2 Samuɛl 19 - Kazambale lé Sebe Sauunu 1979

Joab we pla David lɛ

¹ Wo da a fe lɛ Joab lɛ léé: Bé ye, minwiinzan a wuvɔna, ’té éé siaan Abusalɔm wu nya.

² Yé ’bɛ yi nya, guliwuo vole wo lɛ nɔla gyɛbole nya, naa, munu a ’ma léé, minwiinzan bli kyɛ dɔ é baba é be lé we ma, azama.

³ A yi duo nya munu da fla wɔɔɔ bélé yaragyɛmunu lé wo fwila guli ’lɛ, a zo.

⁴ Minwiinzan é yara yɔɔ, ’té éé siaan dére plɛplɛ nya léé: An be Abusalɔm! Abusalɔm, an beoo, an be!

⁵ Kɔn lé minwiinzan ke a gi, Joab wɔra ’bɛna yé é léé: Bii koo, i benu koo, i lunu koo, i nanu koo, i bwɛnu koo, i wuozannu lé wo ka faa lé tɛrɛla si we gi, i wo faa gyɛ yara nya kyɔ.

⁶ I zapamunu sɔ i lɛ, yé i sɔlɛzannu za a i gi. Bé nagɔɔn léé, ilé sunyanu nwiinzannu valé i wuozannu ’ka fɛ do kpen nya i yuɛ gi lo. Sin, maa ye é zima léé, dé é vo lé Abusalɔm a é yuɛma yé ko faa ga kyɔ, ’té ’bɛ sɔ i lɛ.

⁷ Amalé, ’i nwa, ’i bɔra yé ’i wuozannu tɔrɔ paa. An bale ’nyɔɔn léé, dé i ’ka bɔra lɛ lo, mi do kpen ’ka dan vo lɛ i va é béli ’ko lo; yé ’bɛ é dan kɛlɛ lɛ i ma é naané é minié wenaané faa lé wo bɔ i ma, é sia i pɛniɛ la bléyi va fɔɔ kyɔ, é minié wo ta.

⁸ Yé minwiinzan nwa yé é nyana flagɔrɔ ’léé. Yé wo lé munu faa lɛ léé: Ka ye, minwiinzan a é nyanale flagɔrɔ ’léé. Yé munu faa da minwiinzan va. Naa, Izraɛl munu fwila yé wo go wolé sɔkɔn ’léé nuu.

David a gona Jérusalɛm

⁹ Izraɛl bɛnnu faa gi, munu faa a za vɔna, a fele nya léé: David ko si ko nyanézannu lee, yee ɛ ko si Filisitinu lee; yé sin é fwi kolé tɛrɛ la Abusalɔm lee.

¹⁰ Yé Abusalɔm lé ko nyɔnɔ zén a nwiin, a plale ko nwiin we ma, guli a gyɛ; mɛwemalé kaa ’ka a fé léé, minwiinzan David ’é da loo?

¹¹ Yé minwiinzan David we pa Sadɔk valé Abiataa lɛ zia léé: ’Ka fe Juda mi segelenu lɛ léé: Munu faa a fena léé, minwiinzan ’é da élé kɔn ’léé é ziin ’naan, ka lé nɔɔ? Naa, we lé wa fena Izraɛl tɛrɛ faa la é bɔ minwiinzan tɔné gi.

¹² Ka a an bwenu nya, ka a an wɔlɛnu valé an nɛ nya; mɛmalé ka ’ka an dale we fena loo?

¹³ É ziin, ’ka fe Amasa lɛ léé: I ’ka an wɔlɛ valé an nɛ nya loo? Dé i ’ka kɛla anlé sunyanu faa nwiinzan nya Joab pagi lɛɛfaama lo, Gakelebale ’é we kɛlɛ an lɛ élé plɛplɛ faa nya ma.

¹⁴ ’Bɛ zo lé David Juda munu faa bli nɔla é va zia, bélé mi do lé wo nya; yé wo we pa minwiinzan lɛ zia léé: ’I da, bii valé i wuozannu faa nya.

¹⁵ Minwiinzan da yé é bɔ Juudɛn gɔ la; yé Juda munu go Gilgal minwiinzan sile zia valé Juudɛn kinile a nya we gi.

Siméi — Méfibosɛt — Baazilai

¹⁶ Bɛnjamɛn mi Géra be Siméi lé é si Basurim, é da ’yerele yé Juda munu lé wa gona David si lɛ zia, é pa wo va.

¹⁷ Bɛnjamɛn munu wuru soru koo, Saul wuozan Siba koo, Siba benu vu ta soru valé a wuomunu yɔ do koo, wa a va. Wo Juudɛn kini minwiinzan yuɛ va.

¹⁸ ’Té ’yitagoro lé wa nɔ minwiinzan lɛ, é a Juudɛn kinina dale alé kɔngimunu nya we ma; bléyian va lé minwiinzan a gona Juudɛn kinina, Géra be Siméi yia é bli la a ’lɛ.

¹⁹ Yé é lé minwiinzan lɛ léé: Té anlé we ple sele é dɔ anzan gi lo ma; maa anzan minwiinzan ’namawe kɛlɛ a siyi nya Jérusalɛm fɛan zo bɛ, té a sele é dɔ a gi lo ma; té ’bɛ é dɔ minwiinzan gi we nya lo ma!

²⁰ I wuozan a gi dɔɔ é zima léé, ’é wenyané kɛlɛ. Yé bé ye, kyɔ maa dan anzan minwiinzan si lɛ zia Jozɛfu lé kɔngimunu faa vininzan nya.

²¹ Yé Séruja be Abisai dére kun yé é léé: Siméi bale pa Gakelebale lé nyɔnɔzénnwiinzan ma, amalé a ga yara kaan loo?

