2 Minwiinzannu 23 - Kazambale lé Sebe Sauunu 1979

Jozias miyili banle yi ga

¹ Minwiinzan blɛn Jozias Juda valé Jérusalɛm lé mi segelenu faa zén ékeva é va.

² ’Bɛ zuo, yee koo, Juda munu faa koo, Jérusalɛm munu faa koo, Balebanzannu koo, balelayezannu koo, munu faa lé, é sia wo faa kiénézan ma yé é bɔ wo faa segelezan ma, wo koo, wo faa go Gakelebale lé kɔn ’léé. Gipawe lé sɛbɛ lé wa ye Gakelebale lé kɔn gi, é a dére faa ta fe wo tɔné gi.

³ Minwiinzan blɛn dɔ kpala ta, yé é dɔ Gakelebale dére ta yé é léé, ’é dan tawo lɛ Gakelebale zuo, a déretawenu koo, alé weplalenu koo, alé bélidɔwe koo, ’é dan a kɛlɛ lɛ é bli valé é léli faa nya, yé gipawe dérenu lé wa gyɛ sɛbɛ ’ko gi, ’é dan wo ta tawo lɛ. Yé munu faa dɔ a ta é ziin.

⁴ Balebanmunu ’lɛzan Ilkija koo, Balebanzannu palu fiézan koo, kɔn ’léé tabinzannu koo, minwiinzan blɛn lé wo lɛ léé, kananu lé wa kɛlɛ Baal koo, Asataté koo, lagifɛnu faa koo, wozé nya, ’wo wo bɔra Gakelebale lé kɔn gi, yé ’wo wo kyɛ ble Jérusalɛm gini ma, Sédrɔn féinu ta, yé ’wo go wo yee nya Bétɛl.

⁵ Miyilinu lé balebanzannu lé Juda minwiinzan blɛnnu wo dɔ lasikɔrɔ kyɛblele we gi gɔ nwiin yobannanu lé wo ke Juda lé flanu ta valé Jérusalɛm zi, é wo bin. Wonu lé woo lasikɔrɔ no Baal koo, yiri valé moné koo, pɔrɔkunu monénénu koo, lagifɛnu faa koo, wo lɛ, é wo bin.

⁶ É Asataté miyili bɔra Gakelebale lé kɔn gi, yé é go a nya Jérusalɛm gini ma Sédrɔn yuu ma; é a kyɛ ble Sédrɔn yuu gɔ la yé a yee bo yé é a yee nwɛɛn mi vunnu ta.

⁷ Bɔrɔdɛlomu lé kɔnnu lé ke Gakelebale lé kɔn gi, ’té lomu éé Asataté lé sɔkɔn dɔsɔ taan wo gi bɛ, é wo zana.

⁸ Balebanzannu lé ke Juda lé flanu ta, é da wo nya; gɔ nwiin yobannanu lé balebanzannu éé lasikɔrɔ kyɛ blé wona, é wo lɛ ga, é sia Géba fɔɔ yé é bɔ Bɛɛ‐Sééba. Gɔ nwiin yobannanu lé wo ke flagɔrɔ ’léé, yee lé ke flanwiinzan Jozué lé fɛna, é valé yee lé ke flagɔrɔ ’léé bɛbolazia, é wo sɛrɛ.

⁹ Naa, gɔ nwiin yobannanu lé balebanzannu ’ka dan Gakelebale ban lɛ Jérusalɛm lo; buru lé lévɛn ’ka a va lo, wa blé wo bwenu nya ékeva.

¹⁰ Tofɛt lé ke Inom kulunu lé gɔ méléna, minwiinzan blɛn a sɛrɛ, léé, dé mi be léé, ɛɛ, dé a lu léé, té ’wo wo kyɛ ble Mɔlɔk lɛ é dɛrɛ lo.

¹¹ Wisoonu lé Juda nwiinzannu a pa é yɛrama yiri zé nya, miblale Nétan‐Mélɛk lé éé nyanaan fla gini ma, a yiakɔn sɔnɔ, minwiinzan wo si fɛana lé woo wɔraan Gakelebale lé kɔn gi, ana; yé é yiri lé goronu kyɛ ble.

