2 Samuɛl 17 - Kazambale lé Sebe Sauunu 1979

Usai dabli kɛlɛ Abusalɔm lɛ

¹ Asitofɛl lé Abusalɔm lɛ léé: I zi nɔ an lɛ léé, an mi baa suiɛdo si a va. An dan nwa lɛ yé an dan David zuo bin lɛ é béli ’ko.

² Bléyian va lé a wɔlɛi nyaa a ma, ’té a bɛ a tɔɔtɔɔ, maa dan bɔra lɛ a ma fiaa; maa dan kana zén lɛ a gi yé munu faa lé wo ke a va, wo dan vlan buru lɛ, yé maa minwiinzan do kpen ɛ gyɛ,

³ yé maa é dan munu faa nya i va; mi lé i ke a naginina, a gale é dan munu faa nɔla lɛ i va yé munu faa é dan vo lɛ drɔɔ.

⁴ Dére ’ko sɔ Abusalɔm valé Izraɛl mi segelenu faa lɛ.

⁵ Naa, Abusalɔm léé: ’Wo Aaki mi Usai laa é ziin, yé we lé é dan a fe lɛ yé ko ’bɛ ’ma é ziin.

⁶ Usai da Abusalɔm va yé Abusalɔm lé a lɛ léé: We lé Asitofɛl a fe, yee lé ke ’ko. Ko we kɛlɛ a dére ta, laa, té ko kɛlɛ loo? Bé fe.

⁷ Usai a zi pa Abusalɔm lɛ léé: Gɔnɔ do ’ko zé nya, Asitofɛl lé weplale ’ka é zima lo.

⁸ Yé Usai léé: I i ti valé é vamunu lé bli ta plɛplɛ dɔɔ. Wo bli a é flile bélé kua lé wo alé nénu sia, a zo. I ti a gulidanzan nya yé é ’ka dan yii lɛ kyɔ munu va lo;

⁹ Bé ye, sin, é a é yɔɔle guru do gi, dé ’bɛ kaan lo, é a é yɔɔle fɛ bɛna. Yé dé é kɛlɛ léé, a pélisiana dé wo mi ke gyɛ, munu é dan a ’ma lɛ é kele, yé wo dan a fe lɛ léé, wo Abusalɔm zuomunu kele.

¹⁰ Yé wo lé wo bli la ke plɛplɛ é mini wo bɔlunu ta, dé wo bli la a plɛplɛ bélé golizra zé zooo, kana é dan zén lɛ wo gi; naa, Izraɛl faa a gi dɔɔ léé, i ti tɔ ye, yé bli la plɛplɛzannu a a va.

¹¹ Amalé, maa we plaan ka lɛ léé, Izraɛl faa ’é zén ékeva i va, é sia Dan fɔɔ yé é bɔ Bɛɛ‐Sééba, yé ’wo kɛlɛ mi gu nya bélé wɛyi gɔɔn ma nyéné zo. Biibozen é dan go lɛ guli dan lɛ.

¹² Ko dan a dɔ lɛ a ma, dé ko ye fɛana, ana, yé ko dan zana lɛ a ta lolu zanale zo tɛrɛ la; yé mi do kpen ’ka dan so lɛ ko lee lo, dé é a yeebozen nyaoo, dé é a a vamunu nyaoo.

¹³ Dé é go fla do la, Izraɛl faa é dan go lɛ balenu nya fla ’ko va yé wo dan a gana lɛ fɔɔ yé wa zén yuu va, fɔɔ yé wo ’ka ’bɛ fla ganevɔgɔlɛ do yé é dɛrɛ lo.

¹⁴ Abusalɔm valé Izraɛl munu faa léé: Aaki mi Usai lé weplale fila vɔ é mini Asitofɛl zé ta. Naa, é a Gakelebale gi léé, ’é Asitofɛl lé weplale zima kɛla we pla nya, wenaané bɔle Abusalɔm ma we gi.

