2 Samuɛl 14 - Kazambale lé Sebe Sauunu 1979

Joab kwa kuli Abusalɔm dale ma

¹ Séruja be Joab a ye léé, minwiinzan bli a Abusalɔm vazia.

² É gi kini le do laa Tékoa, léé, ’é da ’é va, yé é lé a lɛ léé: ’Ibo nagɔɔn blikyɛdɔzan nya, ’i gyɛbo sɔ zén i ta; té i nyɔnɔ gié i ma lo, yé ’i kɛlɛ bélé le lé alé mi ga namɔn, a zo.

³ A zo lé i dan go lɛ minwiinzan va, yé i dan we fe lɛ a lɛ ’ko zo. Yé we lé é dan a fe lɛ, Joab a pa a ’léé.

⁴ Tékoa le go we fe lɛ minwiinzan lɛ. É dia é yara tɛrɛ va, yé é yia é bli la yé é léé: Oo minwiinzan, ’i bɔ an va ma!

⁵ Minwiinzan lé a lɛ léé: Mɛ léé? É a zi pa léé: Maa a zanagala le nya, an zana ga.

⁶ I wuozan be a fié; wo we sia féi yé wo kini ékemazan ’ka lo; a do é bɔluzan gyɛ yé é ga.

⁷ Yé bé ye, ko gɔnɔlamunu faa nwa i wuo le ma, a fele nya léé: Mi lé é é bwe gyɛ, bé pa ko lee! Ko a a va léé, ko a gyɛ, a bwe lé é a gyɛ, a lɛgi nya; dé é a zarablezan nyaoo, ko gya. ’Bɛ zo léé, kyɛpéli lé é vo an lee wo dan a diri lɛ, yé wo ’ka an zana tɔ valé a paizan voo tɛrɛ la lo.

⁸ Minwiinzan lé lezan lɛ léé: ’I go ilé kɔn ’léé. Maa dan béli do dɔ lɛ ilé we ma.

⁹ Tékoa le lé minwiinzan lɛ léé: Anzan minwiinzan, we ’ko, maa valé an ti lé kɔngimunu nwiin lé é dan dɔ lɛ; é ’ka minwiinzan valé élé webleblin nwiinwe nya lo.

¹⁰ Minwiinzan léé: Dé mi do i ma we fe, ’i da a nya an va, yé é ’ka dan é bɛ mane lɛ i ma é dɛrɛ lo.

¹¹ É léé: Gakelebale, ilé Bale sele é dɔ minwiinzan gi ma; té nyɛ lɛipazan é guru zanagiwe lɛ si, yé wo an be gyɛ zamaga nya lo we gi. Yé David léé: Gakelebale a é yuɛma. I be nwin gɔ do kpen ’ka dan dia lɛ tɛrɛ la lo.

¹² Lezan léé: ’I zi nɔ i wuo le lɛ yé é dére gɔ do fe ézan minwiinzan lɛ. Yé é léé: Bé fe.

¹³ Lezan léé: Mɛmalé, dé é a Bale lé munu lé we nya ’naan, i ’ka we yuɛ gi boo yee duo zo loo? Dére ’ko fele nya lé minwiinzan we dɔ ébo nwiin; naa, a be lé é a bin, é ’ka da lɛ a nya lo, azama.

¹⁴ Ko faa é dan ga lɛ webozen nya, yé ko a bélé ’yi lé wa zana tɛrɛ va yé wo ’ka bɔa a siale lɛ é ziin lo, a zo. Bale ’ka mi lé tɛrɛla nyaan lo, yé éé we kɛla fɔɔ yé vɔfliizan ’é da a va é pa gi.

¹⁵ Sin, wean ma lé maa da we ’konu fe lɛ anzan minwiinzan lɛ, munu kana vɔ an gi, yee lé. Yé i wuo le léé, ’é dan we fe lɛ minwiinzan lɛ, dé é dan é wuo le dére lɛdɔ lɛ a maa?

¹⁶ Iin, minwiinzan é dan é tɔné dɔ lɛ é wuo le lɛ, munu lé wa a va léé, ’wo Bale zarablele yi ga maa valé an be lee, ko sile wo lee we gi.

