2 Minwiinzannu 20 - Kazambale lé Sebe Sauunu 1979

Ézékia gyɛ kɛlɛ gagyɛ nya

¹ ’Bɛ bléyi va, Ézékia gyɛ kɛlɛ gagyɛ nya. Balelayezan Amosi be Ézai da a va yé é lé a lɛ léé: Gakelebale léma: I dan ga lɛ, i ’ka dan vo lɛ é yuɛma é dɛrɛ lo, amalé ’i dére vo ilé kɔngimunu va.

² Ézékia é yara nɔla kɔnguru ma yé é bazoro Gakelebale lɛ léé:

³ Oo, Gakelebale, a sele ’é dɔ i gi léé, an tawo i yara yarapalale valé bli tegele nya, yé we lé é ke é zima i yuɛ gi, yee lé ma a kɛlɛ. Yé Ézékia yuɛ’yi so kiɛre.

⁴ Ézai bɔra yé é ’ka tan bɔ lɛ gɔrɔ mélénazan ta lo tɔɔn, Gakelebale dére da a va dére ’konu nya léé:

⁵ ’I diéra, bé fe anlé munu nwiinzan Ézékia lɛ léma: Gakelebale, i tra David lé Bale léma: Maa ilé bazoro dére ’ma, maa i yuɛ’yi ye. Bé ye, maa dan i béli lɛ; a yi yaazan nya i dan go lɛ Gakelebale lé kɔn gi.

⁶ Maa dan ilé tɛrɛla taa pa lɛ lɛɛ vu ta soru. Bii koo, fla ’ko koo, maa dan i si lɛ Asiri minwiinzan lee, maa dan fla ’ko takuun lɛ, maa valé an wuozan David lé we ma.

⁷ Ézai léé: ’Ka bɔrɔyili poro povɔle si, Wa si, yé wa pla a manɔn ta. Yé Ézékia béli.

⁸ Ézékia a fe kɔɔn Ézai lɛ léé: Tɔmase kaa nya lé maa dan a gi dɔɔ lɛ léé, Gakelebale é dan an béli lɛ yé an go a yi yaazan nya Gakelebale lé kɔn gii?

⁹ Yé Ézai léé: Bé ye, tɔmase lé Gakelebale a nɔ yé ’bɛ nya lé i dan a gi dɔɔ lɛ léé, Gakelebale é dan é dére lɛ sɔɔ lɛ, yee lé ke ’ko: Furɔ ’é go é ’lɛ sikalié vu ta laa, taa, ’é da é pai sikalié vu taa?

¹⁰ É a zi pa léé: Dé furɔ go é ’lɛ sikalié vu ta, ’bɛ a we kiéné nya; ’é da é pai sikalié vu ta ma.

¹¹ Yé balelayezan Ézai bazoro Gakelebale lɛ, yé furɔ bɔ fɛana Akaz lé sikalié ta, Gakelebale da a nya é pai sikalié vu ta.

Babilɔn munu da we lɛ Ézékia va

¹² ’Bɛ bléyi duo nya, Babilɔn minwiinzan Baladan be Bérodak‐Baladan sɛbɛ valé blan pa Ézékia lɛ zia, naa, é a ’ma léé, Ézékia gyɛ kɛlɛ.

¹³ Ézékia nwunvɔzannu si, yé fɛ vlɛzannu koo, gɔɔlifu valé kyan koo, zianbla ginzannu valé nyɔnɔwezan koo, alé gulidanfɛnu koo, fɛ faa lé ke alé fɛwezannu nya koo, é a faa pana gɔɔn wo lɛ. Fɛ lé ke alé kɔn gi valé alé tɛrɛ faa la yé Ézékia ’ka ’bɛ gɔɔn lɛ wo lɛ lo, ’bɛ fɛ ’ka lo.

¹⁴ ’Bɛ zuo balelayezan Ézai da minwiinzan Ézékia va yé é lé a lɛ léé: Munu ’ko, wo lé nɔɔ? Wo si kyɛn yé wo da i vaa? Ézékia lé a lɛ léé: Wo si tɛrɛ baa la, wo si Babilɔn.

¹⁵ Ézai lé é ziin léé: Mɛ fɛ lé wa ye ilé kɔn gii? Ézékia lé a lɛ léé: Wo anlé kɔngifɛnu faa ye; anlé fɛwezannu va fɛ lé maa ’ka a gɔɔn lɛ wo lɛ lo, é ’ka lo.

¹⁶ Yé Ézai lé Ézékia lɛ léé: ’I tɔné dɔ Gakelebale dére lɛ.

¹⁷ Bé ye, a bléyi é dan bɔ lɛ yé fɛ faa lé ke ilé kɔn gi valé fɛnu lé i tranu a zun dɔ fɔɔ kyɔ yi nya, wo dan go lɛ a faa nya Babilɔn; Gakelebale léé: A do kpen ’ka dan vo lɛ lo.

¹⁸ I benu lé i dan wo yaa lɛ bɛ, wo dan wo ke si lɛ yé wo dan wo kɛlɛ lɛ miblalenu nya Babilɔn nwiinzan lé kɔn gi.

¹⁹ Ézékia a zi pa Ézai lɛ léé: Gakelebale dére lé bé fe, é a é zima. Yé é lé é ziin léé: Vole drɔɔ valé mi nyanale éboma duaa ’ka dan kɛlɛ lɛ anlé tɛrɛ la bléyi va loo?

²⁰ Ézékia kɛlɛwe pɔnénu koo, alé we blɛnblɛn kɛlɛle koo, é ’yiguru valé ’yiyoro kɛlɛ fɛan zo yé é da ’yi nya fla koo, wa é gyɛle Juda nwiinzannu lé we zuo fe sɛbɛ gi.

²¹ Ézékia yi gyɛ é tranu va. Yé a be Manasé pla munu nwiin a pa gi.