yé é ’ka a nyi si lɛ léé, bwigiwinu é bié wo sɔnɔ é béli lo.

¹¹ We lé Saul bwɛ, Aja lu Risipa a kɛlɛ, wa zuo fe David lɛ.

¹² Yé David go Saul valé é be Jonatan wɔlɛnu si lɛ Jabɛs munu lee Galaad, ’té wo wo si Bɛt‐San, fɛana lé Filisitinu wo dun bléyian va lé wo Saul kele Gilboa bɛ, ana.

¹³ Wo Saul valé é be Jonatan wɔlɛnu si ’bɛna, yé é ziin, munu lé wo wo dun bɛ, wo wozé wɔlɛnu sia é ziin.

¹⁴ Wo Saul valé é be Jonatan wɔlɛnu pa Sélaa, Bɛnjamɛn tɛrɛ la, Saul ti Kis lé mipana. Yé we faa lé minwiinzan wo bélidɔ a nya, wa kɛlɛ. ’Bɛ zuo Bale bli vo drɔɔ tɛrɛ ma.

Wo guli dan Filisitinu va é ziin

¹⁵ Filisitinu guli dan Izraɛl va é ziin. David go é wuomunu nya yé wo guli dan Filisitinu va. David wɔlɛi nyaa é ma.

¹⁶ É dɔ Rafa lé nénu va mi do, Jisibi‐Bénɔb gi léé, ’é David gya; alé din bɛn a zéné sikla wuru do yɔ soru, yé gwɔun dɛrɛ a é dɔle a gyɛn.

¹⁷ Séruja be Abisai da bɔ lɛ David va, yé é Filisiti mi gyɛ yé é ga. Yé David lé munu bale ’nyɔɔn a lɛ léé: I ’ka dan go lɛ guli dan lɛ ko zuo é dɛrɛ lo, dé Izraɛl lé kyɛbɔ é da diri.

¹⁸ ’Bɛ zuo wo guli do dan é ziin Filisitinu va Gɔb, yé Usa mi Sibékai Saf gyɛ; é a Rafa lé nénu va mi do nya.

¹⁹ Yé wo guli do dan é ziin Gɔb, Filisitinu va. Yé Bɛtléɛm mi Jaaré‐Orégim be Elkanan é Gat mi Goliat gyɛ, ’té ’bɛlé dinyili a blɛn bélé sɔnyana zo.

²⁰ Yé wo guli do dan é ziin Gat. Mi grɔgrɔ do ana mi, ’té a bɛnwɔlɛ a vu ta fié yé a ganewɔlɛ a vu ta fié, wo faa a yɔ do wɔlɛ ziɛn, yé é a Rafa kululazan nya é ziin.

²¹ Élé gɔné nagɔɔn Izraɛl lɛ; yé David bwe Siméa be Jonatan a gyɛ yé é ga.

²² Mi ziɛn ’ko wa Rafa lé nénu nya Gat. Wo zamaga wo David valé é wuomunu lee.