2 Minwiinzannu 22 - Kazambale lé Sebe Sauunu 1979

Juda nwiinzan blɛn Jozias lé we

¹ Jozias plale sia munu nwiin, ’té a lɛɛ a sɔraa, yé é pla munu nwiin Jérusalɛm lɛɛ yɔ do wɔlɛ vu ta do. A bu a Bosikat le lé wa laama Adaja lu Jédida, a nya.

² Wean é ke é drɔle Gakelebale yuɛ gi, yee lé é a kɛlɛ, yé é tawo é tra David lé tawobɛ faa gi; é ’ka é yara nɔla lɛ, dé a bɛyilazia léé, dé a bɛbolazia léé, ana lo.

³ Minwiinzan Jozias lɛɛ vu ta sɔraazan nya, minwiinzan blɛn sɛbɛgyɛzan Mésulam be Asalia be Safan nwunvɔ Gakelebale lé kɔn gi.

⁴ É lé a lɛ léé: ’I go Balebanzan Ilkija va, gɔɔli lé wo da a nya Gakelebale lé kɔn gi, é valé gɔɔli lé kɔn ’léé tabinzannu a si munu lee, ’é a zén ékeva.

⁵ ’Wo gɔɔli ’ko bɛ pa munu lé wo ke Gakelebale lé kɔn gi nyanamapazannu nwiinzannu nya, wo lee, yé ’wa nɔ munu lé wo ke Gakelebale lé kɔn sɛrɛna ma’lɛrɛna, yilinyaazannu koo, nyanamapamunu koo, kɔndɔmunu koo, wo lɛ;

⁶ yé yili valé gɔlɛ ma nyaale lé wo ma we ke wo gi kɔn ma’lɛrɛle we ma, yé ’wa lɔ a nya.

⁷ Naa, gɔɔli lé wa nɔ wo lɛ, wo ’ka dan a zuo laa lɛ wo lee lo, naa, woo we kɛla tegele, azama.

Bélidɔwe sɛbɛ lé é san, wa ye

⁸ Yé Balebanmunu ’lɛzan Ilkija lé sɛbɛgyɛzan Safan lɛ léé: Maa bélidɔwe sɛbɛ ye Gakelebale lé kɔn gi. Yé Ilkija sɛbɛ nɔ Safan lɛ, yé Safan a ta fe.

⁹ A zuo sɛbɛgyɛzan Safan go a zuo fe lɛ minwiinzan blɛn lɛ, yé é léé: Gɔɔli lé ke kɔn gi, i wuozannu a zén ékeva yé wa nɔ munu lé wo ke Gakelebale lé kɔn gi nyanama nwiin, wo lɛ.

¹⁰ Sɛbɛgyɛzan Safan lé é ziin minwiinzan blɛn lɛ léé: Balebanzan Ilkija sɛbɛ do nɔ an lɛ. Yé Safan a ta fe minwiinzan blɛn lɛ.

¹¹ Minwiinzan bélidɔwe sɛbɛ gi dérenu ’ma aan wo, élé sɔnu fia.

¹² Balebanzan Ilkija koo, Safan be Asikam koo, Misé be Akabɔɔ koo, sɛbɛgyɛzan Safan koo, minwiinzan wuozan Asaja koo, minwiinzan blɛn lé wo lɛ léé:

¹³ ’Ka go, sɛbɛ lé wa ye, ’ka a gi dére tawe laa Gakelebale lee, maa koo, munu koo, Juda faa koo, kolé we ma; naa, ko tranu ’ka Gakelebale dérenu lɛdɔ lɛ a ma monomono lo, yé we faa lé wa gyɛ sɛbɛ ’ko gi, wo ’ka a ta tawo lɛ monomono lo, amalé Gakelebale bli a flina ko ma é baba.

¹⁴ Balebanzan Ilkija koo, Asikam koo, Akabɔɔ koo, Safan valé Asaja koo, wo go balelaye le Ulda va; é a sɔnu tabinzan Aaras be Tikiva be Salum na nya. Éé nyanaan Jérusalɛm flagɔrɔ bɛ gi.

¹⁵ Wo nyaa wefele nya a lɛ faa, é lé wo lɛ léé: Gakelebale, Izraɛl lé Bale léma: Mi lé é ka pa an lɛ zia, ’ka fe a lɛ léma:

¹⁶ Gakelebale léma: Bé ye, maa dan we tɔntɔnnu bɔ lɛ fɛkona valé ana munu ma, sɛbɛ lé Juda nwiinzan blɛn a ta fe, a dére faa yɛrama.

¹⁷ Wo an vo, yé wo bale bɛnu ban lasikɔrɔ nya an bli flile wo bɛnu panyanama nya we gi, amalé an bli fli fɛkona ma, yé é ’ka dan dɔrala lɛ lo.

¹⁸ Naa, Juda nwiinzan blɛn lé é ka pa zia we laale Gakelebale lee we gi bɛ, ’ka fe a lɛ léma: Dérenu lé bé ’ma, wolé we ma lé Gakelebale, Izraɛl lé Bale léma:

¹⁹ Guru zana a gi dére valé bale pa mi ma dére lé maa fe tɛrɛ ’ko valé a tamunu ma, bé ’ma aan wo, i bli kyɛ dɔ yé ibo kɛlɛ kiéné Gakelebale ’lɛ, ilé sɔnu fia yé i wuvɔ an ’lɛ, bɛwemalé maa é ziin, maa ’ma; yee lé Gakelebale a fe.

²⁰ Bɛwemalé, bé ye, i dan go lɛ drɔɔ i tranu zuo, yé we tɔntɔnnu faa lé maa dan wo bɔ lɛ fɛkona ma, i ’ka dan wo ye lɛ lo. Wo go yé wo we zi pa dére ’ko zuo fe minwiinzan blɛn lɛ.