2 Minwiinzannu 8 - Kazambale lé Sebe Sauunu 1979

Sunɛm lezan go élé fla é pa gi

¹ Élizé lé lezan lé é a be nwa gale va, a lɛ léé: ’I nwa yé ’i go, bii valé ilé kɔngimunu koo, yé ’i nyana fɛana lé i bɔalɛ, ana; naa, Gakelebale lɔrɔ dɔ yé é dan vo lɛ tɛrɛ la fɔɔ lɛɛ sɔrafié.

² Lezan nwa yé é tawo Bale lé mi dére ta; é go, yee valé élé kɔngimunu nya, yé é nyana Filisitinu lé tɛrɛ la lɛɛ sɔrafié.

³ Lɛɛ sɔrafié nyaale zuo é si Filisitinu lé tɛrɛ la yé é da élé kɔn valé élé féi lé we laa lɛ minwiinzan blɛn lee.

⁴ Minwiinzan blɛn a gle wona Bale lé mi wuozan Géazi va, yé é lé a lɛ léé: Ilé zanté, we blɛnblɛnnu lé Élizé a kɛlɛ, bé zuo fe an lɛ ma.

⁵ Élizé mi nwa gale va fɛan zo, é a ’bɛ zuo fena minwiinzan blɛn lɛ bléyian va, lezan lé Élizé a be nwa gale va, é da ’élé kɔn valé élé féi lé we laa lɛ minwiinzan blɛn lee. Géazi léé: Minwiinzan, anzan, yee le lo, yé a be lé Élizé a nwa gale va, ’bɛ lo.

⁶ Minwiinzan we laa lezan lee yé é we zuo fe a lɛ. A zuo minwiinzan miblale do nɔ a lɛ yé é lé ’bɛ lɛ léé: Fɛ faa lé ke le ’ko zé nya, be nɔ a lɛ é ziin, é valé fɛnu faa lé é baa alé féi, é sia yian nya lé é si tɛrɛ ’ko la fɔɔ kyɔ, wo nya.

Élizé valé Sirinu nwiinzan Bɛn‐Adad

⁷ Élizé go Damas. Siri munu nwiinzan blɛn Bɛn‐Adad a gyɛ kɛlɛna; yé wo lé a lɛ léé: Bale lé mi da ’ko.

⁸ Minwiinzan lé Azaɛl lɛ léé: ’I fɛ do si yé ’i goan Bale lé mi lɛ blɛ nya; ’i we laa Gakelebale lee a nya léé, maa dan béli lɛ gyɛ ’ko gii?

⁹ Fɛ zima faa lé ke Damas, Azaɛl a si nyɔgɔmé yɔ fié sikɔné nya Élizé blan nya, yé é goan Élizé va. É bɔ aan wo é a nɔ a lɛ yé é léé: I be Siri nwiinzan Bɛn‐Adad an nwunvɔ i va we laale i lee we gi léé, é dan béli lɛ gyɛ ’ko gii?

¹⁰ Élizé a zi pa a lɛ léé: ’I go, bé fe a lɛ léé, é dan béli lɛ. Naa, Gakelebale a gɔɔn an lɛ léé, é dan ga lɛ.

¹¹ Bale lé mi é yuɛ vɔ Azaɛl ta, yé é mɔn a naginina téiin, a zuo é wuvɔ.

¹² Azaɛl léé: Mɛmalé anzan wuvɔɔ? Élizé a zi pa léé: We tɔntɔn lé i dan a kɛlɛ lɛ Izraɛl lé nénu lɛ, maa a dɔɔ, ’bɛzama; i dan wolé fla plɛplɛ kyɛ vɔ lɛ, i dan wolé pɛniɛnu gyɛ lɛ gwɔun nya, i dan wolé né kiénénu pun dɔ lɛ yé i dan wolé bɔnlomu bɔn gi bo lɛ.

¹³ Azaɛl léé: I wuozan lé ke blén nya, é a de nya yé é ’bɛ zo we blɛnblɛn kɛlaa? Yé Élizé léé: Gakelebale a nagɔɔn an lɛ léé, i dan kɛlɛ lɛ Sirinu nwiinzan blɛn nya.

