2 Minwiinzannu 5 - Kazambale lé Sebe Sauunu 1979

Pantɛngyɛzan Naaman béli

¹ Siri minwiinzan lé sunyanu nwiinzan, Naaman, a mi zin nya ézan yuɛ gi, ’té éé a mawe kɛla é zima; a nya lé Gakelebale Sirimunu si we gi, azama. Naa, mi ’ko lé ke mi plɛplɛ valé nyanazan nya, é a pantɛngyɛzan nya.

² Siri munu go guli lɛ do dan lɛ wo palu ma palu ma yé wo blɛnné do kun Izraɛl tɛrɛ la yé wa kɛlɛ luu nya; éé nyanama paan Naaman na va.

³ Yé blɛnné lé ézan Naaman na lɛ léé: Dé é a lé anzan a kɔɔn balelayezan lé ke Samari tɛrɛ la, a va, balelayezan é dan pantɛn si lɛ a ma.

⁴ Naaman go a fe lɛ ézan lɛ léé: Blɛnné lé é si Izraɛl tɛrɛ la, é we ’ko valé we ’ko fe an lɛ.

⁵ Yé Siri minwiinzan léé: ’I go Samari yé maa dan sɛbɛ nɔ lɛ i lɛ Izraɛl minwiinzan zé nya. É go gɔɔlifu talan vu koo, kyan sikla baa yaa koo, sɔ givɔsɔ vu koo, wo nya é lee.

⁶ Izraɛl minwiinzan lé sɛbɛ a a lee, ’té wa gyɛ a gi léé: Sin, dé i sɛbɛ ’ko ye, i dan a gi dɔɔ lɛ léé, maa an wuozan Naaman pa i lɛ zia léé, ’i alé pantɛn si a ma.

⁷ Dé Izraɛl minwiinzan nyaa sɛbɛ tafele nya tɔɔn, ’élé sɔnu fia yé é léé: Maa a bale do nya, mi gyɛle valé mi vole é yuɛma we gi, yé éé a fé an lɛ léé, maa pantɛn si mi maa? ’Ka gini do, yé ’é dɔ ka gi léé, é a an ’léé wɛɛna.

⁸ Bale lé mi Élizé a ’ma aan wo léé, Izraɛl minwiinzan élé sɔnu fia, é we pa minwiinzan lɛ zia léé: Mɛmalé ilé sɔnu fiaa? ’I zi nɔ a lɛ léé, ’é da maa va yé é dan a gi dɔɔ lɛ léé, balelayezan a Izraɛl.

⁹ Naaman da élé wisoonu valé élé goro nya, yé é dɔ Élizé lé kɔn ’léé.

¹⁰ Élizé mi nwunvɔ a fele a lɛ we gi léé: ’I go, ’i zuru Juudɛn yuu va gɔnɔ sɔrafié. I kɔlɛ é dan nɔla lɛ yé i gi é dan bɔ lɛ.

¹¹ Naaman bli fli yé é go a fele nya léé: Bé ye, é a an gi kɔɔn léé, é dan bɔra lɛ an va é boan yé é dan Gakelebale élé Bale tɔ laa lɛ yé é dan ’é bɛ gié lɛ pantɛn ta yé pantɛn é dan si lɛ an ma.

¹² Damas lé yuunu, Abana yuu valé Paapaa yuu lé ’yi ’ka é zima é mini Izraɛl lé ’yinu faa ta loo? An ’ka bɔalɛ an zuru ’bɛna yé an gi é bɔ loo? Yé é nɔla ’té é go é bli flile baba nya.

¹³ A wuozannu bié we fele a lɛ we gi, yé wo léé: An ti, dé balelayezan we plɛplɛ fe i lɛ kɔɔn, ’té i ’kanɔ a kɛla loo? Yé dé é a fe i lɛ léé, ’i zuru yé i gi é bɔ nii? É ’ka lé i ’bɛ kɛlɛ loo?

¹⁴ Yé é go yé é Juudɛn ’yi bɔ gyɛ gɔnɔ sɔrafié Bale lé mi dére yɛrama; yé a kɔlɛ kɛlɛ é ziin bélé né boroné kɔlɛ zo, yé a gi bɔ.

