2 Minwiinzannu 3 - Kazambale lé Sebe Sauunu 1979

Izraɛl valé Juda guli dan Moabnu va

¹ Juda minwiinzan Jozafat plale mi nwiin lɛɛ vu ta sɔraazan nya, Akab be Joram pla Izraɛl nwiin Samari. É pla wo nwiin lɛɛ vu ta fié.

² We lé ke é naané Gakelebale yuɛ gi, yee lé é a kɛlɛ, naa, é ’ka a kɛlɛ lɛ bélé é ti valé é bu zé zo lo. Miyilinu lé a ti a kɛlɛ Baal nya, é wo zana a gi;

³ naa, ébo nɔ Nébat be Jéroboam lé é Izraɛl kɛlɛ wenyanékɛlɛzannu nya, alé wenyané kɛlɛle lɛ, yé é ’ka daan lɛ a ma lo.

⁴ Trubɛnu a Moab minwiinzan Mésa lee, yé ’blanénu baa yɔ fié wɔlɛ vu koo, ’blagɔné baa yɔ fié wɔlɛ vu koo, wo kyɛɛ koo, Izraɛl minwiinzan éé woo sié a lee lɛnpo nya.

⁵ Akab ga aan wo, Moab nwiinzan nwa Izraɛl nwiinzan ma.

⁶ Minwiinzan Joram si Samari yé wo Izraɛlnu faa gié a ’lɛ.

⁷ É zi sia yé é lé Juda nwiinzan Jozafat lɛ léé: Moab nwiinzan nwa an ma; é sɔ i lɛ léé, i go an va guli danna Moab vaa? Jozafat a zi pa léé: Maa é dan go lɛ, anlé munu valé ilé munu a do, anlé wisoonu valé ilé wisoonu a do, maa valé bii a do.

⁸ Yé é léé: Kaa giéan zi kyɛn taa? Joram léé: Kaa giéan Édom bwi gi zi ta.

⁹ Izraɛl minwiinzan koo, Juda minwiinzan koo, Édom minwiinzan koo, wo go; wolé yi sɔrafié tawole zuo, sunyanu valé winu lé ke wo zuo, wolé ’yi nyaa.

¹⁰ Yé Izraɛl minwiinzan léé: Yiba! Gakelebale minwiinzannu yaa ’ko laa léé, ’é wo pa Moab minwiinzan lee.

¹¹ Naa, Jozafat léé: Gakelebale lé balelayezan do kpen ’ka ’ko yé ko bɔa we laale lɛ Gakelebale lee a nya loo? Izraɛl minwiinzan wuozannu va mi do léé: Safat be Élizé lé, éé ’yi zén‐é Éli bɛ ma, ’bɛ a ’ko.

¹² Yé Jozafat léé: Gakelebale dére a a va. Izraɛl minwiinzan koo, Jozafat koo, Édom minwiinzan koo, wo go a va.

¹³ Élizé lé Izraɛl minwiinzan lɛ léé: Ko a é nanale i nya mɛ we taa? ’I go i ti lé balelayezannu valé i bu lé balelayezannu va. Yé Izraɛl minwiinzan lé a lɛ léé: Gba, naa, Gakelebale minwiinzan yaa ’ko laa léé, ’é wo pa Moab munu lee.

¹⁴ Élizé léé: Sunyanu lé Gakelebale lé maa ke a wuozan nya, é a é yuɛma; dé é ’ka kɛlɛ lɛ Juda minwiinzan Jozafat lé we ma lo, ’té maa ’kanɔ an yara nɔlaan i ta lo, ’té maa ’kanɔ an yuɛ vɔa i ta lo.

¹⁵ Naa, sin, ’ka da kɔnɔgyɛzan do nya an lɛ. Kɔnɔgyɛzan a kɔnɔ gyɛna bléyian va, Gakelebale ’é bɛ pla Élizé ta.

¹⁶ Yé é léé: Gakelebale léma: ’Ka gurunu bo gɔ worona ’kona, ’ka gurunu bo.

¹⁷ Naa, Gakelebale léma: Ka ’ka dan fu ye lɛ lo, yé ka ’ka dan lɛɛ ye lɛ lo, yé gɔ worona ’ko é dan fan lɛ ’yi nya, yé ka koo, kalé trubɛnu koo, kalé winu koo, ka dan ’yi mini lɛ.

¹⁸ ’Bɛ a we kiéné nya Gakelebale yuɛ gi. É dan Moabnu pa lɛ ka léé;

¹⁹ kalé guli bɛ é dan dia lɛ fla plɛplɛnu faa valé fla vabolenu faa ta, ka dan yili zimanu faa sɛrɛ lɛ, ka dan ’yibɔnanu faa lɛ tan lɛ, yé ka dan féi zimanu faa sɛrɛ lɛ gɔlɛnu nya.

²⁰ Bladi na, saraka bobléyi va, bé ye, ’yi si Édom vazia, yé é sɔɔla ana tɛrɛ faa la.

²¹ Moab munu a ’ma léé, minwiinzannu a dana guli danna ’wo va, mi faa lé woo bɔa gulidanfɛ sile lɛ, wo wo laa yé wo dɔ wolé tɛrɛ glɛ la.

²² Wo nwa bladi tutu, yé yiri zén ’yi ta aan wo, Moab munu ’yi ye wo ’lɛ, sɔɔn bélé nyɛ zo.

²³ Wo léé: Nyɛ lé! minwiinzannu gwɔun so é kɔlɛ gi ’wo ke ma yé wo wo ke gyɛ; sin, Moab munu, kaa go gulizarafɛnu si.

²⁴ Yé wo tawo Izraɛl lé sɔkɔn dɔna ma. Naa, Izraɛl nwa yé wo Moabnu gyɛ, yé Moabnu vlan buru wo lee. Wo wɔra wolé tɛrɛ la boenwo, yé wo Moabnu gyɛ.

²⁵ Wo flanu guru zana a gi. Wo faa do do gɔlɛ vuli féi zimanu ta, yé wo wo ta sɔɔla wo nya. Wo ’yibɔnanu faa lɛ tan yé wo yili zimanu faa sɛrɛ; yé paalu vuli munu Kii‐Arésɛt zi lɛ sɔɔ, yé wo wo guru zana a gi yé wo gɔlɛ saa vo ana.

²⁶ Moab minwiinzan a ye léé, guli bɛ mini ’é lɛ, é gwɔun soi munu si wuru yaa yɔ soru yé é kwa kuli léé, wo zi pla ’é ’lɛ yé é go Édom minwiinzan va tegele; naa, é ’ka bɔ lɛ a lɛ lo.

²⁷ Yé a be vininzan lé é a lé ’bɛ é pla munu nwiin a pa gi, é ’bɛ si yé é ’bɛ kyɛ ble élé bale lɛ flagɔrɔ ta loru. Yé bliflile blɛn kɛlɛ Izraɛl ma yé wo si Moab minwiinzan zi, yé wo go ’wolé tɛrɛ la.