2 Minwiinzannu 4 - Kazambale lé Sebe Sauunu 1979

Gyɛzara le lé nyɔnɔ

¹ Balelayemunu va mi do na siaa Élizé lɛ yé é léé: I wuozan, an zana, ga, yé bé gi dɔɔ léé, yee i wuozan éé kanaan Gakelebale lee; sin, vɛɛnzan da anlé nénu fié si lɛ, wo kɛlɛle luunu nya we gi.

² Élizé lé a lɛ léé: An mɛ ɛ kɛlɛ i lɛɛ? Mɛ fɛ a i lee kɔn gii? Bé fe an lɛ. É a zi pa léé: Fɛ do kpen ’ka i wuo le lee kɔn gi lo, ’té dé é ’ka nyɔnɔ kuo do nya lo.

³ Yé é léé: ’I go bɔnu laa i bɔlunu lee, bɔ koronu nya, bé laa kiɛre.

⁴ Dé i da é ziin, ’i kɔn lɛ tan bii valé ilé nénu ta; ’i nyɔnɔ zén bɔ ’konu gi, yé dé a do fan ’i ’bɛ dɔra bɛ do la. Yé lezan go.

⁵ É kɔn lɛ tan yeebozen valé élé nénu ta; woo bɔnu no a lɛ, ’té éé nyɔnɔ zén‐é wo gi.

⁶ Bɔ faa fan aan wo, é lé é be lɛ léé: ’I bɔ do nɔ an lɛ é ziin. Naa, ’bɛ lé a lɛ léé: Bɔ bɛ ’ka lo. Yé nyɔnɔ bɔle kini.

⁷ É go a zuo fe lɛ Bale lé mi lɛ yé ’bɛ léé: ’I go nyɔnɔ dan, yé ilé vɛɛn banwo; yé gɔɔli lé é vo, ’i bii valé i benu mawe kɛlɛ a nya.

Sunɛm le be béli

⁸ Yi do nya Élizé a giéna Sunɛm. Yara kini le do ana mi, yé ’bɛ a tunu léé, ’é fɛ ble. Dé é gié ana vu, éé goo fɛble lɛ alé kɔn ’léé.

⁹ Lezan lé é zana lɛ léé: Bé ye, maa gi dɔɔ léé, mi ’ko lé éé giéan kolé kɔn ’léé yifaama, é a Bale lé mi sauun do nya.

¹⁰ ’Ko kɔnné do dɔ a lɛ kɔn nwiin ma, yé yialafɛ koo, tablé koo, blin valé fintran koo, ’ko wo dɔra a gi ma, yé dé é da ko va yé é yia a gi.

¹¹ Élizé da Sunɛm é ziin yé é go kɔn nwiin kɔnné gi yé é yia ’bɛna.

¹² É lé é wuozan Géazi lɛ léé: ’I Sunɛm le ’ko laa. Géazi a laa yé é da a va.

¹³ Yé Élizé lé Géazi lɛ léé: Bé fe a lɛ léé: Bé ye, i we zin ’ko kɛlɛ, naa, ko dan a kɛlɛ lɛ i lɛ kaa? É sɔ i lɛ léé, wo ilé we fe minwiinzan lɛɛ? dé ’bɛ kaan lo, wa fe sunyanu nwiinzan lɛɛ? É a zi pa léé: Maa nyanaan anlé munu méléna.

¹⁴ Yé é léé: Ko mɛ kɛlɛ a lɛɛ? Géazi léé: A be ’ka lo, yé a zana a é kwa.

¹⁵ Yé é léé: Bé laa. Géazi a laa yé é da kɔn ’léé.

¹⁶ Élizé lé a lɛ léé: Bléyi ’ko duo nya, lɛɛ bɛ gi, négɔné é dan kɛlɛ lɛ i lee. Yé é léé: Gba, anzan, Bale lé mi, té i dabli kɛlɛ i wuo le lɛ lo.

¹⁷ Le ’ko bɔn si yé é négɔné yaa bléyi duo nya ’bɛ zuo lɛɛ gi, Élizé a fe a lɛ fɛan zo, a zo. Né tin.

¹⁸ Yi do nya é go é ti zuo ’sagyɛmunu va,

¹⁹ yé é lé é ti lɛ léé: An ’wuo! an ’wuo! A ti lé é wuozan lɛ léé: ’I goan é bu va.

²⁰ A wuozan né si yé é goan é bu lɛ. Né vo é bu gane la fɔɔ yiéyi pa yé é ga.

²¹ Lezan nwa, é né yia Bale lé mi lé yialafɛ ta, é kɔn lɛ tan a ta, yé é bɔra.

²² É zana laa, yé é léé: ’I wuozan do valé sokofaleda do nɔ an lɛ ma; maa dan go lɛ fié fié Bale lé mi va yé an da.

²³ Yé é léé: Mɛmalé i a a va léé, i go a va kyɔɔ? Moné dɛrɛ ’ka tan bɔra lɛ lo, yé flinyi kaan lo. É lé é zana lɛ léé: Té i ’bɛ gi bɔrɔ pa lo.

