2 Minwiinzannu 6 - Kazambale lé Sebe Sauunu 1979

Zaawɔlɛ dɔ ’yi yuɛ la

¹ Balelayemunu lé Élizé lɛ léé: Bé ye, fɛana lé ko ke é nyanale i va ana ’ko, ana a kiéné ko ma.

² Kaa go Juudɛn yuu ma, yé ko faa do do ’é da kɔnyili nya, yé ko ko nyanana kɛlɛ. Élizé lé wo lɛ léé: ’Ka go.

³ Yé wo va mi do léé: ’I da i wuozannu va. Yé é léé: An dan go lɛ.

⁴ Yé wo go wo nya. Wo bɔ Juudɛn yuu ma aan wo, wo yilinu vɔ.

⁵ Wo va mi do a yilibɛ bɔina aan wo zaawɔlɛ vɔ ’yi va. É siaa léé: Yé! Anzan, maa a doro pa é wo.

⁶ Bale lé mi léé: É vɔ kyɛɛn? Yé wana gɔɔn a lɛ. Yé Élizé yili kuru do bɔi yé é a vɔ yee fɛ duona, yé zaawɔlɛ dɔ ’yi yuɛ la.

⁷ A zuo é léé: Bé si. Yé ’bɛ é bɛ soi yé é a si.

Izraɛl munu Siri sunyanu kele

⁸ Siri minwiinzan a guli danna Izraɛl va yé wo ’wuo tɛn ékeva é wuomunu nya yé é léé: Maa dan sɔkɔn dɔ lɛ fɛdona.

⁹ Naa, Bale lé mi we pa Izraɛl minwiinzan lɛ zia léé: Té i go fɛkona lo, naa, Siri munu a gona ’bɛna.

¹⁰ Yé Izraɛl minwiinzan munu nwunvɔ fɛna lé Bale lé mi a fe, ’té é a nagɔɔn a lɛ, ana, yé wo dɔ ana. ’Bɛ bɔ, gɔnɔ do valé gɔnɔ fié kaan lo.

¹¹ Siri minwiinzan bli kyɛ dɔ yé é wuomunu laa yé é lé wo lɛ léé: Dé ko va mi kyɛn ɛ péli ke é vɔle Izraɛl minwiinzan vaa? ka ’ka azan gɔɔn‐an an lɛ loo?

¹² A wuomunu va mi do léé: Anzan, minwiinzan, mi do kpen kaan lo; naa, we lé bé fé i yiakɔn gi, balelayezan Élizé lé ke Izraɛl tɛrɛ la, yee ɛ zuo fé Izraɛl minwiinzan lɛ.

¹³ Yé minwiinzan léé: ’ka go, dé é a fɛana, ’ka ana ye yé maa dan go lɛ a kun lɛ. Wo da a fe lɛ a lɛ léé: Bé ye, é a Dotan.

¹⁴ Wisoonu koo, goronu koo, sunyanu kiɛre koo, é wo nwunvɔ yé wo bɔ fla é béli yé wo fla zi lɛ sɔɔ.

¹⁵ Bale lé mi wuozan nwa bladi tutu yé é bɔra; yé bé ye, sunyanu koo, wisoonu koo, goronu koo, fla zi lɛ a é sɔɔle wo nya. Yé Bale lé mi wuozan lé a lɛ léé: Yiba, anzan, ko kɛla kaa?

¹⁶ É lé a lɛ léé: Té i kana lo; ko vamunu a kiɛre é mini wo vamunu ta.

¹⁷ Élizé bazoro yé é léé: Gakelebale, bé yuɛ fuo yé ’é wo ye. Yé Gakelebale a wuozan yuɛ fuo yé é a ye léé, wisoonu valé kyɛgoro lé ke Élizé zi wo gɔ ma faa ble.

¹⁸ Sirimunu da Élizé vazia. Yé é bazoro Gakelebale lɛ léé: Ilé zanté, ’i munu ’ko yuɛ ’wii. Yé Gakelebale wo yuɛ ’wii, Élizé dére yɛrama.