¹⁵ Naaman valé é vamunu faa nɔla Bale lé mi va é ziin. É bɔ aan wo é go a va yé é léé: Bé ye, maa gi dɔɔ léé, Bale ’ka tɛrɛ bɛ la lo, ’té dé é ’ka Izraɛl tɛrɛ nya lo. Yé sin, ilé zanté, blɛ lé i wuozan é dan a kɛlɛ lɛ i lɛ, bé si.

¹⁶ Élizé a zi pa léé: Gakelebale lé an ke a wuozan nya, é a é yuɛma. Maa ’ka a sié lo. Naaman a tunu, naa, é ’ka a nyi si lɛ lo.

¹⁷ Yé Naaman léé: Dé i sɔn vɔ anlé blɛ ma, ’i zi nɔ an lɛ, ’an tɛrɛ si sokofale fié sikɔné nya; naa, maa ’ka a va léé, an wi kyɛ ble yé an saraka bo bale bɛnu lɛ é dɛrɛ lo, Gakelebale do kpen lɛ léé, an dan wo bo lɛ.

¹⁸ We lé an zanté vɔ Gakelebale lɛ léé, ’é an ma we vo a ma, yee lé ke ’ko. Dé anzan wɔra Rimɔn lé kɔn gi yiale é bli ta ana we ma, yé é tɛn an ma, maa é ziin, an yiaan an bli la Rimɔn lé kɔn gi: Gakelebale ’é i wuozan ma we vo ma, ’té dé an yia an bli la Rimɔn lé kɔn gi.

¹⁹ Élizé lé a lɛ léé: ’I go drɔɔ. Naaman si Élizé va yé é bɔ é ’lɛ sɛ aan wo,

Géazi lé we

²⁰ Bale lé mi Élizé wuozan Géazi lé é bli gi léé: Anzan Siri mi Naaman ’ko vo yé fɛ lé é da a nya, é ’ka a si lɛ a lee lo; Gakelebale a é yuɛma. Maa dan vlan buru lɛ a zuo yé maa dan fɛ ke si lɛ.

²¹ Yé Géazi vlan buru Naaman zuo. Naaman a ye léé, é a dana ’é zuo vlan nya, é zun élé goro gi yé é go a si lɛ zia yé é léé: I pai a drɔɔ?

²² É a zi pa léé: An pai a drɔɔ. Anzan an nwunvɔ, maa fe i lɛ léé: Balelayezannu benu va pɛniɛ fié si Éfraim gɔ ma lao yé wo da an va; ilé zanté, ’i gɔɔlifu talan do valé sɔ givɔsɔ fié nɔ an lɛ wozé nya.

²³ Naaman léé: ’I gi kɛlɛ drɔɔ, bé si talan fié. Yé é a tunu yé é gɔɔlifu talan fié pa bɔlɔ fié gi yé é sɔ givɔsɔ fié nɔ a lɛ yé é wo dɔ é wuozannu fié nwiin yé wo goan, ’té Géazi a wo zuo.

²⁴ Wo bɔ gɔ ma aan wo, Géazi yee fɛnu si wo lee yé é wo pa kɔn gi, yé é munu ’ko pa zia yé wo go.

²⁵ A zuo Géazi go ézan va. Élizé lé a lɛ léé: Géazi, i si kyɛɛ? É a zi pa léé: I wuozan ’ka go lɛ fɛ do kpen na lo.

²⁶ Naa, Élizé lé a lɛ léé: Dé gɔné ’ko zun élé goro gi yé é i si zia ’naan, ’té an léli ’ka ana loo? Gɔɔlifu koo, sɔnu koo, ɔliviyili koo, dɔrɔyili koo, ’blanu koo, dirinu koo, wuogɔnénu valé wuolomu koo, wo sibléyi lé ke koo?

²⁷ Naaman lé pantɛn é dan zén lɛ bii valé i kulu ma lɛɛfaama. Yé Géazi si Élizé va pantɛn nya é ma fu bélé kununu zo.