2 Minwiinzannu 25 - Kazambale lé Sebe Sauunu 1979

Babilɔn munu Jérusalɛm si

¹ Sédésias plale munu nwiin lɛɛ sɔraziɛnzan lé moné vuzan lé yi vuzan nya, Babilɔn nwiinzan Nébukanɛsaa da Jérusalɛm ma, élé sunyanu faa nya é va; é sɔkɔnnu dɔ a ’lɛ, yé é tɛrɛ zun dɔ a zi.

² Wo fla mabɛn fɔɔ minwiinzan blɛn Sédésias lɛɛ vu ta dozan nya.

³ Moné yi sɔraziɛnzan nya, lɔrɔ dɔ fla plɛplɛ yé ana munu lé buru ’ka lo.

⁴ Yé wo zan dɔ flagɔrɔ ma; yé gulidanmunu faa vlan buru é béli, flagɔrɔ ’léé zi lé ke minwiinzan blɛn lé zian féi gɔrɔ fié méléna, a ta, bléyian va lé Kaldémunu fla zi lɛ sɔɔ, a bléyi va. Vlanburuzannu go fɛna pɛblɛɛna zi ta.

⁵ Naa, Kaldémunu lé sunyanu minwiinzan blɛn zuo bin yé wo bɔ a ma Jériko lé fɛna pɛblɛɛna, yé alé sunyanu kini ékema a ma.

⁶ Wo minwiinzan kun yé wo go a nya Babilɔn minwiinzan va, Ribla; yé wo alé we ble ’bɛna.

⁷ Wo Sédésias benu bɔrɔ bo é yuɛ va; a zuo wo Sédésias yuɛnu so yé wo zénégɔgɔbale vɔ a ma, yé wo go a nya Babilɔn.

Wo Bale lé kɔn ’wii yé wo go Juda munu nya Babilɔn

⁸ Moné soruzan lé yi sɔrafiézan nya, Babilɔn nwiinzan wuozan, sunyanu ’lɛzan Nébuzaradan da Jérusalɛm. Babilɔn nwiinzan Nébukanɛsaa plale munu nwiin lɛɛ vu ta sɔraziɛnzan lé.

⁹ Gakelebale lé kɔn koo, minwiinzan blɛn lé kɔn koo, Jérusalɛm lé kɔnnu faa koo, é wo kyɛ ble; dé kɔn‐an a we keoo, é wo kyɛ ble.

¹⁰ Kaldé lé sunyanu faa lé ke sunyanu ’lɛzan va, wo Jérusalɛm zi gɔrɔ faa zana.

¹¹ Munu lé wo ke é nyanale fla koo, wo lé wo go Babilɔn nwiinzan va koo, mi gu pɔnénu koo, sunyanu ’lɛzan Nébuzaradan go wo nya luu gi.

¹² Naa, sunyanu ’lɛza ana tɛrɛ la nyanégyɛzannu ke vo dɔrɔféi pazannu valé féipazannu nya.

¹³ Zénéwɛyili lé ke Gakelebale lé kɔn gi koo, zénéganenu koo, zéné’wolikana lé ke Gakelebale lé kɔn gi koo, Kaldémunu wo yéli, yé wo go a zéné nya Babilɔn.

¹⁴ Kyɛyeezéngifɛnu koo, diadianu koo, sɛnnénu koo, kananénu koo, zénéfɛ faa lé wo Gakelebale lé kɔn gi nyanama pa wo nya koo, wo wo si.

¹⁵ Kyɛnyɛ sifɛ valé kananu lé wa kɛlɛ kyan nya, é valé wo lé wo wo kɛlɛ gɔɔlifu nya, sunyanu ’lɛzan wo si é ziin.

¹⁶ Wɛyili fié koo, ’wolikana koo, ganenu koo, Salomɔn wo kɛlɛ Gakelebale lé kɔn zé nya, yé zénéfɛnu faa ’ko, wo ’ka wo bɛn dɔɔ lɛ lo.