¹² Yobannanu lé Juda nwiinzannu a kɛlɛ Akaz lé kɔn nwiin kɔngwa ta, wo valé yobannu lé Manasé a kɛlɛ Gakelebale lé kɔn gɔrɔ fié gi, minwiinzan wo sɛrɛ; wo sɛrɛle zuo é wo si ana yé é wo yee nwɛɛn Sédrɔn yuu va.

¹³ Gɔ nwiin yobannanu lé wo ke Jérusa?-?sɛm yara, sanna gɔ bɛyilazia, minwiinzan wo sɛrɛ; Izraɛl nwiinzan wo dɔ Asataté koo, Sidɔn lé bozobale koo, Moab lé bozobale Kémɔs koo, Amɔn lé bozobale Milkɔm koo, wozé nya.

¹⁴ Jozias miyilinu yéli yé é yo’wuo ’wii, yé fɛana lé wo ke, é ana fan miwɔlɛnu nya.

¹⁵ Balebanna lé ke Bétɛl koo, gɔ nwiin yobanna lé Nébat be Jéroboam lé é Izraɛl kɛlɛ wenyanékɛlɛzannu nya, é a kɛlɛ koo, minwiinzan blɛn wo faa sɛrɛ; é gɔ nwiin yobanna kyɛ ble yé a yee bo, yé é miyili kyɛ ble.

¹⁶ Jozias nɔla yé mipana lé ke gɔ ma bɛ, é a ye, yé é munu pa zia miwɔlɛnu sina mipananu na, yé é wo kyɛ ble balebanna ta yé é a sɛrɛ, dére lé Gakelebale a fe, Bale lé mi lé é we ’konu zuo fe, a nya, a yɛrama.

¹⁷ É léé: Mi sele dɔ migifɛ lé maa a yé bɛ, mɛ fɛ léé? Flamunu a zi pa a lɛ léé: Bale lé mi lé é si Juda tɛrɛ la yé wenu lé bé lɛ sɔɔ ’ko, é siaa a nya Bétɛl lé balebanna ta, a vun lé.

¹⁸ Yé é léé: ’Ka a vo; té mi do kpen a wɔlɛ si ana lo. A wɔlɛnu koo, balelayezan lé é si Samari, ’bɛ wɔlɛnu koo, ’bɛ zo lé wo wo vo.

¹⁹ Gɔ nwiin yobannanu lé kɔnnu lé wo ke Samari lé flanu ta, ’té Izraɛl nwiinzannu wo kɛlɛ Gakelebale bli flile we gi bɛ, Jozias wona kɔnnu sɛrɛ é ziin; é we kɛlɛ wo vazia fɛan zo lé é a kɛlɛ Bétɛl, a zo ’kyɛ.

²⁰ Gɔ nwiin yobannanu lé ke bɛ, é wolé balebanzannu gyɛ yobannanu ta, yé é mi wɔlɛnu kyɛ ble wo ta. ’Bɛ zuo é go Jérusalɛm é pa gi.

Wo Taboyi lé fɛti kɛlɛ

²¹ Minwiinzan blɛn munu faa béli dɔ léma: ’Ka Gakelebale, kalé Bale bɔ Taboyi lé fɛti kɛlɛle nya, fɛan zo lé wa gyɛ gipawe sɛbɛ ’ko gi, a zo.

²² É sia bléyian va lé weblemunu ke Izraɛl munu lé we blena koo, Izraɛl nwiinzan blɛnnu valé Juda nwiinzan blɛnnu bléyi faa koo, yé é bɔ wozé ma, wo ’ka Taboyi lé fɛti kɛlɛ lɛ bélé Taboyi lé fɛti ’ko kɛlɛle zo lo.

²³ Minwiinzan blɛn Jozias lɛɛ vu ta sɔraazan nya lé wo Taboyi lé fɛti ’ko kɛlɛ Jérusalɛm, Gakelebale bɔle we ma.