¹⁷ I wuo le léé: Anzan minwiinzan dére ’é flinle nɔ an lɛ ma. Naa, anzan minwiinzan a bélé Bale lé lanje do zo, ’té a tɔné a é dɔle wezin valé wenaané lɛ. Gakelebale, ilé Bale, ’é kɛlɛ i va ma.

¹⁸ Minwiinzan lé lezan lɛ léé: We lé maa dan a laa lɛ i lee, té bé yɔɔ an ma lo. Yé lezan léé: Anzan minwiinzan, ’é we fe ma.

¹⁹ Yé minwiinzan léé: Joab ’ka i nwunvɔ lɛ lo ’naan, i da ibo ’wuo gii? Yé lezan a zi pa léé: Anzan minwiinzan, i léli a é yuɛma fɛan zo bɛ, bé gyɛ é wɔlɛ la, i ’ka paa lɛ a ma lo. Weboen lé, i wuozan Joab ɛ an nwunvɔ yé é dére ’konu faa pa i wuo le ’léé.

²⁰ We ’ko nɔlale we ma lé i wuozan Joab a kɛlɛ a zo. Naa, anzan we dɔɔ bélé Bale lé lanje do zo, we faa lé é bɔ tɛrɛ la, é a dɔɔ.

Abusalɔm da é pai Jérusalɛm

²¹ Minwiinzan lé Joab lɛ léé: Bé ye, é sɔ an lɛ é zima léé, maa kɛlɛ a zo; amalé ’i go, ’i da pɛniɛ Abusalɔm nya.

²² Joab dia é yara tɛrɛ va yé é yia é bli la, yé é minwiinzan drɔɔ vo. A zuo é léé: Anzan minwiinzan we kɛlɛ é wuozan dére ta, bɛwemalé i wuozan a gi dɔɔ kyɔ léé, é a mi zin nya i yuɛ gi.

²³ Yé Joab nwa, yé é go Gésuu yé é da Abusalɔm nya Jérusalɛm.

²⁴ Naa, minwiinzan léé: ’É go élé kɔn ’léé ma, té ’é an yara ye lo ma. Yé Abusalɔm go élé kɔn ’léé yé é ’ka minwiinzan yara ye lɛ lo.

²⁵ Mi do kpen ’ka Izraɛl yé ’bɛ nɔnɔmi gié Abusalɔm ta lo; é sia a gane bulii fɔɔ yé é bɔ a nwiin loru, a kɔlɛ ma a yɔrɔyɔrɔyɔrɔ.

²⁶ A nwin bɛn a, amalé éé a bɔié lɛɛ do do ma. Dé é nwin bɔi a bɛn a sikla wuru do, minwiinzan lé fɛ pɛzéwo sikla nya.

²⁷ Abusalɔm né yaa gɔné yaa le do. Wa lu tɔ laama Tamaa; a yara a é nɔnɔmi.

²⁸ Abusalɔm nyana Jérusalɛm lɛɛ fié, ’té é ’ka minwiinzan yara yé lo.

²⁹ É Joab laa léé, ’bɛ go é nya minwiinzan va; naa, Joab ’ka a va léé, é go a va lo. É a laa a gɔnɔ fiézan nya, yé Joab ’ka a va léé, é go lo.

³⁰ Yé Abusalɔm lé é wuozannu lɛ léé: Ka ye, Joab lé féi a anlé féi bɛ do la; sɔnmlén ana; ’ka go ’ka kyɛ vɔ. Yé Abusalɔm wuozannu féi kyɛ vɔ.

³¹ Joab nwa yé é go Abusalɔm va alé kɔn ’léé. É lé a lɛ léé: Mɛmalé i wuozannu anlé féi kyɛ vɔɔ?

³² Abusalɔm a zi pa Joab lɛ léé: Bé ye, maa i laa léé, ’i da ’ko, yé maa i pa zia minwiinzan va ilé a fele a lɛ we gi léé, mɛmalé an si Gésuu? A fila vɔ kɔɔn léé, an vo ana mi. Sin, maa a a va léé, maa minwiinzan yara ye; yé dé wenyané a an gi, ’é an gyɛ yé ’an ga.

³³ Joab go minwiinzan va yé é we ’ko zuo fe a lɛ. Yé minwiinzan Abusalɔm laa, yé é da a va yé ébo yia tɛrɛ va a yuɛ va. Minwiinzan pwɛpwɛ vɔ Abusalɔm ma.