2 Samuɛl 10 - Kazambale lé Sebe Sauunu 1979

David Amɔnnu valé Sirinu kele

¹ ’Bɛ zuo Amɔn munu nwiinzan ga, yé a be Anun kɛlɛ minwiinzan nya a pa gi.

² Yé David léé: Maa dan wezin kɛlɛ lɛ Nakas be Anun lɛ, bélé fɛan zo lé a ti wezin kɛlɛ an lɛ, a zo. Yé David é wuomunu nwunvɔ a tɔrɔpaale we ma a ti gale we ma. David wuomunu bɔ aan wo Amɔn munu lé tɛrɛ la,

³ Amɔn munu nwiinzannu lé ’wozan Anun lɛ léé: É dɔ i gi léé, David munu pa zia i tɔrɔpaale valé i ti tɔ bɔle we maa? Fla naginile koo, a mavɔɔle koo, a sɛrɛle tata koo, é ’ka é wuozannu pa lɛ i lɛ zia ’bɛ kɛlɛle we ma loo?

⁴ Yé Anun David wuozannu kun yé é wo puomagun bɛ do puiɛ yé é wolé varɔnu bɔi wo méléna yé é vo wo boro ma loru yé é daan wo ma yé wo go.

⁵ David we ’ko ’ma aan wo é munu pa zia keele wo nya we ma, naa, yara a munu ’ko gyɛna é baba. Yé David we pa wo lɛ zia léé: ’Ka vo Jériko fɔɔ yé ka puomagun é bɔ é ziin, ’bɛ zuo yé ’ka da.

⁶ Amɔn munu a ye aan wo léé, ’wo gin dɔ David nyé gi, wo sunyanu laa léé, ’wo da bɔ ’wo va yé ’wo wo banwo; Bɛt‐Réob Sirimunu valé Tesoba Sirimunu lé gane la tawo sunyanu a baa vu; Maaka nwiinzan lé munu a mi wuru soru, yé Tob lé munu a mi baa suiɛdo.

⁷ David we ’ko ’ma aan wo, é Joab valé nyanazannu faa pa zia wo ma.

⁸ Amɔn munu bɔra, yé wo dɔ ’wo bale ta wɔrana zi ’léé, ’wo ma nya é ’lɛrɛle guli danle we ma, ’té Tesoba valé Réob Sirimunu koo, Tob valé Maaka?-?munu koo, wa é yɛrama bwi gi.

⁹ Joab a ye aan wo léé, é a lé é guli dan ’é ’lɛzia valé ’é zuozia, é Izraɛl lé sunya vabole kenu si, yé é wo dɔ Sirimunu ma,

¹⁰ yé é mi pɔnénu pa é zuané Abisai va, wo dɔle Amɔn munu ma we gi.

¹¹ É léé: Dé Sirimunu plɛplɛ mini an ta, i dan da lɛ bɔ lɛ an va; dé Amɔnnu plɛplɛ mini i ta, maa dan go lɛ bɔ lɛ i va.

¹² ’I dɔ gligli yé kaa bli ta plɛplɛ nagɔɔn kolé munu valé kolé Bale lé flanu lé we ma, yé dé wean dɔ Gakelebale gi wezin nya, ’é a kɛlɛ ma.

¹³ Joab valé é vamunu go guli dan lɛ Sirimunu va yé wo fwila a ’lɛ.

¹⁴ Amɔnnu a ye aan wo léé, Sirimunu fwila, wo fwila é ziin Abisai lee, yé wo go fla. Joab si Amɔn munu zuo yé é da é pa gi Jérusalɛm.

¹⁵ Sirimunu a ye aan wo léé, Izraɛlnu ’wo kele, wo faa ’wo suni wɔra.

¹⁶ Sirimunu lé wo ke yuu zi, Adadézɛɛ munu nwunvɔ wo laana léé, ’wo da; yé wo da Élama, ’té Adadézɛɛ lé sunyanu nwiinzan Sobak a wo ’lɛ.

¹⁷ Wa zuo fe David lɛ, yé é Izraɛlnu faa si yé é Juudɛn kini wo nya yé é da Élama. Siri munu ’wobo ma’lɛrɛ keele David nya we ma, yé wo guli danle sia a va.

¹⁸ Naa, Siri munu fwila Izraɛl ’lɛ. David goro wuru yaa yɔ soru gi munu gyɛ, é valé wisootamunu baa yɔ do nya; é wolé sunyanu nwiinzan Sobak gyɛ é ziin, yé é ga fɛ duona.

¹⁹ Minwiinmunu faa lé wo ke é plale Adadézɛɛ wuo, wa ye aan wo léé, Izraɛl ’wo kele, wo yɔfalo fu nwa wo lɛ yé wo pla wo wuo. Yé é ’ka dɔ lɛ Siri munu gi léé, wo bɔ Amɔn benu va é dɛrɛ lo.