¹⁴ Azaɛl si Élizé va yé é da ézan va yé ’bɛ lé a lɛ léé: Mɛ we lé Élizé a fe i lɛɛ? Yé é a zi pa léé: É lé an lɛ léé, i dan béli lɛ.

¹⁵ ’Bɛ é tu kini Azaɛl sɔ si yé é a vɔ ’yi va yé é a pla minwiinzan nyé ’léé, yé ’bɛ ga. Yé Azaɛl pla munu nwiin a pa gi.

Juda munu nwiinzan blɛn Joram

¹⁶ Izraɛl minwiinzan Akab be Joram lɛɛ soruzan nya, Juda minwiinzan Jozafat be Joram pla munu nwiin.

¹⁷ É kinin minwiinzan blɛn nya bléyian va, ’té a lɛɛ a yɔ do wɔlɛ vu ta fié yé é pla munu nwiin lɛɛ sɔraa Jérusalɛm.

¹⁸ Joram tawo Izraɛl minwiinzannu lé tawobɛ gi, Akab lé munu a kɛlɛ fɛan zo a zo, naa, é Akab lu si é na nya, yé we lé ke é naané Gakelebale yuɛ gi, yee lé é a kɛlɛ.

¹⁹ Naa, Gakelebale wuozan David lé we ma, é ’ka a va léé, é Juda kulu ga lo, blivolɛdére lé é a fe léé, é dan kyɛbɔ nɔ lɛ a lɛ yifaama a kulunu méléna, a yɛrama.

²⁰ Azé bléyi va Édom munu nwa léé, té Juda é pla ’wo nwiin lo, yé wo ’wo nwiinzan dɔ.

²¹ Joram go Saii élé goro faa nya é va; é nwa é béli yé Édom munu lé wa zi lɛ sɔɔ, é wo gyɛ, wo valé ’wolé gorovɔzannu nya, yé munu vlan buru wolé sɔkɔnnu ’léé.

²² Édom munu nwale Juda plale wo nwiin ma vo ana fɔɔ kyɔ. Libina munu nwa é ziin yee bléyi duo nya.

²³ Joram kɛlɛwe pɔnénu valé we faa lé é a kɛlɛ, wa é gyɛle Juda minwiinzan blɛnnu lé we zuo fe sɛbɛ gi.

²⁴ Joram yi gyɛ é tranu va yé wa pa é tranu va David lé fla. A be Akazia pla munu nwiin a pa gi.

Juda munu nwiinzan blɛn Akazia

²⁵ Izraɛl minwiinzan blɛn Akab be Joram lɛɛ vu ta fiézan nya, Juda minwiinzan blɛn Joram be Akazia pla munu nwiin.

²⁶ É kinin minwiinzan blɛn nya bléyian va, ’té a lɛɛ a yɔ do wɔlɛ fié yé é pla munu nwiin lɛɛ do Jérusalɛm. Wa bu laama Izraɛl minwiinzan Omri lu Ataali.

²⁷ Akazia tawo Akab lé kɔngimunu lé tawobɛ gi, yé we lé ke é naané Gakelebale yuɛ gi, yee lé é a kɛlɛ, bélé Akab lé kɔngimunu zo, naa, é nana Akab lé kɔngimunu va, a gɔnɔ la le a a lee, azama.

²⁸ É go Akab be Joram va guli danle we gi Siri munu nwiinzan blɛn Azaɛl va, Ramɔt lé ke Galaad tɛrɛ la, ana. Yé Siri munu Joram tuo.

²⁹ Yé minwiinzan Joram nɔla yé é go Jizréɛl, tuonu lé é a wo Sirinu lee, ’té é go Rama, guli dan lɛ Sirinu nwiinzan Azaɛl va, wo paale we gi. Juda minwiinzan Joram be Akazia go Jizréɛl we lɛ Akab be Joram va; é a gyɛ kɛlɛna, azama.