2 Minwiinzannu 7 - Kazambale lé Sebe Sauunu 1979

¹ Élizéé léé: ’Ka tɔné dɔ Gakelebale lɛ. Gakelebale léma: tɛlɛ, bléyi ’ko nya, wo dan burupun zima suo nya do ye lɛ sikla do nya, yé wo dan sɔnmlén suo nya fié ye lɛ sikla do nya, Samari flagɔrɔ ’léé.

² Minwiinzan blɛn lé mi blɛn lé é tɛn a ma, é a zi pa Bale lé mi lɛ léé: Dé Gakelebale la lɛ sooo, ’bɛ zo we é bɔa kɛlɛle lɛɛ? Yé Élizé léé: I dan a ye lɛ i yuɛ nya; naa, i ’ka dan a ble lɛ lo.

Siri sunyanu si ana

³ Pantɛngyɛzannu ziɛn a flagɔrɔ ’léé, yé wo lé ’wo ke lɛ léé: Mɛmalé ko vo ’ko fɔɔ yé ko gaa?

⁴ Dé é dɔ ko gi léé, ’ko go fla, lɔrɔ a fla yé ko dan ga lɛ ana; yé dé ko vo ’ko, ga duo lé ko dan wo lɛ. Kaa go Sirinu lé sɔkɔn dɔna; dé wo ko vo é yuɛma ko dan vo lɛ é yuɛma; dé wo ko gyɛ, ’té yee ga duo lé.

⁵ Amalé wo zi sia nyanadi bɛlaa la gunu nya gole Sirinu lé sɔkɔn dɔna we gi; wo bɔ Sirinu lé sɔkɔn dɔna aan wo, bé ye, mi do kpen ’ka ana lo.

⁶ Goronu valé wisoonu koo, sunyanu kiɛre koo, Mizan wo vun we Sirinu lé sɔkɔn dɔna, yé wo lé ’wo ke lɛ léé: Bé ye, Izraɛl minwiinzan Étinu minwiinzannu valé Éjipitinu minwiinzannu banwo léé, ’wo da guli dan kaa va.

⁷ Yé wo nwa yé wo fwila vlan nya nyanadi bɛlaa la gunu nya yé wolé sɔkɔnnu koo, wolé wisoonu koo, wolé sokofalenu koo, sɔkɔn dɔna a fɛan zo koo, wo wo faa vo yé wo vlan buru léé, té wo ga lo.

⁸ Pantɛngyɛzannu bɔ sɔkɔn dɔna aan wo, wo wɔra sɔkɔn do gi yé wo fɛ ble yé wo fɛ mini, yé gɔɔlifu koo, kyan koo, sɔnu koo, wo wo si yé wo go wo yɔɔ lɛ. Wo da é ziin, wo wɔra sɔkɔn do gi yé wo fɛnu sia yé wo go wo yɔɔ lɛ.

⁹ A zuo wo lé ’wo ke lɛ léé: Ko ’ka we kɛlɛna é zima lo. Yi ’ko a we néné feyi nya; dé ko vo ’ko zo, yé ko ’ka a fe lɛ lo yé tu kini a zo, we tɔntɔn é dan bɔ lɛ ko ma. ’Ka da, kaa go we ’ko zuo fe minwiinzan blɛn lé kɔn ’léé.

¹⁰ Wo go yé fla taginizannu lé wo ke flagɔrɔ ’léé, wo wo laa yé wo lé wo lɛ léé: Ko go Sirinu lé sɔkɔn dɔna, ’té mi do kpen ’ka ana lo, yé ko ’ka mi dére ’ma lɛ ana lo; wisoonu valé sokofalenu lé wo polu ke é dɔle, wo saa ɛ ke ana, yé sɔkɔnnu a wo dɔbɛ gi.

¹¹ Fla taginizannu siaa yé wo we ’ko fe minwiinzan lé kɔn gi munu lɛ.

¹² Minwiinzan nwa é béli yé é lé é wuomunu lɛ léé: We lé Sirinu a kɛlɛna, maa dan a gi fe lɛ ka lɛ. Wa gi dɔɔ léé, lɔrɔ a kaa gyɛna yé wo si sɔkɔn dɔna yé wo yɔɔ féinu ta, yé wo lé ’wo ke lɛ léé: Dé Izraɛl munu si fla ko dan wo kun lɛ é yuɛma yé ko dan wɔra lɛ wolé fla.

¹³ Minwiinzan wuozannu va mi do léé: Wisoonu lé wo ke tan fla . . . wa bélé Izraɛl munu lé wo vo, a zo, wa bélé Izraɛl munu lé wo ke zamaga wona, a zo . . . ’wo wo soru si ma, yé ’wo wo nwunvɔ yé we lé é kɛlɛ yé wa ye ma.

¹⁴ Yé wo goro fié valé wolé wisoonu si, yé minwiinzan munu nwunvɔ Sirinu lé sunyanu zuo yé é lé wo lɛ léé: ’Ka go a nagini.

¹⁵ Wo go wo zuo fɔɔ yé wo bɔ Juudɛn yuu ma; yé bé ye, zi faa ta a é sɔɔle sɔnu valé fɛnu lé Sirinu wo vuli wo tunule we ma, wo nya. Nwunvɔmunu da, yé wa zuo fe minwiinzan lɛ.

¹⁶ Munu bɔra yé wo ’wii Sirinu lé sɔkɔn dɔna ta. Yé wo burupun zima suo nya do ye sikla do ma yé wo sɔnmlén suo nya fié ye sikla do ma, Gakelebale dére yɛrama.

¹⁷ Minwiinzan flagɔrɔ ’léé taginiwe bɛ pa élé mi blɛn lé é tɛn ’bɛ ma, ’bɛ lee; naa, mi ’ko, munu a zɔn ’wo gane nya flagɔrɔ ’léé yé é ga, dére lé Bale lé mi a fe, ’té minwiinzan go a va bɛ, a yɛrama.

¹⁸ Bale lé mi a fe yese minwiinzan lɛ léé: Tɛlɛ, bléyi ’ko va, wo dan sɔnmlén suo nya fié ye lɛ sikla do ma, yé wo dan burupun zima suo nya do ye lɛ sikla do ma, Samari flagɔrɔ ’léé.

¹⁹ Yé minwiinzan lé mi blɛn lé Bale lé mi lɛ yese léé: Dé Gakelebale la lɛ sooo, ’bɛ zo we é bɔa kɛlɛle lɛɛ? Yé Élizé lé a lɛ léé: I dan a ye lɛ i yuɛ nya; naa, i ’ka dan a ble lɛ lo.

²⁰ Yé é bɔ a zo webozen nya; munu a zɔn ’wo gane nya flagɔrɔ ’léé, yé é ga.