2 Minwiinzannu 9 - Kazambale lé Sebe Sauunu 1979

Wo Jéu dɔ Izraɛlnu nwiinzan nya

¹ Balelayezan Élizé balelayezannu va mi do laa yé é lé a lɛ léé: ’I sɔ dɔ i tɛrɛ la, ’i nyɔnɔ kuo kiéné ’ko si yé ’i goan i lee Ramɔt lé ke Galaad tɛrɛ la, ana.

² Dé i bɔ ’bɛna, ’i Nimisi be Jozafat be Jéu gini. Bé nwa é bwenu méléna yé ’i goan kɔnmi zi.

³ ’I nyɔnɔ kuo kiéné si, yé bé zén a nwiin yé bé fe léé: Gakelebale léma: Maa nyɔnɔ zén i nwiin léé, i kɛlɛ Izraɛl minwiinzan blɛn nya. ’Bɛ zuo ’i kɔn lɛ so yé ’i vlan buru, té i dɔ lo.

⁴ Balelayezan wuozan, pɛniɛ ’ko, é go Ramɔt lé ke Galaad tɛrɛ la, ana. É bɔ aan wo, ’té sunyanu nwiinzannu a é nyanale.

⁵ É léé: Sunya nwiinzan, maa a we do fena i lɛ. Yé Jéu léé: Ko faa va mi kyɛn léé? É a zi pa léé: Sunya nwiinzan, bii lé.

⁶ Jéu nwa yé é wɔra kɔn gi, yé pɛniɛ nyɔnɔ zén a nwiin, yé é lé a lɛ léé: Gakelebale, Izraɛl lé Bale léma: Maa nyɔnɔ zén i nwiin i kɛlɛle Gakelebale lé munu Izraɛl nwiinzan blɛn nya we gi.

⁷ I dan izan Akab lé kɔn ’léé munu gyɛ lɛ, yé maa dan an wuozannu Balelayezannu nyɛ valé Gakelebale wuozannu nyɛ lɛ gi pa lɛ Jézabɛl ma.

⁸ Akab lé kɔn ’léé munu faa é dan zamaga wo lɛ; dé é a luu nyaoo, dé é a miné nya Izraɛl‐oo, maa dan Akab lé munu faa si lɛ tɛrɛ la tata,

⁹ yé maa dan Akab kulu kɛlɛ lɛ bélé Nébat be Jéroboam valé Akija be Baésa kulu zo.

¹⁰ Blénnu é dan Jézabɛl ble lɛ Jizréɛl munu lé féi, yé mi do kpen ’ka dan a pa lɛ lo. ’Bɛ zuo pɛniɛ kɔn lɛ so yé é vlan buru.

¹¹ Jéu bɔra aan wo yé é go ézan wuomunu va é ziin, wo lé a lɛ léé: We drɔɔ léé? Mɛmalé gwegyɛzan ’ko da i vaa? Jéu a zi pa wo lɛ léé: Ka a dɔɔ, yé we lé é bɔa a fele lɛ ka a gi dɔɔ.

¹² Naa, wo lé a lɛ léé: Vié lé. Bé gi fe ko lɛ. Yé é léé: É we fe an lɛ ’ko valé ’ko zo yé é léé: Gakelebale léé, maa nyɔnɔ zén i nwiin i kɛlɛle Izraɛl minwiinzan blɛn nya we gi.

¹³ Tɔɔn wo ’wolé sɔnu si yé wo wo fwila fɛ do ta loru yé wo Jéu dɔ a ta; wo béli fɛn yé wo léé: Jéu a minwiinzan blɛn nya!

¹⁴ ’Bɛ zo lé Nimisi be Jozafat be Jéu Joram ma we ble. (Naa, Ramɔt lé ke Galaad tɛrɛ la, Joram valé Izraɛlnu faa a takuun Siri munu nwiinzan Azaɛl lee;

¹⁵ minwiinzan Joram nɔla Jizréɛl, tuonu lé é a wo Sirinu lee bléyian va lé é go guli dan lɛ Siri munu nwiinzan Azaɛl va, wo paale we gi.) Jéu léé: Dé é dɔ ka gi we zin nya, té mi do kpen é si fla ’ko yé é go we ’ko zuo fe Jizréɛl lo.

¹⁶ Jéu vɔ élé goro gi yé é go Jizréɛl, Joram a é yiale ’bɛna, ’té Juda nwiinzan Akazia go we lɛ a va, azama.

Wo Izraɛl minwiinzan Joram gyɛ

¹⁷ Flataginizan lé ke é dɔle Jizréɛl lé kɔn torole ta, é Jéu lé palu ye dana yé é léé: Maa mi palu do ye. Joram léé: ’I wisootazan do nwunvɔ wo va a laale wo lee we gi léé, dé we drɔɔ léé?