²⁴ ’Bɛ ta loru, miléli laazanu koo, ’monédɔzannu koo, térafimnu koo, miyilinu koo, naanaafɛ faa lé wa ye Juda tɛrɛ la valé Jérusalɛm koo, Jozias wo si ana, bélidɔwe dérenu lé ke é gyɛle, sɛbɛ lé Balebanzan Ilkija a ye Gakelebale lé kɔn gi, a gi, tawole wo ta we gi.

²⁵ Minwiinzan lé é nɔla Gakelebale va é bli faa koo, ébozen faa koo, élé plɛplɛ koo, wo nya, Moizi lé bélidɔwe faa yɛrama bélé Jozias zo, ’bɛ zo minwiinzan ’ka Jozias ’lɛ é vinin lo, yé a zoɛzan ’ka bɔra lɛ a zuo lo.

²⁶ Naa, duowo, Gakelebale bli lé ke flina Judanu ma é baba, we faa lé Manasé a kɛlɛ a bli flile we gi, a we ma, Gakelebale ’ka daan lɛ é bliflile blɛɛn ma lo.

²⁷ Yé Gakelebale léé: Maa Izraɛl si an yuɛ gi fɛan zo, a zo duo lé maa dan Judanu si lɛ an yuɛ gi é ziin, yé fla ’ko, Jérusalɛm lé maa si a va, é valé kɔn lé maa a mawe fe léé, ’bɛna lé an tɔ é dan kɛlɛ lɛ, maa dan sɔn vɔ lɛ wo ma.

²⁸ Jozias kɛlɛwe pɔnénu valé we faa lé é a kɛlɛ, wa é gyɛle Juda nwiinzannu lé we zuo fe sɛbɛ gi.

Jozias gale

²⁹ Jozias bléyi va Éjipiti nwiinzan Faraɔn Néko go Asiri nwiinzan ma, Yufrat yuu ma zia. Minwiinzan Jozias go zi dɔ lɛ a ’lɛ; Faraɔn a ye tɔɔn, é a gyɛ Mégido.

³⁰ A wuozannu a gale si ana goro gi; wo si a nya Mégido yé wo goan Jérusalɛm yé wa pa élé mipana. Ana tɛrɛlamunu Jozias be Joakaz si; wo nyɔnɔ zén a nwiin yé wa dɔ minwiinzan blɛn nya é ti pa gi.

Judanu nwiinzan blɛnnu Joakaz — Jojakim — Jojakɛn

³¹ Joakaz kɛlɛ minwiinzan blɛn nya bléyian va, ’té a lɛɛ a yɔ do wɔlɛ yaa, yé é pla munu nwiin moné yaa Jérusalɛm. A bu a Libina le lé wa laama Jérémi lu Amutal, a nya.

³² We lé ke é naané Gakelebale yuɛ gi, yee lé é a kɛlɛ, a tranu a kɛlɛ fɛan zo, a zo ’kyɛ.

³³ Faraɔn Néko gɔgɔbale vɔ a ma Ribla, Amat tɛrɛ la, té é pla munu nwiin Jérusalɛm é dɛrɛ lo we gi; yé é ban dɔ ana tɛrɛ nwiin gɔɔlifu talan yɔ soru valé kyan talan do.

³⁴ Yé Faraɔn Néko Jozias be Éliakim dɔ minwiinzan nya é ti Jozias pa gi, yé é a tɔ nɔla Jojakim nya. É go Joakaz nya luu gi Éjipiti yé é ga ’bɛna.

³⁵ Jojakim gɔɔlifu valé kyan nɔ Faraɔn lɛ; naa, é ban dɔ ana tɛrɛlamunu nwiin gɔɔli yele we ma, Faraɔn dére ta; gɔɔli valé kyan lé énɔ dan a nɔ lɛ Faraɔn Néko lɛ, é a guli munu ma do do, yé é a si wo lee.

³⁶ Jojakim kɛlɛ minwiinzan blɛn nya bléyian va, ’té a lɛɛ a yɔ do wɔlɛ soru, yé é pla munu nwiin Jérusalɛm lɛɛ vu ta do. A bu a Ruma le lé wa laama Pédaja lu Zébuda, a nya.

³⁷ We lé ke é naané Gakelebale yuɛ gi, yee lé é a kɛlɛ, a tranu a kɛlɛ fɛan zo, a zo ’kyɛ.