2 Samuɛl 11 - Kazambale lé Sebe Sauunu 1979

David valé Bat‐Sééba

¹ ’Bɛ lɛɛ bɛ gi, bléyian va lé minwiinmunu éé goo guli dan lɛ, Joab koo, David wuomunu koo, Izraɛl faa koo, David wo pa zia Amɔn munu sɛrɛle tata we gi, é valé Raba munu mabɛnle we gi. Naa, David vo Jérusalɛm.

² Yi do nya nyanadi, David nwa élé yialafɛ ta; é a dɔwona minwiinzan lé kɔn gwa ta aan wo, é le do ye zuruna; le ’ko a é nɔnɔmi.

³ David le ’ko ta laa léé, de lu léé? Yé wo lé a lɛ léé: Éliam lu Bat‐Sééba, Éti mi Uri na kaan loo?

⁴ Yé David munu nwunvɔ léé, ’wo da a nya ’é va. É da a va yé é yii a nya. Dé é gi bɔ faa é go élé kɔn ’léé.

⁵ Le ’ko bɔn si yé é we pa David lɛ zia léé, ’é bɔn si.

⁶ Yé David we pa Joab lɛ zia léé, ’é Éti mi Uri pa zia ’é va. Yé Joab Uri pa zia David va.

⁷ Uri go David va yé Joab koo, munu koo, guli danle koo, David wo tawe laa a lee.

⁸ A zuo David lé Uri lɛ léé: ’I go ilé kɔn ’léé yé i gane ma zuru. Uri bɔra minwiinzan lé kɔn gi yé wo go a zuo blɛ lé minwiinzan a kɛlɛ a lɛ, a nya.

⁹ Naa, Uri yi gyɛ minwiinzan lé kɔn ’léé, ’ézan wuozannu va yé é ’ka go lɛ élé kɔn ’léé lo.

¹⁰ Wa zuo fe David lɛ, yé wo léé, Uri ’ka go lɛ élé kɔn ’léé lo. Yé David lé Uri lɛ léé: I ’ka si lɛ ta la loo? Mɛmalé i ’ka go lɛ ilé kɔn ’léé loo?

¹¹ Uri lé David lɛ léé: Bale lé kɛsu koo, Izraɛl valé Juda koo, wa é nyanale sɔkɔnnu wuo; anzan Joab valé é wuomunu a é nyanale bwi la ’naan, yé maa go anlé kɔn gi, fɛblele koo, fɛminile koo, yiile an na va koo, wo we gii? Bii a é yuɛma webozen nya yé i léli a é yuɛma é ziin fɛan zo bɛ, maa ’ka ’bɛ kɛla monomono lo!

¹² David lé Uri lɛ léé: ’I vo ’ko kyɔ. Maa dan i pa lɛ zia tɛlɛ. Yé Uri vo Jérusalɛm yi fié.

¹³ David a laa fɛblele ma é va, yé é a gyɛ nwɛ nya; é béli, Uri bɔra yé é yii ézan wuomunu va, naa, é ’ka go lɛ élé kɔn ’léé lo.

¹⁴ ’Bɛ é tu kini, David sɛbɛ gyɛ Joab zé nya yé é a pa zia Uri lee.

¹⁵ É sɛbɛ gyɛ léé: ’I Uri dɔ fɛana lé guli ke plɛplɛ, ana, yé ’ka si a zuo yé wa gyɛ yé é ga.

¹⁶ Joab a fla mabɛnna; é a gi dɔɔ léé, bli ta plɛplɛ sunyanu a guli danna fɛana, é Uri dɔ ’bɛna zia.

¹⁷ Flamunu bɔra yé wo guli dan Joab va; munu kiɛre dia, David wuozannu kenu dia é ziin yé wo Éti mi Uri gyɛ é ziin.

¹⁸ Joab mi do nwunvɔ, guli danna we zuo fe lɛ David lɛ.

¹⁹ É lé mi ’ko lɛ léé: Dé i nyaa gulidanwe zuo faa fele nya minwiinzan lɛ na,

²⁰ dé é kɛlɛ léé, a bli fli yé é lé i lɛ léna, mɛmalé ka bié fla sɔnɔ guli danle we gii? Ka ’ka a gi dɔɔa léé, flagɔrɔ taginimunu éé sawɔlɛ vulian loo?

²¹ De ɛ Jérubaal be Abimélɛk gyɛɛ? É ’ka lezan lé é dɔ flagɔrɔ ta yé é fɛzɔngɔlɛ dia a ta, a nya loo? Yé é ’ka ga lɛ Tébɛs loo? Mɛmalé ka bié flagɔrɔ sɔnɔɔ? Dé é a fe i lɛ a zo, bé fe a lɛ léé, i wuozan Éti mi Uri ga é ziin.

²² Nwunvɔzan go; é bɔ aan wo, we faa lé Joab a fe a lɛ, é a zuo faa fe David lɛ.

²³ Nwunvɔzan léé: Munu ’ko dɔna a é minile kozé ta; wo bɔra ko ma bwi la yé ko guli dan yé ko go wo nyunule nya fɔɔ yé ko bɔ wo nya flagɔrɔ ’léé;

²⁴ sawɔlɛ vulizannu a é dɔle flagɔrɔ ta, ’té woo sawɔlɛ vulian i wuozannu va, yé wo minwiinzan wuomunu kenu gyɛ, yé i wuozan Éti mi Uri ga é ziin.

²⁵ David lé nwunvɔzan lɛ léé: I dan a fe lɛ Joab lɛ léma: Té we ’ko é ’na a ma lo, naa, guli dan gwɔun ’ka mi vaboo lo; ’i guli dan plɛplɛ fla ’ko ma, yé bé guru zana a gi. Yé bii, bé bli ta dɔ plɛplɛ.

²⁶ Uri na a ’ma léé, é zana ga yé é a wuvɔ.

²⁷ A zana gyɛbole nyaa aan wo, David mi pa zia léé, ’wo da a nya ’é va yé ’é da a nya kɔn gi. É a si é na nya yé é négɔné yaa a lɛ. We lé David a kɛlɛ, é ’ka sɔ lɛ Gakelebale lɛ lo.