2 Samuɛl 20 - Kazambale lé Sebe Sauunu 1979

Sééba nwa David ma

¹ Mi ple do ana bɛ, Bɛnjamɛn mi Bikri be lé wa laama Sééba, yee lé. É béli fɛn yé é léé: Kozé ’ka David va lo, kolé zarafɛ ’ka Izai benu va lo! Izraɛlmunu, ’ka faa é go kalé sɔkɔn ’léé.

² Yé Izraɛl munu faa si David va yé wo go Bikri be Sééba zuo. Naa, Juda munu péli vo ’wo nwiinzan va, yé wo si a nya Juudɛn ma yé wo go a nya fɔɔ Jérusalɛm.

³ David wɔra élé kɔn gi Jérusalɛm. A bwɛ vu lé é wo vo kɔn taginile we gi, é wo pa fɛana lé wo vo wo saa, ana; é wolé fɛ nɔ wo lɛ, naa, é ’ka go lɛ wo va lo yé wo vo ana bélé zanagala lomu zo, fɔɔ yé wo ga.

⁴ Minwiinzan lé Amasa lɛ léé: ’I Juda munu faa laa léé, ’wo zén ékeva an va ’ko, yi yaa wuo, yé bii é ziin, ’i kɛlɛ ana.

⁵ Amasa go Juda munu laa lɛ; naa, é mɔn yé yi lé minwiinzan a dɔ, é gié a ta.

⁶ Yé minwiinzan lé Abisai lɛ léé: Bikri be Sééba é dan wenyané kɛlɛ lɛ ko lɛ yé é mini Abusalɔm zé ta. Biibozen i ti wuozannu si yé bé zuo bin, dé é da wɔra fla plɛplɛ ta yé é san ko lee.

⁷ Yé Abisai go, Joab lé munu koo, Kérétimunu koo, Pélétimunu koo, nyanazannu koo, wo nya é zuo; wo si Jérusalɛm Bikri be Sééba zuo binle we ma.

⁸ Gɔlɛ blɛn lé ke Gabaɔn, wo bɔ a ma aan wo, wo kee Amasa nya. Gwɔun a Joab gyɛn élé sɔ ta, é a é kɔlɛ gi é dɔle a gyɛn, yé bléyian va lé Joab a gona é ’lɛ, é dia.

⁹ Joab lé Amasa lɛ léé: An bwe, i a drɔɔ? Yé é Amasa puo ma gun kun é bɛyi nya, pwɛpwɛ vɔle a ma we gi.

¹⁰ Gwɔun lé ke Joab lee, Amasa ’ka é gi bɔrɔ lɛ ’bɛ ma lo, yé Joab a gyɛ a nya é bɔn ma yé a bun‐annu zana tɛrɛ va, yé é ’ka fɛ bɛ duun lɛ a lɛ lo. Yé Amasa ga. Joab valé é zuané Abisai Bikri bi Sééba zuo bin.

¹¹ Wo va mi do vo Amasa sɔnɔ, ’té é a fé léé: Dé Joab sɔ mian lɛ yé é a David va, ’é go Joab zuo ma.

¹² Amasa burula é nyɛ va zi wɔlɛ gurui. Mi ’ko a ye aan wo léé, mi faa dɔ, é Amasa si zia yé é a pla zi bɛ la; é a ye aan wo léé, munu faa lé wo bɔ a sɔnɔ, wo dɔ, é sɔ fwila a ta.

¹³ Dé wa si zia, mi faa go Joab zuo, Bikri be Sééba zuo binle we ma.

¹⁴ Joab gié Izraɛl bɛnnu faa ta, ’té éé goo Abɛl‐Bɛt‐Maaka zia, yé mi kprakpranu faa zén ékeva yé wo go a zuo.

¹⁵ Yé wo da Sééba mabɛn lɛ Abɛl‐Bɛt‐Maaka, yé wo tɛrɛ zun dɔ fɔɔ yé é bɔ flamunu lé savulina yɛrama. ’Té Joab vamunu faa é fla gɔrɔ gane wuo blé, flagɔrɔ zanale we gi.

¹⁶ Yé wedɔɔ le do siaa fla yé é léé: ’Ka tɔné dɔoo, ’ka tɔné dɔ! Kalé zanté, ’ka fe Joab lɛ léé, ’é bié ’ko. É sɔ an lɛ léé, maa we fe a lɛ.

¹⁷ É bié a va yé lezan léé: Bii ɛ ke Joab nyaa? É léé: Maa lé. Yé é lé a lɛ léé: ’I tɔné dɔ i wuo le dére lɛ. É léé: An tɔné a i lɛ.

¹⁸ Yé lezan léé: Wa fé é vinin léé: Wa laa Abɛl lee ma. Yé we faa é nyaa ’bɛ zo.

¹⁹ Fla ’ko a fla drɔɔ valé yarapawela fla nya Izraɛl; yé fla lé ke Izraɛl bu do nya, bii a kwa kulina a guru zanale a gi we maa? Mɛmalé i a Gakelebale lé tɔnɔfɛ sɛrɛnaa?

²⁰ Joab léé: An gi bɔrɔle a fɛ sɛrɛle valé fɛ guru zanale a gi ma baa.

²¹ É ’ka ’bɛ zo lo. Naa, mi do lé é si Éfraim gɔ ma, wa laama Bikri be Sééba, é nwa minwiinzan David ma; ’i yee do kpen pa an lee, yé an dan si lɛ fla ma baa. Lezan lé Joab lɛ léé: Bé ye, wo dan a ’wuo vuli lɛ i lɛ flagɔrɔ zi.

²² Yé lezan go munu va élé wedɔɔle nya; yé wo Bikri be Sééba ’wuo kini yé wa vuli Joab lɛ. Joab béli fɛn; wo si fla ma, yé wo faa go ’wolé sɔkɔnnu ’léé. Yé Joab nɔla Jérusalɛm minwiinzan va.

²³ Joab a sunyanu faa nwiinzan nya; Jéojada be Bénaja a Kérétimunu valé Pélétimunu nwiinzan nya;

²⁴ Adoram a gɔɔlibansizan nya; Akilud be Jozafat a sɛbɛ tadɔzan nya;

²⁵ Séja a sɛbɛgyɛzan nya; Sadɔk valé Abiataa a Balebanzannu nya;

²⁶ yé Jaii mi Ira a David lé tɛrɛnwiinzan nya.