2 Minwiinzannu 24 - Kazambale lé Sebe Sauunu 1979

¹ Jojakim bléyi va, Babilɔn nwiinzan Nébukanɛsaa go guli dan lɛ a va. Jojakim pla a wuo lɛɛ yaa; ’bɛ zuo Jojakim nwa a ma é ziin.

² Kaldénu lé sunyanu koo, Sirinu lé sunyanu koo, Moab munu lé sunyanu koo, Amɔn munu lé sunyanu koo, Gakelebale wo pa zia Jojakim ma; é wo pa zia Juda ma a sɛrɛle we gi, dére lé Gakelebale a fe é wuozannu balelayezannu lɔlu nya, a yɛrama.

³ We ’ko kɛlɛ Gakelebale lé blibɔmawe nya, we bɛ ma kaan lo; é a a va léé, é Juda si é yuɛ gi, wenyané faa lé Manasé a kɛlɛ,

⁴ é valé weanwiinlomunu nyɛ lé Manasé a zana, ’té é Jérusalɛm fan a nya bɛ, a we ma. É ziin, Gakelebale ’ka a va léé, é wo ma we vo lo.

⁵ Jojakim kɛlɛwe pɔnénu valé we faa lé é a kɛlɛ, wa é gyɛle Juda nwiinzan blɛnnu lé we zuo fe sɛbɛ gi.

⁶ Jojakim yi gyɛ é tranu va. A be Jojakɛn pla munu nwiin a pa gi.

⁷ Éjipiti nwiinzan blɛn ’ka si lɛ élé tɛrɛ la é dɛrɛ lo, naa, fɛ faa lé ke Éjipiti nwiinzan blɛn lee, é sia Éjipiti lé yuu ma fɔɔ yé é bɔ Yufrat yuu ma, Babilɔn nwiinzan blɛn a si.

⁸ Jojakɛn kɛlɛ minwiinzan blɛn nya bléyian va, ’té a lɛɛ a vu ta sɔraa, yé é pla munu nwiin moné yaa Jérusalɛm. A bu a Jérusalɛm le lé, wa laama Elnatan lu Néusita, a nya.

⁹ We lé ke é naané Gakelebale yuɛ gi, yee lé é a kɛlɛ, a ti a kɛlɛ fɛan zo, a zo ’kyɛ.

¹⁰ ’Bɛ bléyi va, Babilɔn nwiinzan blɛn Nébukanɛsaa wuozannu nwa Jérusalɛm ma, yé wo fla mabɛn.

¹¹ Bléyian va lé a wuozannu a fla mabɛnna, Babilɔn nwiinzan Nébukanɛsaa da ana.

¹² Yé Juda nwiinzan blɛn Jojakɛn koo, a bu koo, a wuozannu koo, alé minwiinzannu koo, alé miblalenu koo, wo go Babilɔn nwiinzan blɛn va. Nébukanɛsaa plale munu nwiin lɛɛ sɔraazan nya, é Jojakɛn vɔ bokɔn gi.

¹³ Gakelebale lé kɔn gi fɛwezannu koo, minwiinzan blɛn lé kɔn gi fɛwezannu koo, é wo si; Gakelebale lé kɔngifɛnu lé Salomɔn a kɛlɛ kyan nya, é wo yéli, Gakelebale a fe fɛan zo, a zo.

¹⁴ É go Jérusalɛm munu faa nya luu gi, minwiinzannu koo, gulidan nyanazannu koo, wa mi baa soru, é valé yilinyaazannu koo, folibozannu koo, wo nya; nyanégyɛzannu saa lé é wo vo ana tɛrɛ la.

¹⁵ É go Jojakɛn nya Babilɔn; minwiinzan bu koo, minwiinzan nanu valé alé miblalenu koo, ana tɛrɛ la mi blɛnblɛnnu koo,

¹⁶ sunyanu faa koo, wa mi baa yaa mi wuru soru, yilinyaazannu valé folibozannu koo, ’bɛnu a mi wuru soru, é wo si Jérusalɛm yé é go wo nya luu gi Babilɔn; wo faa a nyanazannu nya yé wo bɔa guli danle lɛ.

¹⁷ Babilɔn nwiinzan blɛn go wo nya luu gi Babilɔn. Babilɔn nwiinzan blɛn Jojakɛn ti zuan Matania dɔ minwiinzan blɛn Jojakɛn pa gi, yé é ’bɛ tɔ nɔla Sédésias.

Juda nwiinzan blɛn voélazan Sédésias

¹⁸ Sédésias kɛlɛ minwiinzan blɛn nya bléyian va, ’té a lɛɛ a yɔ do wɔlɛ do, yé é pla munu nwiin lɛɛ vu ta do Jérusalɛm. A bu a Libina le lé wa laama Jérémi lu Amutal, a nya.

¹⁹ We lé ke é naané Gakelebale yuɛ gi, yee lé é a kɛlɛ, Jojakɛn a kɛlɛ fɛan zo, a zo ’kyɛ.

²⁰ Gakelebale bli fli Jérusalɛm valé Juda ma, yé é a a va léé, ’é wo si é yuɛ gi, amalé we ’ko kɛlɛ. Yé Sédésias nwa Babilɔn minwiinzan blɛn ma.