²⁴ A zuo é nyanatafɛ pla sokofale tina punu yé é lé é wuozan lɛ léé: ’I go gole nya, dé maa ’ka a fe lɛ léé, ’i dɔ, lo, té i dɔ lo.

²⁵ Amalé é zi sia yé é go Bale lé mi va, Kaamɛl gɔ ma. Bale lé mi a ye baa yé é lé é wuozan Géazi lɛ léé: Sunɛm le lé é dan bɛ.

²⁶ ’I go a si zia vlan nya, yé bé fe a lɛ léé: I a drɔɔ? I zana valé i be a drɔɔ? É léé: Wa drɔɔ.

²⁷ É bɔ Bale lé mi va gɔ ma tɔɔn é ’wuo wɔra a gane wuo. Géazi bié a nyunule we gi. Naa, Bale lé mi léé: Bé vo, a bli kyɛ dɔ é baba yé Gakelebale a yɔɔ an ma yé é ’ka an bɔn gi kini lɛ a we ma lo.

²⁸ Yé lezan léé: Maa négɔné ma laa anzan lee yi laa? Maa ’ka yi la a fe lɛ léé, té i dabli kɛlɛ an lɛ lo loo?

²⁹ Élizé lé Géazi lɛ léé: ’I sɔ dɔ i gyɛn, ’i anlé tawomayili sia yé ’i go. Dé ka valé mi do kee, té i we a va lo; dé mi do we i va, té i we lo. ’I anlé tawomayili pla né yara.

³⁰ Né bu léé: Gakelebale a é yuɛma yé i léli a é yuɛma. Maa ’ka sié i va lo. Yé Élizé nwa yé é go lezan zuo.

³¹ Géazi go wo ’lɛ yé é tawomayili pla né yara; naa, né dére ’ka wena lo yé a zuru ’ka vɔa lo. É nɔla Élizé sina zia yé é a zuo fe ’bɛ lɛ léé: Né ’ka tan vuo lɛ lo.

³² Élizé bɔ kɔn ’léé aan wo, bé ye, ’té né gale a é yiale Élizé lé yialafɛ ta.

³³ Élizé wɔra yé é kɔn lɛ tan woo fiénu ta yé é bazoro Gakelebale lɛ.

³⁴ É nwa yé é yia né ta; é lɔlu dɔ a ’léé, yé é yuɛ dɔ a yuɛ ta, yé é bɛnu pa a bɛnu ta, yé é soi a ta pɔrɔlɔɔ. Yé né kɔlɛi kyɛ dɔ.

³⁵ Élizé si a ta yé é vo nɔɔna kɔn gi, a zuo yé é go loru é ziin yé é yia né ta. Né tin bo gɔnɔ sɔrafié, yé é yuɛnu fuo.

³⁶ Élizé Géazi laa yé é léé: ’I Sunɛm le ’ko laa. Géazi a laa yé é da Élizé va yé ’bɛ lé a lɛ léé:

³⁷ ’I be si. Lezan dia a gane ma yé é yia é bli la. Yé é be si yé é bɔra.

Bɔgifɛ valé sɔnmién buru yɔ do

³⁸ Élizé da Gilgal é ziin, yé lɔrɔ dɔ ana tɛrɛ la. Balelayemunu a é nyanale a ’lɛ, yé é lé é wuozan lɛ léé: ’I bɔ blɛn dɔ kyɛ ta, yé ’i zian dɔne Balelayemunu lɛ.

³⁹ Wo va mi do bɔra zianbla sole we gi; é bwi gi bawɔrɔ do ye yé é zoo lé kuo so yé élé sɔ fan wo nya. É da é ziin aan wo é wo bɔi yé é wo zén zian va bɔ gi. Naa, wo ’ka a dɔɔa lo.

⁴⁰ Yé wa dɔra munu ’konu ma; wo zian flan tɔɔn, wo siaa léé: Bale lé mi, ga a bɔ gi! Yé wo ’ka bɔa a blele lɛ lo.

⁴¹ Élizé léé: ’Ka da burupun nya. Yé é a ke zén bɔ gi yé é léé: Bé nɔ munu ’konu lɛ ’wa ble. Yé fɛ naané ’ka bɔ gi é dɛrɛ lo.

⁴² Mi do si Baal‐Salisa yé é da. É da élé féifɛ vinin lé buru nya Bale lé mi lɛ, sɔnmlén buru yɔ do, é valé ’sa nɛnɛ dɛrɛ nya élé bɔlɔ gi. Élizé léé: Bé nɔ munu ’ko lɛ, ’wa ble.

⁴³ A wuozan a zi pa léé: Maa kɛla kaa yé maa a nɔ mi yɔ soru lɛɛ? Naa Élizé léé: Bé nɔ munu ’konu lɛ, ’wa ble; naa, Gakelebale léma: Wo dan a ble lɛ yé a ke é dan vo lɛ.

⁴⁴ É buru nɔ wo lɛ; yé wa ble yé a ke vo, Gakelebale dére yɛrama.