2 Samuɛl 1 - Kazambale lé Sebe Sauunu 1979

David Saul valé Jonatan wuvɔ

¹ Saul gale zuo, ’té dé David nyaa Amalɛknu gyɛle nya guli nya, é yi fié kɛlɛ Siklag.

² A yi yaazan nya gɔné do si Saul lé sɔkɔn dɔna, ’té sɔ fiale a a ta, ’té tɛrɛ a a nwiin. É bɔ David va tɔɔn é dia tɛrɛ va yé é ’wuo wɔra a gane wuo.

³ David lé a lɛ léé: I si kyɛɛn? Yé é a zi pa léé: An vɔ fli gi Izraɛl lé sɔkɔn dɔna.

⁴ David lé a lɛ léé: Mɛ we ɛ bɔɔ? Bé fe an lɛ. Yé é a zi pa léé: Munu vlan buru guli lee, yé mi kiɛre dia yé wo zamaga wo; yé Saul valé é be Jonatan ga.

⁵ Pɛniɛ lé é we ’ko zuo fe David lɛ, David lé a lɛ léé: Bé gi dɔɔ kaa léé, Saul valé é be Jonatan gaa?

⁶ Yé pɛniɛ lé é we ’ko zuo fe a lɛ, é a zi pa a lɛ léé: Maa a Gilboa gɔ ma; yé bé ye, Saul tɛnla élé din ta yé é vo sɛ yé goronu valé wisootazannu é bɔ a ma.

⁷ É nɔla aan wo yé é an ye yé é an laa. Maa léé: Maa lo.

⁸ Yé é lé an lɛ léé: De lé ke i nyaa? Maa léé: Maa a Amalɛk mi nya.

⁹ Yé é léé: ’I bié yé ’i an gyɛ. Maa a é yuɛma, naa, an yuɛ gi a nɔɔna.

¹⁰ Maa bié yé maa a gyɛ, naa, maa gi dɔɔ é zima léé, é tuo blɛn yé é ’ka bɔa bélile lɛ é dɛrɛ lo. Kyankoro lé ke a ’wuo ma, é valé bɛmazéné lé ke a bɛ ma, maa wo si yé an da wo nya ’ko anzan lɛ.

¹¹ David kun élé sɔ ma yé é a fia yé munu lé wo ke a sɔnɔ wo faa yee duo kɛlɛ.

¹² Wo yiri vɔ gyɛ bole koo, wuvɔle koo, lɔrɔ sɔnle koo, wo nya, Saul koo, é be Jonatan koo, Gakelebale lé munu koo, Izraɛl lé munu koo, wo diale gwɔun ’léé we ma.

¹³ Davidi lé pɛniɛ lé é we ’ko zuo fe a lɛ, a lɛ léé: I si kyɛɛn? Yé é léé: Maa a bɛn do mi nya, Amalɛk mi do be nya.

¹⁴ David lé a lɛ léé: Mɛmalé i ’ka kana lɛ i bɛ nwale ma Gakelebale lé nyɔnɔzénnwiinzan ma lo, yé bé gyɛɛ?

¹⁵ David é vami do laa yé é léé: ’I bié ’ko, bé gyɛ. Mi ’ko Amalɛk mi gyɛ yé é ga.

¹⁶ Yé David lé a lɛ léé: I nyɛ a ibo nwiin; bé fe léé, ’é Gakelebale lé nyɔnɔzénnwiinzan gyɛ, amalé ibo lɔlu we nɔ i lɛ.

¹⁷ Gyɛ wuvɔ lɛrɛ lé David a vɔ Saul valé é be Jonatan gyɛ la,

¹⁸ yé é léé, ’wa paa Juda munu gi, yee lo. Gulidansa ma lɛrɛ lé; wa gyɛ Mi Tegele lé sɛbɛ gi.

¹⁹ Izraɛl lé mi kprakpranu dia gɔnu nwiin! Nyanazannu dia kaa?

²⁰ Té ka a fe Gat lo, Té ka we ’ko zuo fe Azkalɔn lé zinu ta lo, Dé Filisitinu lunu gi é da nana, Dé ganedɔlozannu lunu é da mini ko lɛ.

²¹ Gilboa gɔnu, Té fli ’é vɔ ka ta lo, té lɛɛ ’é da ka ta lo, Té ka ta féinu ’é fɛ dɔ yé wo Bale ban ana fɛ vinin nya lo. Wo nyanazannu lé botakuunfɛnu vuli ’bɛna, Wo Saul lé botakuunfɛ vuli ’bɛna, azama. Wo ’ka nyɔnɔ zén‐é wo ta é dɛrɛ lo.

²² Jonatan lé sa ’ka sié guli ma lo, ’Té dé é ’ka tan mi nyɛ zana lɛ lo, ’té dé é ’ka tan nyanazannu nyɔnɔ bɔra lɛ lo; Yé dé Saul lé gwɔun ’ka tan wo nyanézannu gyɛ lɛ lo, é ’ka diéraan é pa gi lo.

²³ Saul valé Jonatan a mi zinnu valé sɔmilɛzannu nya wolé tɛrɛla gi, Yé wo ’ka wo kini lɛ ékema wo gabléyi nya lo. Woo sié é mini golanu ta, Wa plɛplɛ é mini golizranu ta.

²⁴ Izraɛl lunu! Saul lé éé sɔ sɔɔn nɔnɔmi zén‐é ka ta, Yé é kalé sɔnu ’lɛrɛ kyan nya, ’ka a wuvɔ.

²⁵ Nyanazannu dia guli lee kaa? Jonatan zamaga wo ilé gɔ nwiin kaa?

²⁶ An bwe Jonatan, an bli kyɛ dɔ ilé we ma. Bii ɛ ke an ginanazan nya; An sɔle i lɛ a néné É mini an sɔle lomu lɛ ta.

²⁷ Nyanazannu dia kaa? Wolé gulidanfɛnu san kaa?