David so Abusalɔm lee

¹⁵ Usai lé Balebanzannu Sadɔk valé Abiataa lɛ léé: Asitofɛl we pla Abusalɔm valé Izraɛl lé mi segelenu lɛ ’ko zo; yé maa we pla wo lɛ ’ko zo.

¹⁶ Sin, ’ka mi pa zia David va é nya do, ’wa fe a lɛ léé, té é yii bwi la pɛblɛɛna lo, naa, ’é go baa, dé minwiinzan valé é vamunu faa é da zamaga wo.

¹⁷ Jonatan valé Akimaas a é dɔle An‐Rogɛl, wo ’ka bɔa gole lɛ fla lo, dé wo da wo ye; wuo le do go wo va, yé we lé é a lé wa fe David lɛ, é a fe wo lɛ.

¹⁸ Pɛniɛ do wo ye yé é go a zuo fe lɛ Abusalɔm lɛ. Naa, wo fié go fiéfié yé wo bɔ Basurim, gɔnézan do lé, ’yiguru ke alé gɔrɔ gi, alé kɔn ’léé, yé wo zun ’yiguru gi.

¹⁹ Gɔnézan na sɔ si yé é a fwila ’yiguru’léé, yé é ’sawɔlɛ ma sole fwila a ta léé, té mi do kpen a gi dɔɔ lo.

²⁰ Abusalɔm wuomunu da lezan ’ko va kɔn ’léé yé wo léé: Akimaas valé Jonatan a kyɛɛn? Lezan a zi pa wo lɛ léé: Wo yuubɛ kini. Wo wo gini yé wo ’ka wo ye lɛ lo, yé wo diéra yé wo go Jérusalɛm.

²¹ Wo gole zuo, Akimaas valé Jonatan bɔra ’yiguru gi yé wo go we zuo fe lɛ minwiinzan David lɛ. Wo lé David lɛ léé: ’I nwa yé ’i ’yi kini fiéfié, naa, Asitofɛl we ’ko valé we ’ko fe i ma.

²² David valé é vamunu faa nwa yé wo Juudɛn yuu kini; tu kini bléyi va, mi lé é ’ka Juudɛn kini lɛ lo, ’bɛzan ’ka lo.

²³ Asitofɛl a ye aan wo léé, wo ’ka tawo lɛ élé weplale yɛrama lo, é nyanatafɛ pla élé sokofale punu yé é go élé kɔn ’léé élé fla. É é dére vo élé kɔngimunu va, yé ébo dun. ’Bɛ zo lé é ga yé wa pa é ti lé mipana.

²⁴ David bɔ Maanaim. Abusalɔm Juudɛn kini, é valé Izraɛl munu faa nya.

²⁵ Abusalɔm Amasa dɔ sunyanu nwiinzan nya Joab pa gi; Izraɛl mi do lé wa laama Jitra, é go Nakas lu Abigal lé ke Joab bu Séruja buru nya, a va, Amasa a ’bɛ be nya.

²⁶ Izraɛl valé Abusalɔm ’wolé sɔkɔn dɔ Galaad tɛrɛ la.

²⁷ David bɔ aan wo Maanaim, Nakas be Sobi lé é si Amɔn benu lé fla Raba, yee koo, Amiɛl be Makii lé é si Lodébaa, yee koo, Galaad mi Baazilai lé é si Rogélim, yee koo,

²⁸ wo da yialafɛnu koo, kananu koo, tɛrɛbɔnu koo, buruwɔlɛ koo, sɔnmlén koo, burupun koo, fɛwɔlɛ sélile koo, zɔrɛ valé fɛwɔlɛ bɛnu sélile koo,

²⁹ zɔrɔnyɔnɔ koo, dirinyɔyi koo, ’blanu koo, dirinyɔyiyɔɔ koo, wo nya. Wo da fɛ ’konu nya David valé é vamunu lɛ, wolé fɛblele we gi; naa, wa fena léé: Lɔrɔ koo, ’yiminilɔrɔ koo, wo munu ’ko gyɛ bwi gi, yé wo wɔlɛi nyaa wo ma.