2 Piɛri 1 - Kazambale lé Sebe Sauunu 1979

Weale lé

¹ ’Kaanu lé ka blipale wezan duo ye ko va, kaalé Bale valé Mibélizan Jézu Krist tegele lé we ma bɛ, an we ka va. Maa Simɔn Piɛri lé an ke Jézu Krist lé luugɔnéné valé alé nwunvɔzan nya, maa ɛ ke sɛbɛ ’ko gyɛna ka lɛ.

² Zin valé vole drɔɔ gi ’é gyɛ ka ta Kazambale valé Kaazan Jézu dɔɔle nya ma.

Ka laale valé ka sile a va

³ Fɛnu faa lé wo bɔa kaa va kaalé tɛrɛla valé Bale lé zi ta tawole gi, Bale lé plɛplɛ ɛ wo nɔ kaa lɛ blɛ nya, yé yee Bale lé plɛplɛ lé we ma lé, mi lé é kaa laa ébo lé fua tɔbɔle valé élé wezin nya, yé kaa a dɔɔ.

⁴ Alé fuasan valé alé wezin ma lé Bale blivolɛdére wezannu blɛɛn fe kaa lɛ, yé wo yele ma lé we vɔnle lé é ke tɛrɛ la, blibɔle fɛnu ma we ma, yé ka bɔ sole lɛ ’bɛnu lee yé Bale dɔbɛ é vɔ ka lee.

⁵ Amalé ’ka kwa kuli yé ka wezin pa kalé blipale va, yé ’ka wedɔɔle pa wezin va,

⁶ yé ’kabo kunle pa wedɔɔle va, yé ’ka bli tiéé pa kabo kunle va, yé ’ka Bale lé zi sɔle ka lɛ pa bli tiéé va,

⁷ yé ’ka bwenu va sɔlɛle pa Bale lé zi sɔle ka lɛ va, yé ’ka mi lɔrɔ pale pa bwenu va sɔlɛle va.

⁸ Naa, dé we ’konu a ka bli gi yé wo fan ana, ka ’ka kɛla boazannu valé mimagalenu nya Kaazan Jézu Krist dɔɔle gi lo.

⁹ Naa, mian we ’konu ’ka a gi lo, a yuɛ a é ’wiile yé é ’ka fɛna yé baa lo, yé a gi san élé wenyané kyɛn sile é lee ma.

¹⁰ Bɛwemalé, an bwenu, ’kabo tunu Bale lé ka laale valé alé ka sile a va kɛlɛle webozen nya we gi. We ’ko kɛlɛle nya lé ka ’ka dan saan lɛ monomono lo.

¹¹ ’Ko zo lé Bale é dan a nyi si lɛ é bli faa nya léé, ka wɔra Kaazan, kaa Bélizan Jézu Krist lé fuatɛrɛ lé é ’ka nyaan lo, a ta.

¹² Yee ɛ lé we ma lé ma ’ka daan we ’konu sele dɔle ma ka gi lo. Dé ka gi dɔɔ é zima yé ka dɔ gligli webozen lé ka a ’ma, a gioo, maa a sele dɔa ka gi duowo.

¹³ É dɔ an gi léé, é a lé maa ka vo é vuole we plale ka lɛ nya, bléyi faa lé an ke sɔkɔn ’ko gi, a bléyi va,

¹⁴ naa, maa a gi dɔɔ léé, an sile sɔkɔn ’ko gi bɔ é pu; Kaazan Jézu Krist a gɔɔn an lɛ a zo.

¹⁵ Bɛwemalé maa a kwa kulina léé, an gole zuo, we ’konu sele ’é dɔ ka gi yifaama.

Piɛrinu Jézu lé fuasan ye

¹⁶ Ko ’ka Kaazan Jézu Krist lé plɛplɛ valé a dale lé we fe lɛ ka lɛ dabli fiinnu vɔle nya lo, naa, ko alé fuasan blɛn ye kobo yuɛ nya.

¹⁷ Naa, é tɔbɔle valé fuasan ye Tibale va, bléyian va lé dére do si fuasan blɛn va, a bléyi va, yé é léé: Mi ’ko a an Be lé, é sɔ an lɛ é baba, a nya; anlé sɔlɛle faa a yee ɛ ta.

¹⁸ Yé ko dére ’ko ’ma sina la gi bléyian va lé ko ke a va gɔ plɛplɛ nwiin, a bléyi va.

¹⁹ Amalé é a ko gi léé, balelayezannu dére a sɔbɛlawe nya é mini we bɛnu faa ta, yé é a é zima léé, ka tɔné dɔ a lɛ, naa, é a bélé kyɛbɔ lé ke bina gunuti va, a zo, azama. Amalé ’ka tɔné dɔ a lɛ fɔɔ yé tukinibléyi é bɔ yé bladi monéné é nwa ka bli gi.

²⁰ É a lé kabozen a gi dɔɔ léé, Kazambale lé sɛbɛ gi balelawefele do kpen gi fele ’ka mi do zé nya lo. ’Bɛ ɛ ke wegɔné nya.

²¹ Munu lé blibɔmawe ’ka da lɛ balelawefele do kpen nya monomono lo, naa, Léli Sauun ɛ Kazambale lé munu nyunu yé wa fe Kazambale tɔ gi.