¹⁷ Wɛyili do torole a mɛtrɛ sɔraziɛn, yé wɛyili ’wuo a é ta loru, wa kɛlɛ zéné nya yé a torole a mɛtrɛ do é buu; séli valé grénadéyili poro foto a wɛyili’wuo zi, a faa a zéné nya; wɛyili fiézan valé alé séli a yee duo zo.

¹⁸ Balebanmunu ’lɛzan Séraja koo, Balebanzan fiézan Sofoni koo, kɔn ’léé tabinzannu yaa koo, sunyanu ’lɛzan wo si.

¹⁹ Miblale do lé ke fla, ’té é ke é plale gulidanmunu nwiin koo, we pla minwiinzan lɛzannu va mi soru lé wo wo ye fla koo, sunyanu nwiinzan lé sɛbɛgyɛzan lé éé munu tɔ gya koo, ana tɛrɛlamunu yɔ yaa lé wo wo ye fla koo, é wo kun.

²⁰ Sunyanu ’lɛzan Nébuzaradan wo si, yé é go wo nya Babilɔn minwiinzan va Ribla.

²¹ Babilɔn nwiinzan wo gyɛ yé wo ga Ribla, Amat tɛrɛ la.

Gbɔrɔnama Gédalia lé we

²² ’Bɛ zo lé wo go Juda munu nya luu gi, wolé tɛrɛ ma baa. Mi pɔnénu lé Babilɔn minwiinzan blɛn wo vo Juda tɛrɛ la, é wo pla Safan be Asikam be Gédalia wuo.

²³ Sunya palu nwiinzannu valé wolé munu a ’ma aan wo léé, Babilɔn nwiinzan blɛn Gédalia dɔ gbɔrɔnama nya, wo go Gédalia va Misipa, ’bɛ gi léé, Nétania be Ismaɛl koo, Karéas be Jokanan koo, Nétofazan Tanumɛt be Séraja koo, Makati mi be Jaazania koo, wo valé ’wolé munu lé.

²⁴ Gédalia bale ’nyɔɔn wo valé ’wolé munu lɛ, yé é lé wo lɛ léé: Té ka kana do kpen wo Kaldémunu wuozannu lee lo; ’ka nyana tɛrɛ ’ko la, ’ka Babilɔn nwiinzan blɛn lé nyanama pa, yé ka dan fɛ zin ye lɛ.

²⁵ Naa, moné sɔrafiézan nya, plaminwiinmunu gɔnɔlazan do, Élisama be Nétania be Ismaɛl, é da mi vu nya é va, yé é Gédalia gyɛ yé é ga, é valé Juifinu valé Kaldémunu lé ke a va Misipa, wo nya.

²⁶ Yé munu faa, é sia wo va né kiénézan ma yé é bɔ wo va mi segele ma, wo valé sunyanu palu nwiinzannu nya, wo nwa yé wo go Éjipiti tɛrɛ la; wo kana Kaldémunu lee, azama.

Wo Jojakɛn bɔra bokɔn gi

²⁷ Juda nwiinzan blɛn Jojakɛn vole luubale gi lɛɛ yɔ do wɔlɛ vu ta sɔrafiézan nya, a moné vu ta fiézan lé yi yɔ do wɔlɛ sɔrafiézan nya, Babilɔn munu nwiinzan blɛn Évil‐Mérodɔk plale mi nwiin lɛɛ vininzan nya, é tɛrɛ si Juda munu nwiinzan blɛn Jojakɛn nwiin, yé é a bɔra bokɔn gi.

²⁸ É we néné fe a lɛ, yé é alé fuablin dɔra é va Babilɔn yé é mini a bɔlunu lé fuablinnu ta.

²⁹ Yé é alé bokɔn gi sɔnu tavɔɔ, yé Jojakɛn fɛ ble a va alé tɛrɛla bléyi faa gi.

³⁰ Babilɔn munu nwiinzan blɛn alé yi do do ma gɔɔli nɔ a lɛ alé tɛrɛla faa gi, fɔɔ yé é bɔ a gale ma.