2 Samuɛl 2 - Kazambale lé Sebe Sauunu 1979

David kɛlɛ Judanu nwiinzan nya

¹ ’Bɛ zuo, David we laa Gakelebale lee yé é léé: ’An goo Juda lé fla do taa? Gakelebale a zi pa léé: ’I go. David léé: ’An go kyɛɛn? Yé Gakelebale léé: ’I go Ébrɔn.

² David go ana, é na fié nya é va, Jizréɛl le Akinoam valé Nabal na Kaamɛl le Abigail, wo lé.

³ David go é vamunu nya é ziin, ’wo valé ’wolé kɔngimunu nya; yé wo nyana Ébrɔn lé flanu ta.

⁴ Judamunu da yé wo nyɔnɔ zén David nwiin ’bɛna, a kɛlɛle Juda munu nwiinzan blɛn nya we gi. Wo lé David lé léé: Galaad tɛrɛ la Jabɛs munu ɛ Saul pa.

⁵ David munu nwunvɔ Galaad tɛrɛ la Jabɛs munu va, a fele we gi wo lɛ léé: Ka we zin kɛlɛ kazan Saul lɛ yé ka a pa, amalé Gakelebale ’é ka drɔɔ vo ma.

⁶ Yé sin Gakelebale ’é zin valé tɔnégidrɔɔ we kɛlɛ ka lɛ ma. Kalé we kɛlɛle ’bɛ zo lé we ma lé, maa é ziin, an dan wezin kɛlɛ lɛ ka lɛ.

⁷ ’Ka bɛ dɔ plɛplɛ ma, yé ’ka kɛlɛ nyanazannu nya ma; naa, kazan Saul ga yé Juda munu nyɔnɔ zén an nwiin léé, ’an kɛlɛ wo nwiinzan blɛn nya.

Isi‐Bɔsɛt kɛlɛ Izraɛlnu nwiinzan nya

⁸ Naa, Saul lé sunyanu zilɛzan Nɛɛ be Abinɛɛ, é Saul be Isi‐Bɔsɛt si yé é goan Maanaim

⁹ yé é a dɔ Galaad tɛrɛ koo, Gésuunu koo, Jizréɛl koo, Éfraim koo, Bɛnjamɛn koo, Izraɛl faa koo, wo nwiinzan blɛn nya.

¹⁰ Bléyian va lé Saul be Isi‐Bɔsɛt kinin Izraɛl nwiinzan nya, ’té a lɛɛ a yɔ fié yé é pla Izraɛl munu nwiin lɛɛ fié. Juda lé bɛnnu saa ɛ vo é yerele David ma.

¹¹ David nyana Ébrɔn yé é pla Judanu nwiin ’bɛna lɛɛ sɔrafié moné suiɛdo.

Izraɛlnu valé Judanu guli dan

¹² Nɛɛ be Abinɛɛ valé Saul be Isi‐Bɔsɛt lé munu si Maanaim gole gulidanle Gabaɔn va we ma.

¹³ Séruja be Joab valé David lé munu é zén zia é ziin. Wo kee Gabaɔn lé ’yiba sɔnɔ yé wo dɔ ’bɛna; mi koɛnu a ’yiba zi mun yé mi koɛnu a ’yiba zi ’ko zia.

¹⁴ Abinɛɛ lé Joab lɛ léé: Pɛniɛnu ’é nwa ’wo guli dan ko yuɛ va ma. Joab léé: ’Wo nwa ma.

¹⁵ Wo nwa yé wo bié. Wo ’léé bɔ ékema, Bɛnjamɛn valé Saul be Isi‐Bɔsɛt zé a mi vu ta fié, yé David zé a mi vu ta fié.

¹⁶ Wo faa do do kun ’wo ke ’wuo ma yé wo ’wo ke fɔn wo sɛe gi yé wo faa dia ékeva, yé fɛkona lé é ke Gabaɔn sɔnɔ wa tɔ pa Elkat‐Asurim.

¹⁷ Yé wo guli ’lɛ plɛplɛ dan fɛkona yi ’ko la, yé David lé munu Abinɛɛ valé Izraɛl munu kele.

¹⁸ Séruja be yaanu ana bɛ. Joab koo, Abisai koo, Azaɛl koo, woo lé. Azaɛl gane bɛn ’ka tɛrɛ la lo, é a bélé plɛn‐an zo bwi gi.

¹⁹ É go Abinɛɛ zuo yé é ’ka diéra lɛ a zuo lo, dé a bɛyilazia léé, dé a bɛbolazia léé, ana lo.

²⁰ Abinɛɛ ’é zuo gini yé é léé: Azaɛl, bii léé? Yé é a zi pa léé: Maa lé.

²¹ Abinɛɛ lé a lɛ léé: ’I nɔla i bɛyilazia, dé ’bɛ kaan lo, ’i nɔla i bɛbolazia, ’i pɛniɛ do kun yé ’i alé fɛnu si. Naa, Azaɛl ’ka a nyi si lɛ léé, é diéra a zuo lo.

²² Abinɛɛ lé Azaɛl lɛ é ziin léé: ’I si an zuo, mɛmalé i a a va léé, maa i bla yé maa i boo? Yé ’bɛ zuo maa dan i bwe Joab yara nagini lɛ kaa?

²³ Yé Azaɛl ’ka a nyi si lɛ léé, é sié a zuo lo. Amalé Abinɛɛ a fɔn é bɔn la élé dinyili nya, yé é bɔra a lala. É dia yé é ga é nya do. Mi faa lé woo bɔa Azaɛl gana, woo dɔa ’bɛna.

²⁴ Joab valé Abisai Abinɛɛ zuo bin; yiri a vɔna bléyian va, wo bɔ Amma gɔ lé ke Gias yara, Gabaɔn lé bwi la zia, ana.

²⁵ Bɛnjamɛn kulunu kɛlɛ palu do nya yé wo zi sia Abinɛɛ zuo yé wo dɔ gɔpané do nwiin.

²⁶ Abinɛɛ Joab laa yé é léé: Gwɔun éé mi gya yifaamaa? I ’ka a gi dɔɔa léé, a ’wuoplana é dan kɛlɛ lɛ é naané loo? Mɛ yi la léé, i dan a fe lɛ munu lɛ léé, té wo ’wo bwenu zuo bin loo?

²⁷ Joab léé: Bale a é yuɛma; dé i ’ka kɔɔn we fe lɛ lo, ’té munu ’ka daan ’wo bwenu zuo binle ma lo, fɔɔ yé tu é kini.

²⁸ Yé Joab béli fɛn yé munu faa dɔ; yé wo ’ka Izraɛl zuo bin lɛ é dɛrɛ lo yé wo daan guli danle ’wo ke va ma.

²⁹ Abinɛɛ valé élé munu tu kini tawole nya fɛna pɛblɛɛna; wo Juudɛn yuu kini yé wo gié Bitrɔn tɛrɛ faa la yé wo bɔ Maanaim.

³⁰ Joab si Abinɛɛ zuo binna yé é munu faa zén ékeva; David lé mi vu ta sɔraziɛn ’ka ye lɛ lo, Azaɛl koo, é ziin.

³¹ Naa, David lé munu Bɛnjamɛn valé Abinɛɛ lé munu gyɛ wuru do yɔ sɔraa.

³² Wo Azaɛl sia yé wa pa é ti lé mi pana Bɛtléɛm. Joab valé élé munu vo tawona é béli, yé wo bɔ Ébrɔn bléyian va, ’té tu kini.