2 Piɛri 3 - Kazambale lé Sebe Sauunu 1979

Blivolɛdére lé Bale a fe Jézu dale ma

¹ ’Kaa lé ka sɔ an lɛ, sɛbɛ fiézan lé maa a pa ka lɛ zia, yee lo. Wo fiénu gi, we lé ka gi dɔɔ, maa a a sele dɔna ka gi, ka vuole we gi yé ka ka gibɔrɔmawe dɔɔ.

² Maa a a va léé, wenu lé balelayemunu sauun a fale vɔ ka lɛ, a sele ’é vo ka gi, yé é ziin, Mizan lé é ke mi Bélizan nya, bélidɔwe lé é a nɔ ka lɛ élé nwunvɔmunu lɔlu nya, yé ’bɛ sele ’é vo ka gi.

³ We faa ’lɛ, we lé é a lé ka gi dɔɔ, yee lé é ke léé, yi voélanu nya, mi ma we?-?nanamunu é dan bɔra lɛ ’wolé mi ma wenanalenu nya, ’té woo tawoo wobozen lé blibɔmale yɛrama. Yé wo dan a fe lɛ léé:

⁴ Blivolɛdére lé Jézu a fe léé, é dan da lɛ, a lɛsɔɔle a kyɛɛn? É sia ko tranu gale ma, fɛnu faa a wo dɔbɛ gi, bɛan zo lé wo ke wo kɛlɛbléyi va, ’bɛ bɛ gi.

⁵ Munu ’konu gi san we kenu ma wobo yuɛ va; yee lé ke léé, é vinin, lanu valé tɛrɛ ana; Kazambale wo kɛlɛ é dére nya, yé é wo si ’yi va yé é wo kɛlɛ ’yi nya;

⁶ yé ’bɛ tɛrɛ vininzan bɛ, ’yi ’bɛ sɛrɛ lɛɛ blɛnblɛn dabléyi va;

⁷ yee dére duo nya lé lanu valé tɛrɛ lé é ke ana lao, Bale é yuɛ pa wo va yé é wo tadɔ wo kyɛblele we ma, yian nya lé Bale é dan munu lé we ble lɛ yé é Bale lé zi ma wenyané fezannu guru zana a gi, a yi nya. Wo gi san we ’konu ma wobo yuɛ va.

⁸ ’Kaa lé ka sɔ an lɛ, we do lé é a lé té ka gi é san a ma lo, yee lé é ke ’ko: yi do a bélé lɛɛ wuru soru zo yé lɛɛ wuru soru a bélé yi do zo Mizambale yuɛ gi.

⁹ Blivolɛdére lé Mizambale a fe léé, é dan a kɛlɛ lɛ, é ’ka mɔn‐o a kɛlɛle lɛsɔɔle nya bélé fɛan zo lé é dɔ mi kenu gi, a zo lo, naa, a bli a tiéé ka ma yé é ’ka sɔ lɛ a lɛ léé, mi do kpen é zamaga wo lo, naa, é sɔ a lɛ léé, munu faa ’wo bli nɔla.

¹⁰ Mizambale lé yi é dan bɔ lɛ bélé kyeenwozan zo; yi ’ko nya lanu é dan gié lɛ é vun wele blɛn nya; fɛnu faa lé Bale wo kɛlɛ é wɔlɛnu nya, wo ’yi é dan bo lɛ kyɛ plɛplɛ baba lé we ma, yé tɛrɛ valé é tafɛnu yee é dan bo lɛ.

¹¹ Fɛ ’konu ’yi bole lé we ma, é ’ka lé ka kɛlɛ sauun valé Bale lé zisɔlɛmunu nya ka giébɛ gi loo?

¹² ’Ka Kazambale lé yi bɔle lɛbɛn yé ’ka we kɛla fɛan zo yé a yi é bɔ é kele, ’ka kɛlɛ. Yi ’ko lé we ma lé la kyɛ é dan bi lɛ yé a ’yi é dan bo lɛ yé fɛnu faa lé Bale a kɛlɛ é wɔlɛnu nya, wo dan sele lɛ.

¹³ Naa, alé blivolɛdére yɛrama lé kaa ke la dɛrɛnu valé tɛrɛ dɛrɛ lɛbɛnna, ’bɛna lé we tegele é dan kɛlɛ lɛ.

¹⁴ Bɛwemalé, an blibɔmazannu, bléyian va lé ka ke we ’konu lɛbɛnna, ’ka yara pa kabo ma’lɛrɛle ta léé, a yi ’é bɔ ka ma drɔɔ, ’té ka tiri ’ka lo, ’té ka nwiin a é pla.

¹⁵ É a lé ka gi dɔɔ léé, Kaazan lé bli tiéé we ma lé ka dan béli lɛ, bélé fɛan zo lé kaa bwe Pɔl lé é sɔ kaa lɛ, é a gyɛ ka lɛ sɛbɛ gi, wedɔɔle lé Bale a nɔ a lɛ, a yɛrama bɛ, a zo.

¹⁶ A zo lé é a kɛlɛ élé sɛbɛnu faa lé é we ’konu gyɛ wo ta, wo gi; alé sɛbɛnu gi ’male a tɔntɔn, yé tanyila munu lé wo ’ka é dɔle gligli lo, wa gi fele plin‐an bélé fɛan zo lé wa kɛla Kazambale lé sɛbɛ bɛnu lɛ, a zo, naa, we ’ko ma lé wo ’wobozen san.

¹⁷ An blibɔmazannu, maa we ’konu gɔɔn ka lɛ é vinin, amalé ’ka yuɛ pa kabozen va, dé Bale lé zi ma wenyané femunu sanle é da ka sia ana yé ka dɔle gligli yi é ga.

¹⁸ Naa, ’ka tin Kaazan, kaa Bélizan Jézu Krist lé zin valé a dɔɔle gi ma. ’Wo fua nɔ a lɛ sin bléyi ’ko va, é valé lɛɛfaama ma. Amɛɛn.