2 Samuɛl 13 - Kazambale lé Sebe Sauunu 1979

Aminɔn valé Tamaa lé we

¹ ’Bɛ zuo, we lé é bɔ, yee lo. David be Abusalɔm zuané do ana le nya. É a é nɔnɔmi yé wa tɔ laama Tamaa; é sɔ David be Aminɔn lɛ.

² Aminɔn bli bɔ é zuané Tamaa ma fɛan zo, é vɔ a ma gyɛ nya; naa, é a le lé é ’ka tan gɔné dɔɔ lɛ lo, a nya, yé é dɔ Aminɔn gi léé, we kɛlɛle a vazia a plɛplɛ.

³ Aminɔn béé do ana, é a David bwe Siméa be Jonadab nya, yé Jonadab a gi kinizan nya.

⁴ É lé a lɛ léé: Mɛmalé biian i ke minwiinzan be nya, ’té i go kwééle nya yi faa do do maa? I ’ka bɔaléé, bé gi fe an lɛ loo? Aminɔn lé a lɛ léé: An zuané Abusalɔm zuané Tamaa sɔ an lɛ.

⁵ Jonadab lé a lɛ léé: ’I yia yé ’ibo kɛlɛ gyɛkɛlɛzan zo. Dé i ti da we lɛ i va, bé fe a lɛ léé, ’é zi nɔ i zuané Tamaa lɛ léé, ’é da fɛ nya i lɛ; ’é da fɛ dɔne i yuɛ va, yé i fɛ si a lee iboan.

⁶ Aminɔn yia, yé ébo kɛlɛ gyɛkɛlɛzan zo. Minwiinzan da we lɛ a va, yé Aminɔn lé a lɛ léé: Ilé zanté, an zuané Tamaa ’é da gato fié kɛlɛ an yuɛ va yé maa a ble a leefɛ nya ma.

⁷ Tamaa a élé kɔn gi yé David we pa a lɛ zia léé: ’I go i bwe Aminɔn lé kɔn gi yé ’i fɛ kɛlɛ a lɛ.

⁸ Tamaa go é bwe Aminɔn lé kɔn gi, ’té é a é yiale. É buru yɔɔ si yé é vo a vɔna a ta yé é gato kɛlɛ yé é wo dɔne;

⁹ yé é wo si ’wo dɔnefɛ gi yé é wo dɔra Aminɔn ma. Naa, Aminɔn ’ka wo ble lɛ lo. É léé: Munu faa ’é bɔra ma. Yé munu faa bɔra alé kɔn gi.

¹⁰ Yé Aminɔn lé Tamaa lɛ léé: ’I da fɛ nya kɔnmi zi yé maa a ble i leefɛ nya. Gatonu lé Tamaa a kɛlɛ, é wo si yé é go wo nya é bwe Aminɔn lɛ, kɔnmi zi.

¹¹ É wo nɔ a lɛ aan wo, é ’bɛ kun yé é léé: An zuan, ’i da, maa yia i va.

¹² É lé a lɛ léé: An bwe, gba, té i an sɛrɛ lo; wo ’ka ’bɛ zo we kɛla Izraɛl lo; té i weple tiridɔle ’ko kɛlɛ lo.

¹³ Maa dan go lɛ kyɛn yaragyɛwe nyaa? Yé bii, i dan kɛlɛ lɛ weple tiridɔle kɛlɛzan nya Izraɛl. Sin, ilé zanté, ’i we fe minwiinzan lɛ, é ’ka dan an nyané kɛlɛ lɛ i lɛ lo.

¹⁴ Naa, é ’ka é tɔné dɔ lɛ a lɛ lo; é yia a va gla nya yé é a sɛrɛ.

¹⁵ ’Bɛ zuo, a za kɛlɛ Aminɔn gi blɛn é mini a sɔle a lɛ ta. Yé é lé a lɛ léé: ’I nwa, ’i go.

¹⁶ É lé a lɛ léé: Wenaané lé bé kɛlɛ an lɛ, té bé gi gyɛ an binle nya lo.

¹⁷ É ’ka é tɔné dɔ lɛ a lɛ lo, yé ’é wuogɔné do laa yé é léé: ’I le ’ko si an va yé ’i goan béera. Yé ’i kɔn lɛ tan a lee.

¹⁸ Sɔ nyɔɔzan a Tamaa ta; é a sɔ lé minwiinzan lunu a zén‐é ’wo ta, bléyian va lé wo ’ka tan gɔné dɔɔ lɛ lo, a nya. Aminɔn wuozan goan béera yé é kɔn lɛ tan a lee.

¹⁹ Tamaa kyɛyee zén ’é nwiin yé élé sɔ nyɔɔzan fia; é bɛ pla é nwiin yé é go wu blɛn vɔle nya.