²² Naa, David léé: Séruja benu, ka gane a anlé we gii? Mɛmalé ka kɛlɛ an mazannu nya kyɔɔ? Wo dan Izraɛl lé mi do gyɛ lɛ kyɔɔ? Maa anbo ye kyɔ é plale Izraɛlnu nwiin.

²³ Yé minwiinzan lé Siméi lɛ léé: I ’ka dan ga lɛ lo. Yé minwiinzan bale ’nyɔɔn a lɛ.

²⁴ Saul be Méfibosɛt da é ziin minwiinzan si lɛ zia. É sia yian nya lé minwiinzan go, a yi nya fɔɔ yé é bɔ yian nya lé é da é ziin drɔɔ, a yi nya, é ’ka é gane ma zuru lɛ lo, yé é ’ka é puo ma gun bo lɛ lo, yé é ’ka élé sɔnu zuru lɛ lo.

²⁵ É si Jérusalɛm yé é da minwiinzan va aan wo, minwiinzan lé a lɛ léé: Méfibosɛt, mɛmalé i ’ka da lɛ an zuo loo?

²⁶ Yé é a zi pa léé: Oo, anzan minwiinzan, i wuozan a furuagyɛzan nya yé maa léé, an dan nyanalafɛ pla lɛ anlé sokofale punu, yé an dan vɔ lɛ a ta yé an dan go lɛ minwiinzan zuo.

²⁷ Yé Siba vié wo i wuozan ma anzan minwiinzan lɛ. Naa, anzan a bélé Bale lé lanje do zo. Dé wean dɔ i gi wezin nya, bé kɛlɛ.

²⁸ I i wuozan pa munu lé wo fɛ blé ilé tablé ta, wo va, dɔlé ’té ga yara a an ti lé kɔngimunu faa yara, anzan minwiinzan yuɛ gi. Amalé a se a an lɛ léé, maa mɛ fɛ laa minwiinzan lee é ziin?

²⁹ Minwiinzan lé a lɛ léé: Mɛmalé i a we kiɛre fenaa? We lé maa fe, yee lé ke ’ko: Bii valé Siba, ’ka tɛrɛnu guli.

³⁰ Yé Méfibosɛt lé minwiinzan lɛ léé: ’É a faa si ma, naa, dé anzan minwiinzan da élé kɔn ’léé drɔɔ, ’bɛ anzé bɔ.

³¹ Galaad mi Baazilai si Rogélim yé wo Juudɛn kini minwiinzan nya ékeva, minwiinzan dɔle zia Juudɛn zi we gi.

³² Baazilai a segele é baba, a lɛɛ a yɔ ziɛn. É a fuablezan baba nya yé bléyian va lé minwiinzan a Maanaim, é a si élé bɛn nya.

³³ Minwiinzan lé Baazilai lɛ léé: ’I da an va yé maa dan i pa lɛ Jérusalɛm.

³⁴ Baazilai a zi pa minwiinzan lɛ léé: Maa dan vo lɛ é yuɛma é ziin lɛɛ nɔɔ, yé an go minwiinzan va Jérusalɛm?

³⁵ Kyɔ an lɛɛ a yɔ ziɛn. Maa wezin valé wenaané va sile dɔɔ? Fɛ lé i wuozan a blé, é valé fɛ lé éé a minian, ’é ’bɛ néné dɔɔ? An lɛrɛvɔmunu valé lɛrɛvɔlomu dére maan é dɛrɛɛ? Yé mɛmalé i wuozan éé kɛla kɔné nya ézan minwiinzan nwiin?

³⁶ I wuozan é dan minwiinzan dɔ lɛ zia Juudɛn zi sɛ. Yé é ziin, mɛmalé minwiinzan é wezin ’ko kɛla an lɛɛ?

³⁷ I wuozan ’é diéra é pai ma, yé an vo anlé fla, an ti valé an bu vun sɔnɔ ma. Naa, i wuozan Kimam lo; é dan yuu kini lɛ anzan va; dé wean dɔ i gi wezin nya azé nya, bé kɛlɛ a lɛ.

³⁸ Minwiinzan léé: Kimam ’é go an va ma, yé we faa lé é sɔ i lɛ, maa dan a kɛlɛ lɛ a lɛ; fɛ faa lé bé laa an lee, maa dan a nɔ lɛ i lɛ.

³⁹ Munu faa Juudɛn kini yé minwiinzan a kini é ziin aan wo, minwiinzan Baazilai tuu gyɛ yé é a drɔɔ vo. Yé Baazilai nɔla élé kɔn ’léé.

⁴⁰ Minwiinzan go Gilgal vazia, ’té Kimam a a va. Judamunu faa valé Izraɛl munu lɛ do valé minwiinzan Juudɛn kini.

Wo zavɔ minwiinzan ta

⁴¹ Yé Izraɛlmunu faa da minwiinzan va yé wo lé a lɛ léé: Mɛmalé ko bwenu Judanu nwa yé wo i si ko lee yé wo Juudɛn kini i nya, bii valé ilé kɔngimunu valé i zuomunu faa nyaa?

⁴² Judanu faa a zi pa Izraɛlnu lɛ léé: Minwiinzan a kobo lé né nya; mɛmalé we ’ko ’na ka maa? Ko fɛ ble minwiinzan nwiin? É blɛ kɛlɛ ko lɛɛ?

⁴³ Yé Izraɛl munu a zi pa Juda munu lɛ léé: Kozé a minwiinzan gi vu, yé David bozen a kozé nya é mini kazé ta. Mɛmalé ka ko ye boazannu nyaa? Ko ’ka mi vininzannu lé wo kolé minwiinzan dale é ziin lé we fe, wo nya loo? Yé Juda munu dére kɛlɛ plɛplɛ é mini Izraɛl munu zé ta.