2 Samuɛl 16 - Kazambale lé Sebe Sauunu 1979

David valé Siba

¹ David gɔ nwiin kini sɛ aan wo, bé ye, Méfibosɛt wuozan Siba da a va, ’té sokofale fié a a va, wolé kɔnésifɛ nya ’wo punu. Buru wuru do koo, dɔrɔporo gale povɔle yɔ soru koo, lɛɛ da bléyi va yiliporo gale povɔle yɔ soru koo, wikɔlɛkuo do dɔrɔ koo, wa sokofalenu punu.

² Minwiinzan lé Siba lɛ léé: Mɛ lé i da a kɛlɛ lɛ fɛ ’konu nyaa? Siba léé: Sokofalenu a minwiinzan lé kɔngimunu vɔtafɛ nya; buru valé lɛɛ da bléyi va yiliporo a pɛniɛnu lé fɛblele nya, yé munu lé wo wɔlɛi nyaa wo ma bwi gi, dɔrɔ a wo minifɛ nya.

³ Minwiinzan léé: Izan be a kyɛɛn? Yé Siba lé minwiinzan lɛ léé: Bé ye, é vo Jérusalɛm, naa, é léé, kyɔ Izraɛl munu é dan ’é ti lé fuatɛrɛ nɔ lɛ ’é lɛ é ziin.

⁴ Minwiinzan lé Siba lɛ léé: Bé ye, fɛ faa lé ke Méfibosɛt lee, é a izé nya. Yé Siba léé: An yia an bli la! Oo anzan minwiinzan, ’maa i yuɛ gi bɔ ma.

David valé Siméi

⁵ David bɔ Basurim. Yé bé ye, Saul lele do, alé kɔngimi do si ’bɛna; a tɔ lé Géra be Siméi. É bié bale pale David ma nya,

⁶ yé é gɔlɛ vuli minwiinzan David valé é wuozannu va, ’té munu faa valé bli ta plɛplɛ sunyanu a minwiinzan bɛyila valé a bɛbola.

⁷ Siméi bale pa a ma, a fele nya léé: Nyɛzanami, mi ple, ’i gooo, ’i go!

⁸ Saul lé i ke é nyanale alé webleblin ta turu, Gakelebale alé kɔngimunu faa nyɛ dɔ i nwiin ma. Gakelebale ilé fuatɛrɛ nɔ i be Abusalɔm lɛ yé biibozen a nyané blena; i a nyɛzanami nya, azama.

⁹ Yé Séruja be Abisai lé minwiinzan lɛ léé: Mɛmalé blén gale ’ko éé bale paan anzan minwiinzan maa? Ilé zanté, ’i zi nɔ an lɛ léé, ’an go a ’wuo kini.

¹⁰ Naa, minwiinzan léé: Séruja be, i gane a anlé we gii? Dé é bale pa an ma, ’bɛ gi léé, Gakelebale ɛ fe a lɛ léé, ’é bale pa David ma. Amalé de ɛ dan a fe lɛ a lɛ léé, mɛmalé i we kɛla ’bɛ zoo?

¹¹ Yé David lé Abisai valé é wuozanu faa lɛ léé: Ka ye, an be lé é si an bɔn gi, é a a va léé, ’é an gya ’naan, ’té Bɛnjamɛn mi ’ko nii? ’Ka a vo, ’é bale pa ma, naa Gakelebale ɛ fe a lɛ.

¹² Dé Gakelebale é dan anlé nyané blele ye lɛ, yé é wezin kɛlɛ an lɛ kyɔ zé bale pale an ma pa gii?

¹³ David valé élé munu vo tawona, ’té Siméi éé tawoo gɔ san ma, ’té éé David sɔnɔan, ’té éé bale paan a ma, yé ’té éé gɔlɛ vulian a va, ’té éé vun nwɛɛn‐an a va.

¹⁴ Minwiinzan valé é vamunu faa bɔ Ajéfim, yé wo flin ’bɛna.

Abusalɔm da Jérusalɛm

¹⁵ Abusalɔm valé Izraɛl munu faa da Jérusalɛm; ’té Asitofɛl a Abusalɔm va.

¹⁶ David béé, Aaki mi Usai bɔ Abusalɔm va aan wo, é lé a lɛ léé: Minwiinzan ’é vo é yuɛma ma! Minwiinzan ’é vo é yuɛma ma!

¹⁷ Yé Abusalɔm lé Usai lɛ léé: ’Bɛ zo lé i yerean i béé maa? Mɛmalé i ’ka go lɛ i béé va loo?

¹⁸ Usai a zi pa Abusalɔm lɛ léé: Mi lé Gakelebale koo, munu ’ko koo, Izraɛl munu koo, wa si a va ’wozé nya, maa a ’bɛzan ɛ va, yé ’bɛzan va lé maa a a va lé an vo.

¹⁹ Dé ’bɛ kaan lo, maa dan mi kyɛn lé nyanama pa lɛɛ? A be zé kaan loo? An nyanama pa i ti lɛ fɛan zo, a zo duo lé an dan nyanama pa lɛ i lɛ.

²⁰ Abusalɔm lé Asitofɛl lɛ léé: ’Ka ka va we ble; ko kɛla kaa?

²¹ Yé Asitofɛl lé Abusalɔm lɛ léé: I ti bwɛnu lé é wo vo kɔn ta yuɛpazannu nya, ’i go wo va; ’bɛ zo lé Izraɛl faa é dan a gi dɔɔ lɛ léé, i gin dɔ i ti nyé gi yé i vamunu bli ta é dan dɔ lɛ plɛplɛ.

²² Wo Abusalɔm lé sɔkɔn dɔ kɔn gwa ta yé Abusalɔm go é ti bwɛnu va Izraɛl faa yuɛ va.

²³ ’Bɛ bléyi va, wenu lé Asitofɛl a plaan mi lɛ, wa plɛplɛ bélé Bale bozen dére zo. Dé David lɛ léé, dé Abusalɔm lɛ léé, a zo lé Asitofɛl lé weplale ke.