²⁰ A bwe Abusalɔm lé a lɛ léé: I bwe Aminɔn we kɛlɛ i lɛɛ? Sin, an zuan, ’i tadɔ, i bwe lé; té we ’ko é ’na i ma é baba lo. Yé Tamaa vo é bli gi kyɛ dɔle nya é bwe Abusalɔm lé kɔn gi.

²¹ Minwiinzan David we ’konu ’ma yé a bli fli é baba.

²² Dé é a wezin nyaoo, dé é a wenaané nyaoo, Abusalɔm ’ka a do kpen fe lɛ Aminɔn lɛ lo, naa, é a za pa é bli gi; é a zuané Tamaa sɛrɛ, azama.

Abusalɔm ézé we lɛgi pa

²³ ’Bɛ zuo lɛɛ fié, Abusalɔm lé trubɛ kyɛɛ bɔi munu a Baal‐Asɔɔ, Éfraim sɔnɔ, yé é minwiinzan benu faa laa ana.

²⁴ Abusalɔm go minwiinzan va yé é léé: Bé ye, trubɛ kyɛɛ bɔi munu a i wuozan va; minwiinzan valé é wuomunu ’é da i wuozan va ma.

²⁵ Yé minwiinzan lé Abusalɔm lɛ léé: An be, gba, ko faa ’ka dan go lɛ lo, dé ko da kɛlɛ kɔné nya i nwiin. Abusalɔm a tunu; naa, minwiinzan ’ka a va léé, ’é go lo, yé é a drɔɔ vo.

²⁶ Abusalɔm léé: Dé i ’ka dan lo, ’i zi nɔ an bwe Aminɔn lɛ léé, ’é da ko va. Minwiinzan léé: Mɛmalé é goo i vaa?

²⁷ Abusalɔm a tunu, amalé minwiinzan zi nɔ é benu faa valé Aminɔn lɛ léé, ’wo go a va.

²⁸ Abusalɔm é wuomunu faa béli dɔ léé: ’Ka yuɛ pa Aminɔn va, yé dé a gi nana nwɛ minile ma, dé maa fe ka lɛ léé, ’ka Aminɔn gyɛ, ’ka gyɛ; té ka kana lo; maa‐an maa fe loo? ’Ka dɔ gligli yé ’ka gɔnéwe nagɔɔn.

²⁹ We lé Abusalɔm wo béli dɔ a nya Abusalɔm wuomunu a kɛlɛ Aminɔn lɛ. Yé minwiinzan benu faa nwa yé wo vɔ ’wolé sokofale punu do do, yé wo fwila.

³⁰ Wa zia bléyian va, David a gun ’ma léé, Abusalɔm minwiinzan benu faa gyɛ, a do kpen ’ka vo lɛ lo.

³¹ Minwiinzan nwa, élé sɔ fia yé é yia tɛrɛ va; ’té a wuomunu faa ana bɛ é ziin, ’bɛnu wolé sɔ fia.

³² David bwe Siméa be Jonadab dére kun yé é léé: Té é dɔ anzan gi léé, minwiinzan benu faa ɛ ga lo; pɛniɛnu faa kaan lo, naa, Aminɔn do kpen ɛ ga; we lé ke Abusalɔm bli gi, é sia yian nya lé Aminɔn a zuané Tamaa sɛrɛ, a yi nya fɔɔ kyɔ, yee lé é a lɛ sɔɔ.

³³ Amalé té anzan minwiinzan é nyané pa ébo ta é gi bɔrɔle nya lé, minwiinzan benu faa ga lo, naa, Aminɔn do kpen ɛ ga.

³⁴ Abusalɔm vɔ fli gi. Fla tagini pɛniɛ é yara nwa yé é a nagini. Yé bé ye, mi palu blɛn a dana, zi lé ke a zuo, gɔ nyé zunna, a ta.

³⁵ Jonadab lé minwiinzan lɛ léé: Minwiinzan benu lé wo dan bɛ! ’Bɛ zo lé i wuozan dére lɛ sɔɔ.

³⁶ É nyaa wefele nya tɔɔn, yé minwiinzan benu bɔ. Wo dére bié, yé wo wuvɔ; minwiinzan valé é wuomunu faa é ziin, wo yuɛyi zén kiɛre.

³⁷ Abusalɔm vɔ fli gi yé é go Gésuu nwiinzan Amiuu be Talmai va. ’Té David é be wuvɔa yi faa do do ma.

³⁸ Gésuu lé Abusalɔm vɔ fli gi yé é go ana bɛ, é vo ana lɛɛ yaa.

³⁹ Wo David tɔrɔ paa é be Aminɔn gale ma, amalé é daan Abusalɔm zuo binle ma.