2 Samuɛl 12 - Kazambale lé Sebe Sauunu 1979

Natan Bale dére fe David lɛ David bli nɔla

¹ Gakelebale Natan pa zia David va. Yé Natan da a va yé ’bɛ lé a lɛ léé: Fla do la gɔné fié ana, a do a fuablezan nya yé a do a nyanégyɛzan nya.

² ’Blanu valé dirinu a fuablezan lee kiɛre é baba.

³ Fɛ do kpen ’ka nyanégyɛzan lee lo, fɔɔ, ’bladané do lé é a lɔ, yee ɛ ke a lee; éé fɛ no a lɛ, ’té éé tin‐é alé kɔn gi alé nénu va; éé alé buru blé, éé yi minian alé yiminikana gi, éé yi gya a blinii, yé é a ye ébo lu zo.

⁴ Bɛn da fuablezan va. É ’ka sɔ lɛ fuablezan lɛ léé, é ’élé ’blanu valé ’élé dirinu do si yé é bɛn lɛ wɛɛ a nya lo; é nyanégyɛzan lé ’blané ’ko si yé é a dɔne gɔnézan lé é da alé kɔn ’léé, a lɛ.

⁵ David bli fli é baba gɔné ’ko ma yé é lé Natan lɛ léé: Gakelebale a é yuɛma! Mi lé é we ’ko kɛlɛ, a yara lé ’é ga.

⁶ É we ’ko kɛlɛ yé a nyanai ’ka zén lɛ gɔnézan ta lo, amalé é dan ’bla ziɛn nɔ lɛ a lɛ.

⁷ Yé Natan lé David lɛ léé: Bii ɛ ke yee mi ’ko nya. Gakelebale, Izraɛl lé Bale léma: Maa nyɔnɔ zén i nwiin i kɛlɛle Izraɛl nwiinzan blɛn nya we ma, yé maa i si Saul lee.

⁸ Maa izan lé kɔn nɔ i lɛ; yé maa izan nanu vɔ i blinii, yé maa Izraɛl valé Juda nɔ i lɛ. Yé dé ’bɛ a kɔɔn kiéné, ’té maa a taa paan é ziin.

⁹ Mɛmalé i sɔn vɔ Gakelebale dére ma, we lé ke é naané a yuɛ gi, a kɛlɛle nyaa? I Éti mi Uri gyɛ gwɔun nya; bé na si izé nya yé bébozen gyɛ Amɔn munu lé gwɔun nya.

¹⁰ Sin, i sɔn vɔ an ma, yé i Éti mi Uri na si i na nya, amalé gwɔun ’ka dan si lɛ ilé kɔn ma monomono lo.

¹¹ Gakelebale léma: Bé ye, maa dan wenyané bɔ lɛ i ma izé kɔngizan nya, yé maa dan i nanu si lɛ i yuɛ va yé maa dan wo nɔ lɛ mi bɛ lɛ yé é dan yia lɛ wo va yiri la.

¹² Izé kɛlɛ kyeen gi; maa, an dan we ’ko kɛlɛ lɛ gɔrɔ la Izraɛl munu faa yuɛ va.

¹³ David lé Natan lɛ léé: Maa wenyané kɛlɛ Gakelebale ma! Yé Natan lé David lɛ léé: Gakelebale i ma we vo, i ’ka dan ga lɛ lo.

¹⁴ Naa, we ’ko kɛlɛle nya lé i zi nɔ Gakelebale nyanézannu lɛ léé, wo Gakelebale sɔnɔ, amalé négɔné lé wa yaa i lɛ, é dan ga lɛ.

¹⁵ Yé Natan go élé kɔn ’léé. Né lé Uri na a yaa David lɛ, Gakelebale gyɛ vɔ a ma yé é kɛlɛ plɛplɛ.

David be ga

¹⁶ David né ma bazoro Bale lɛ yé é lɔrɔ sɔn; é wɔra kɔn gi yé é tu kini é yiale tɛrɛ va.

¹⁷ Alé kɔn gi mi segelenu a ma kyɛ dɔ léé, ’é nwa tɛrɛ va yé é ’ka a nyi si lɛ lo, yé é ’ka fɛ do kpen ble lɛ wo va lo.

¹⁸ A yi sɔrafiézan nya, né ga. David wuomunu a kanana a fele ma a lɛ léé, né ga. Naa, wo léé: Ka ye, bléyian va lé né a tan é yuɛma, ko we fe a lɛ yé é ’ka é tɔné dɔ lɛ ko lɛ lo, ko kɛla kaa yé ko fe a lɛ léé, né gaa? É dan nyané taa pa lɛ ébo ta.

¹⁹ David a ye léé, é wuomunu a we fena ’wo ke lɛ gun gi, yé é a ’ma léé, né ga. É lé é wuomunu lɛ léé: Né gaa? Yé wo léé: Iin, é ga.

²⁰ Yé David nwa tɛrɛ va. É zuru, é nyɔnɔ gié ’é ma yé élé sɔ tavɔɔ; a zuo é go Gakelebale lé kɔn gi yé é yia é bli la. É nɔla élé kɔn ’léé aan wo, é léé, ’wo da fɛ nya ’é lɛ, yé é fɛ ble.

²¹ A wuomunu lé a lɛ léé: We lé i ke a kɛlɛna, a gi lé nɔɔ? Bléyian va lé né a é yuɛma, ’té i lɔrɔ sɔn‐o, ’té i wuvɔa; yé sin, né ga yé i nwa yé i fɛ blee?

²² É a zi pa léé: Bléyian va lé né a tan é yuɛma maa lɔrɔ sɔn‐o, ’té maa wuvɔa, naa, dé Gakelebale nɔdan é nyanai zén lɛ an ta yé né é vo é yuɛmaa? dé ɛ gi dɔɔ?

²³ É ga sin, mɛmalé maa lɔrɔ sɔn é ziin? An bɔa dale lɛ a nya é ziin? Maa dan go lɛ a va, naa, é ’ka dan da lɛ an va lo.

Salomɔn yaale

²⁴ David é na Bat‐Sééba tɔrɔ paa, yé é go a va yé é yii a va. É négɔné yaa yé wa laa Salomɔn yé é sɔ Gakelebale lɛ.

²⁵ É a pa balelayezan Natan lee yé ’bɛ a tɔ pa Jédija, Gakelebale lé we ma.

Wo Raba si

²⁶ Joab Amɔnnu lé fla Raba mabɛn, yé é minwiinzan lé fla si,

²⁷ yé é munu nwunvɔ David va a fele we gi léé, an go guli dan lɛ Raba va, yé maa ’yibai fla si;

²⁸ ’i munu zén ékeva yé ’i nwa fla ma yé bé si, dé maa da a si anboan yé a sitɔ ’é vo an lɛ.

²⁹ David munu faa zén ékeva yé é nwa Raba ma. É guli dan a va yé é a kele.

³⁰ É kyankoro si ana minwiinzan nwiin; a bɛn a kyan talan do nya yé a ma a é ’lɛrɛle gɔlɛwezannu nya. Wa wo David ’wuo ma yé é gulizarafɛnu kiɛre kiɛre si fla ’ko la.

³¹ É ana munu bɔra yé é wo kɛlɛ yiliféngyɛmunu koo, tɛrɛkanlamunu koo, zaa nya nyanamapa munu koo, brikigyɛ?-?munu koo, wo nya; é yee duo kɛlɛ Amɔn benu lé fla faa la. David valé munu faa nɔla wo pa gi Jérusalɛm.