¹⁸ Wisootazan go Jéu va yé é léé: Minwiinzan léma: We drɔɔ léé? Yé Jéu a zi pa léé: We drɔɔ ɛ mɛ ɛ kɛla i lɛɛ? ’I gié an zuo mun. Flataginizan a zuo fe yé é léé: Nwunvɔzan bɔ wo va, naa, é ’ka dana é ziin lo.

¹⁹ Joram wisootazan fiézan nwunvɔ yé é go wo va yé é léé: Minwiinzan léma: We drɔɔ léé? Yé Jéu a zi pa léé: We drɔɔ ɛ mɛ ɛ kɛla i lɛɛ? ’I gié an zuo mun.

²⁰ Flataginizan a zuo fe yé é léé: É bɔ wo va naa, é ’ka dana é ziin lo. Yé wa goro vɔna bélé Nimisi be Jéu zo, naa, éé goro vɔa bélé ’tugyɛzan zo.

²¹ Yé Joram léé: ’Ka anlé goro ma’lɛrɛ. Yé wo alé goro ma’lɛrɛ. Izraɛl nwiinzan Joram valé Juda nwiinzan Akazia vɔ ’wolé goro gi do do yé wo go Jéu va yé wo kee wo nya Jizréɛl mi Nabɔt lé féi.

²² Joram Jéu ye tɔɔn, é léé: Jéu, we drɔɔ léé? Jéu a zi pa léé: We drɔɔ lé kaa? Yé i bu Jézabɛl é vo élé bɔrɔdɛ wenu valé élé mimafɛ kɛlɛnaa?

²³ Joram goro nɔla yé é vlan buru yé é lé Akazia lɛ léé: Akazia! Wo ko ma we ble!

²⁴ Naa, Jéu élé sa kun yé é a vuli yé é Joram gyɛ é lapo la; sawɔlɛ bɔra a zuru vazia yé Joram plin élé goro gi.

²⁵ Jéu lé élé sunyanu nwiinzan Bidikaa lɛ léé: Bé si, bé vuli Jizréɛl mi Nabɔt lé féi; naa, a sele ’é dɔ i gi léé, bléyian va lé maa valé bii a ékeva wisoo ta a ti Akab zuo, Gakelebale a ma we fe léé:

²⁶ Yese, maa Nabɔt valé é benu nyɛ ye, yé Gakelebale léé: Maa dan yee duo kɛlɛ lɛ bii é lɛ, yee féi duo ta. Amalé bé si, bé vuli féi, Gakelebale dére yɛrama.

Wo Judanu nwiinzan Akazia gyɛ

²⁷ Juda minwiinzan Akazia ’bɛ ye, yé é vlan buru zian féi kɔn vazia. Jéu a zuo bin, yé é léé: Yee é ziin, ’ka a gyɛ goro gi. Yé wa gyɛ Guu gɔ ma, Jibléam sɔnɔ. É go é ta yɔɔ lɛ Mégido, yé é ga ’bɛna.

²⁸ A wuozannu a vɔ goro gi yé wo da a nya Jérusalɛm yé wa pa élé mipana é tranu va David lé fla.

²⁹ Akazia kinin Juda minwiinzan blɛn nya Akab be Joram lé lɛɛ vu ta dozan nya.

Wo Jézabɛl gyɛ

³⁰ Jéu wɔra Jizréɛl. Jézabɛl a ’ma aan wo, é kale pa é yuɛ ma yé é nwin ’lɛrɛ yé é a nagini fɛnɛti ta.

³¹ Jéu bɔ flagɔrɔ ’léé aan wo, Jézabɛl léé: Zimri zoɛzan, ézan gyɛzan, we drɔɔ léé?

³² Jéu é yara nwa fɛnɛti vazia yé é léé: Ka lé ka ke loru bɛ, de ɛ ke an vaa? Yé dé mi blale fié léé, dé yaa léé, wo bɔrai fɛnɛti ta yé wa nagini.

³³ Jéu léé: ’Ka a vuli tɛrɛ va. Wa vuli yé a nyɛ nwɛɛn flagɔrɔ valé wisoonu ta. Jéu a zɔn wisoo gane nya;

³⁴ ’bɛ zuo é wɔra fla yé é fɛ ble yé é fɛ mini yé é léé: ’Ka go balepamazan ’ko sia yé ’ka a pa, naa, minwiinzan lu lé.

³⁵ Wo go a pa lɛ; naa, wo ’ka a ye lɛ lo; a ’wuowɔlɛ koo, a ganenu koo, a lee kɔlɛnu koo, wo saa lé wa ye.

³⁶ Wo diéra yé wa zuo fe Jéu lɛ, yé ’bɛ léé: We lé Gakelebale a fe é wuozan Tisibi mi Éli nya, yee lé. É léé: Blénnu é dan Jézabɛl nɛ ble lɛ Jizréɛl munu lé féi;

³⁷ yé Jézabɛl gale é dan kɛlɛ lɛ bélé bli vɔnle zo féinu ta, Jizréɛl munu lé féi ta fɛan zo, wo ’ka bɔalé wa fe léé, Jézabɛl lé, lo.