¹⁹ Élizé lé wo lɛ léé: Ana zi ’ka ’ko lo, yé yee flaan ke ’ko lo; ’ka da an zuo yé mi lé ka ke a ginina maa dan go lɛ ka nya a va. Yé é go wo nya Samari.

²⁰ Wo bɔ Samari aan wo, Élizé léé: Gakelebale, ’i munu ’ko yuɛ fuo, yé ’wo fɛna ye. Yé Gakelebale wo yuɛ fuo yé wa ye léé, ’wa. Samari fla guru la.

²¹ Izraɛl minwiinzan wo ye aan wo, é lé Élizé lɛ léé: An ti, ’maa wo gyɛɛ? maa wo gyɛɛ?

²² Élizé a zi pa léé: Té i wo gyɛ lo. Munu lé i wo kun ilé gwɔun valé ilé sa nya ’naan, i wo gyaa? ’I buru valé ’yi nɔ wo lɛ, wa ble yé wa mini; ’bɛ zuo ’wo go ’wozan va ma.

²³ Izraɛl minwiinzan fɛ kiɛre nɔ wo lɛ yé wo fɛ ble yé wo ’yi mini; a zuo é wo pa zia yé wo go ’wozan va. Yé Siri munu lé sunyanu ’ka da lɛ Izraɛl lé tɛrɛ la é dɛrɛ lo.

Siri sunyanu Samari mabɛn

²⁴ ’Bɛ zuo Siri minwiinzan Bɛn‐Adad élé sunyanu faa zén ékeva yé é go yé é Samari mabɛn.

²⁵ Lɔrɔ dɔ Samari é baba; yé wa mabɛn fɔɔ yé sokofale ’wuo do vlɛ kɛlɛ gɔɔlifu sikla yɔ ziɛn yé plawuo bo litré buu vlɛ kɛlɛ gɔɔlifu sikla soru.

²⁶ Minwiinzan a giéna flagɔrɔ ta bléyian va, lezan do siaa a lɛ léé: Minwiinzan, anzan, ’i an si we gi!

²⁷ É lé a lɛ léé: Dé Gakelebale ’ka i si lɛ we gi lo, mɛ nya lé an dan i si lɛ we gii? ’Sa sunwona fɛ lé laa, dɔrɔporo borona fɛ léé?

²⁸ Yé minwiinzan lé a lɛ léé: Mɛ léé? É a zi pa léé: Lezan mun, é lé an lɛ léé: ’An be nɔ, ko ble kyɔ yé tɛlɛ ko ’ézé ble.

²⁹ Ko an be dɔne yé ko a ble. ’Bɛ é tu kini maa lé a lɛ léé: ’I be nɔ, ko ble. Naa, é é be yɔɔ.

³⁰ Minwiinzan lezan ’ko dére ’ma aan wo, élé sɔnu fia, ’té éé giéan flagɔrɔ ta; yé munu a ye léé, bɔlɔ a a ma, alé sɔ wuo.

³¹ Minwiinzan léé: Dé Safat be Élizé ’wuo vo é ta kyɔ, Bale ’é lɛdɔ an gi élé plɛplɛ faa nya ma.

³² Élizé a é nyanale élé kɔn gi, ’té mi segelenu a é nyanale a va. Naa, nwunvɔzan ’ka tan bɔ lɛ lo, yé Élizé lé mi segelenu lɛ léé: Ka ye léé, migyɛzan be ’ko mi nwunvɔ an ’wuo kinile we gii? ’Ka tɔné dɔ. Dé nwunvɔzan da, ’ka kɔn lɛ tan yé ka a nyunu duoli nya. Azan gane vun ’ka wena a zuo loo?

³³ É a tan we fena wo lɛ tɔɔn, nwunvɔzan da a vazia, yé é léé: Bé ye, we tɔntɔn ’ko si Gakelebale va; mɛmalé an bli vo Gakelebale lɛ é dɛrɛɛ?