2 Minwiinzannu 21 - Kazambale lé Sebe Sauunu 1979

Juda nwiinzan blɛn Manasé lé we

¹ Manasé kɛlɛ minwiinzan nya bléyian va, ’té a lɛɛ a vu ta fié, yé é pla munu nwiin lɛɛ yɔ fié wɔlɛ vu ta soru Jérusalɛm. Wa bu laama Efisiba.

² We lé ke é naané Gakelebale yuɛ gi, é a kɛlɛ, bɛnnu lé Gakelebale wo bin Izraɛlnu ’lɛ, wolé bozowenu yɛrama.

³ Gɔ nwiin yobannanu lé a ti Ézékia a zana a gi, é wo dɔ ana é ziin; é Baalnu bannanu dɔ; é Asataté miyili kɛlɛ, bélé Izraɛl nwiinzan Akab a kɛlɛ fɛan zo, a zo, yé é dia é bli la lagifɛnu faa ’lɛ, yé é wo bɔ.

⁴ É yobannanu dɔ Gakelebale lé kɔn gi, dɔlé ’té Gakelebale a fe léé, Jérusalɛm ta lé é dan ’é tɔ vo lɛ.

⁵ É lagifɛnu faa bannanu dɔ Gakelebale lé kɔn gɔrɔ fiénu gi.

⁶ É é be vɔ kyɛ va; éé ’moné dɔa latinu valé ménénu nya wena yele we ma, yé é munu dɔ miléli laamunu nya, ’té woo tɛlɛ tɛlama we fé. We lé é ke é naané Gakelebale yuɛ gi, Manasé a kɛlɛle gi gyɛ, Gakelebale bli flile we ma.

⁷ Asataté miyili lé é a kɛlɛ, é a dɔra Bale lé kɔn gi; kɔn lé Bale a fe David valé é be Salomɔn lɛ alé we ma léé: Jérusalɛm lé maa a si a va Izraɛl bɛnnu faa va, ’bɛ valé kɔn ’ko, maa dan an tɔ pa lɛ wo ma yifaama, yee kɔn lé.

⁸ Maa ’ka dan Izraɛl bin lɛ tɛrɛ lé maa léé, maa a nɔ wo tranu lɛ, ana é ziin lo, ’té dé wo tawo an dérenu valé bélidɔwe faa lé an wuozan Moizi a fe wo lɛ, wo ta.

⁹ Naa, wo ’ka a lɛdɔ lɛ a ma lo; yé Manasé lé we ma lé wo zi saan yé wo wenaané kɛlɛ é mini bɛnnu lé Gakelebale wo kulu ga Izraɛlnu ’lɛ, wo ta.

¹⁰ Yé Gakelebale we fe é wuozannu balelayezannu lɔlu nya léé:

¹¹ Juda nwiinzan blɛn Manasé naanaawe ’konu kɛlɛ, yé wenyané lé Amorénu a kɛlɛ azé bléyi ’lɛ, azé mini wo lɛ, yé é ziin, miyilinu nya lé é Juda kɛlɛ wenyanékɛlɛzannu nya,

¹² bɛwemalé we lé Gakelebale, Izraɛl lé Bale a fe, yee lé ke ’ko. É léé: We tɔntɔnnu lé maa dan wo bɔ lɛ Jérusalɛm valé Juda ma, dé mian é a tawe ’ma, é dan so lɛ a tɔné zi.

¹³ Maa dan Jérusalɛm lé we kɛlɛ lɛ bélé Samari valé Akab lé we zo. Maa dan Jérusalɛm gi saa lɛ, woo pala gi saan fɛan zo yé wa yara bua a gi saale zuo, a zo.

¹⁴ Anlé munu pɔné lé wo vo, maa dan daan lɛ wo ma, yé maa dan wo pa lɛ wo nyanézannu lee; wo dan kɛlɛ lɛ wo nyanézannu faa lé gulizarafɛ valé dɔnmawi nya;

¹⁵ we lé ke é naané an yuɛ gi, yee lé wa kɛlɛ yé wo an bli fli, é sia yian nya lé wo tranu si Éjipiti tɛrɛ la fɔɔ yi ’ko nya, ’bɛzama.

¹⁶ É ziin, Manasé weanwiinlozannu nyɛ zana kiɛre fɔɔ yé Jérusalɛm fan a nya, é sia a péli ma fɔɔ yé é bɔ a ’wuo ma; wenyanénu lé é a kɛlɛ yé é Juda munu kɛlɛ wo kɛlɛzannu nya, we lé ke é naané Gakelebale yuɛ gi, a kɛlɛle nya, wo ’ka ’bɛ fena lo.

¹⁷ Manasé kɛlɛwe pɔnénu koo, we faa lé é a kɛlɛ koo, wenyanénu lé ébo nɔ a kɛlɛle lɛ koo, wa é gyɛle Juda nwiinzan blɛnnu lé we zuo fe sɛbɛ gi.

¹⁸ Manasé yi gyɛ é tranu va yé wa pa alé kɔn sɔnɔ zian féi, Uza lé zian féi. Yé a be Amon pla munu nwiin a pa gi.

Juda nwiinzan blɛn Amon lé we

¹⁹ Amon kɛlɛ minwiinzan nya bléyian va, ’té a lɛɛ a yɔ do wɔlɛ fié, yé é pla munu nwiin Jérusalɛm lɛɛ fié. A bu a Jotiba le lé wa laama Arus lu Mésulémɛt, a nya.

²⁰ We lé ke é naané Gakelebale yuɛ gi, yee lé é a kɛlɛ, a ti Manasé a kɛlɛ fɛan zo, a zo;

²¹ é tawo é ti lé tawobɛ faa gi. Miyilinu lé a ti a bɔ, é wo bɔ yé é dia é bli la wo ’lɛ;

²² é Gakelebale, a tranu lé Bale vo, yé é ’ka tawo lɛ Gakelebale lé zi ta lo.

²³ Amon wuozannu é ma we ble, yé wo mi?-?nwinzan gyɛ élé kɔn gi.

²⁴ Naa, munu lé wo minwiinzan Amon ma we ble, ana tɛrɛ la munu wo gyɛ; yé ana tɛrɛ la munu a be Jozias dɔ minwiinzan blɛn nya a pa gi.

²⁵ Amon kɛlɛwe pɔnénu valé we lé é a kɛlɛ, wa é gyɛle Juda nwiinzan blɛnnu lé we zuo fe sɛbɛ gi.

²⁶ Wa pa élé mipana, Uza lé zian féi. Yé a be Jozias pla munu nwiin a pa gi.